Thuto e fihla Samaria. Filipi le Molaki wa Kandatse
1Saulo yena, o be a dumela go bolawa ga Stefano.
Ka lona tšatši leo phuthego ya Jerusalema ya na ya tsogelwa ke tlaišego e kgolo. Ka moka ba gašanywa ba ya dinageng tša Juda le tša Samaria, gwa šala baapostola fela. 2Banna ba ba boifago Modimo ba boloka Stefano, ba mo direla sello se segolo.
3Saulo yena a šuhla phuthego, a tsena nywakong e go fela, a goga bana le basadi, a ba gafela kgolegong.
4Ba ba gašantšwego ba na ba sepela le naga, ba bolela lentšu la Ebangedi. 5Filipi a fologela motseng wa Samaria, a ba anegela tša Kriste. 6Mašaba a theetša tše di bolelwago ke Filipi e le ba pelotee go kweng, ba bona mehlolo ye a bego a e dira. 7Gobane go ba bantši ba ba nago le meoya ya ditšhila, e be e etšwa ka go goa ka mantšu a magolo; le ba ba rephilego ditho, le ba bantši ba digole, ba be ba fodišwa. 8Motseng woo gwa ba le lethabo le legolo.
9Gona moo ba hweditše go na le motho e a bitšwago Simone, a dira malea, a gakiša setšhaba sa Samaria a itira motho e mogolo. 10Bohle, ba bagolo le banyane, ba be ba mo kgolwa ba re: Ke yena maatla a Modimo, ona a magolo. 11Ba be ba mo kgolwa, ka gobane e be e šetše e le kgale a ba gakiša ka malea a gagwe. 12Bjale ge ba dumetše Filipi ge a ba ruta Ebangedi ya mmušo wa Modimo le ya leina la Jesu Kriste, ba kolobetšwa, banna le basadi. 13Le Simone a dumela, a kolobetšwa. A fela a ehlwa le Filipi; a tlabega ge a bona mehlolo le maatla a magolo a ditiro tše di bego di direga.
14Baapostola ba sa le kua Jerusalema ba kwa gore kua Samaria lentšu la Modimo le amogetšwe. Ba roma Petro le Johane ba re ba ye gona. 15Bona ge ba fihla, ba ba rapelela gore ba fiwe Moya o Mokgethwa; 16gobane o be o sešo wa tla go bona; ba be ba kolobeditšwe leineng la Morena Jesu ya ba moka. 17Baapostola ba tla ba ba bea diatla; ya ba gona ba fiwago Moya o Mokgethwa.
18Simone, ge a bona batho ba fiwa Moya o Mokgethwa ka go bewa diatla ke baapostola, a ba bapaletša ditšhelete, 19a re: Le nna mpheng maatla ao, gore motho yo nkago mmea diatla a fiwe Moya o Mokgethwa.
20Petro a fetola a re: Tšhelete ya gago a e yo loba nago ge o re neo ya Modimo e rekwa ka tšhelete. 21O ka se ke wa hwetša kabelo le bohwa ka lentšu le, gobane pelo ya gago ga e a loka pele ga Modimo. 22Itshole o lahle bobe bjoo bja gago; o rapele Modimo, gore mohlomongwe o lebalelwe bomenetša bjoo bja pelo ya gago. 23Gobane, ke a go bona, o tletše sabohloko se se galakago, o sa tlemilwe ke bokgopo.
24Simone a fetola a re: Nthapeleleng lena go Morena, gore ke se ke ka welwa ke se tee sa tšeo le di boletšego.
25Baapostola ge ba feditše go bea bohlatse le go bolela lentšu la Morena, ba boela Jerusalema, ba tšama ba kwatša Ebangedi metsaneng e mentši ya Basamaria.
26Morongwa wa Morena a tla a Bolela le Filipi a re: Tsoga o ye thoko ya Borwa, tseleng e tšwago Jerusalema ya theogela Gatsa, mo go lego šokeng. 27Filipi a tsoga a ya; a bona monna wa Ethiopia, molaki le letona la Kandatse mohumagadi wa Etiopia, wa go laka mahumo a gagwe ka moka. Monna yo o be a tlile Jerusalema go rapela. 28Bjale o be a boela ga gabo, a dutše koloing ya gagwe, a bala lengwalo la moporofeta Jesaya. 29Moya wa roma Filipi wa re: Batamela o bapele le koloi yeo. 30Filipi a hlaganela; a kwa ge motho yo a bala lengwalo la moporofeta Jesaya; a mmotšiša a re: Afa tše o di balago o a di kwa?
31Monna eo a re: Gomme nka kgona bjang ge ke se na wa go ntlhahla tseleng? A kgopela Filipi a re a namele a dule le yena. 32Ge e le tema ye a bego a e bala še: A etša nku e išwago tlhabong; a etša kwanyana ge e ikhomolela pele ga ba e kotago; a se ke a ba a ahlamiša molomo wa gagwe. 33O ntšhitšwe tlalelong le kahlolong. Moloko wa gagwe o hlathwa ke mang? Hleng o kgaotšwe nageng ya ba phelago.
34Molaki a botšiša Filipi a re: Ke a go kgopela, Moporofeta o ra mang ge a realo? A ke go ipolela? Goba o šupa e mongwe? 35Ke mo Filipi a thomilego go bolela; a thoma ka lengwalo leo, a mo anegela Ebangedi ya Jesu. 36Ya re ge ba swere tsela ka mokgwa woo, ba tla meetseng. Molaki a re: Meetse šeao; ke sa dibja keng go kolobetšwa? 37Filipi a re: Ge o dumela ka pelo ka moka, gona go ka ba bjalo. Molaki a re: Ke dumela gore Jesu Kriste ke yena Morwa wa Modimo.
38A laela a re, koloi e emišwe; ba fologela meetseng ka babedi, Filipi le Molaki, mme a kolobetšwa. 39Ge ba rotoga ba etšwa meetseng, Moya wa Morena wa tšea Filipi wa mo široša; Molaki a se hlwe a mmona. A wela tsela a ikela a thabile. 40Filipi a hwetšwa a le Asidodo, a tšama a bolela Ebangedi metseng ka moka; a ba a fihla Kesarea.
