Bophelo bja motho e mofsa
1Bjale ge le tsogile le Kriste, phegelelang tša legodimong, mo Kriste a dutšego ka letsogong le letona la Modimo. 2Eleletšang tša legodimong, le lese go eleletša tša mo lefaseng. 3Gobane le hwile, gomme bophelo bja lena bo fihlilwe Modimong le Kriste. 4Mohla Kriste, yena bophelo bja lena, a tlogo bonagala, ke mo le lena le tlogo bonagala le yena Le na le letago.
5Bolayang ge tše dithong tša lena e lego tša lefase, e lego bootswa, le ditšhila, le tumo, le kganyogo e mpe, le megabaru e lego go direla modimo o šele; 6ke tšona tše bogale bja Modimo bo tlelago ba go se dumele ka tšona. 7Ke tšona tše kgale le lena le bego le eya le tšona mola le sa phela ka mokgwa woo.
8Bjale gona lahlang dilo tšeo ka moka, le bogale, le pefelo, le bobe, le maroga; le dipolelo tša dihlong di se be gona melomong ya lena. 9Le se ke la forana ka maaka; le be ba ba apotšego motho e motala le ditiro tša gagwe. 10Le be ba ba aperego motho e mofsa, e a mpshafetšego a ba wa tlhaologanyo, a ba seswantšho sa eo a mo hlodilego. 11Fa ga go sa na Mogerika, le Mojuda, ga go sa na lebollo le go se bolle, ga go sa na wa lethoko le wa lenaba, ga go sa na mohlanka le mohunologi; e a lego gona ke Kriste e a lego tšohle go bohle.
12Bjale, le le bahlaolwa ba Modimo, le le bakgethwa le baratiwa, aparang kgaugelo le botho le boikokobetšo le boleta le go se fele pelo. 13Le fele le rwalana; le lebalelane ge go na le e a nago le taba le e mongwe; boka Kriste ge a le lebaletše, le lena le dire ka mokgwa woo. 14Se segolo mo go tšeo ka moka ke gore le apare lerato, yona tlemo ya botlalo. 15Mo dipelong tša lena go buše khutšo ya Modimo, ye le bileditšwego yona la ba mmele o tee. Le be balebogi. 16Lentšu la Kriste a le age mo go lena wa go le humiša. Le rutane, le eletšane ka bohlale bjohle; gomme ka go leboga le binele Morena dipelong tša lena dipesalome le dikopelo le difela tša Moya. 17Gomme tšohle tše le kago di dira ka polelo le ka diatla, le di dire ineng la Morena Jesu, le leboga Modimo Tata weno ka yena.
18Lena basadi! Kwang banna ba lena; ke sona se se swanetšego Moreneng.
19Lena banna! Ratang basadi ba lena; le se ke la ba galefela.
20Lena bana! Kwang batswadi ba lena dilong tšohle; gobane ke sona se se kgahlago Morena.
21Lena botatagobana! Le se ke la befediša bana ba lena, gore ba se tširoge.
22Lena bahlanka! Ba e lego beng ba lena ka thoko ya mmele le ba kweng, e se go fo ba hlankela mahlong ka mokgwa wa bakgahlabatho; ba hlankeleng ka pelothereši le boifa Modimo. 23Ka moka tše le di dirago, le di dire ka pelo e ratago, eke le direla Modimo, e sego batho. 24Le dire le tseba gore moputso wa bohwa le tlo o fiwa ke Modimo, gobane le hlankela Morena Kriste. 25E a dirago bokgopo, o tlo boelwa ke tše kgopo tše a di dirilego; fao ga go bebje motho.
