DANIELE 7

₁Ka ngwaga wa pele wa Belesatsara kgoši ya Babele, Daniele o lorile diloro, a bona dipono a le malaong a gagwe. Diloro tšeo Daniele o di ngwadile a hlatholla ditaba tša tšona.

₂A laodiša a re: Ke be ke le ponong bošego, ka bona diphefo tše nne tša legodimo di tšutlela lewatleng le legolo. ₃Gwa rotaga dibata tše nne tše ditonatona, tše di sa swanego, di etšwa lewatleng. ₄Sa pele se be se swana le tau, se na le diphego tša lenong. Ka lebeleša ka bona diphofa tša sona di tomolwa, sa emišwa fase; sa emišwa ka maoto a sona bjalo ka motho, sa newa pelo ya motho.

₅Ya ba gona ke bonago sebata se sengwe sa bobedi, se le bjalo ka phiri; sa bopologa se swere dikgopo tše tharo ka meno, sona sa laiwa gwa thwe: Tsoga o je dinama tše ntši!

₆Ya ba gona ke bonago sebata se sengwe se tšwelela se le bjalo ka nkwe, se na le diphego tše nne tša manong mokokotlong wa sona, se na le dihlogo tše nne: sona sa newa bogoši.

₇Ka morago, ga tšona pono tša bošego, ka bona sebata sa bone; e be e le se se befilego se šiiša, se na le maatla a magolo, le meno a magolo a tshipi, sa ja sa hlahuna, maratha sa gatakela ka maoto. E be e le sa mohuta o šele, se sa swane le tšela tše dingwe tša pele; se be se na le dinaka tše lesome. ₈Ka re ke sa tsepeletše dinaka tšeo, ka bona mo makgatheng a tšona go mela lenaka le lengwe le lenyenyane; ge lona le tšwelela, gwa kgolwa dinaka tše tharo tša tšela tša pele. Ka bona mo go lona go na le mahlo a e kego ke a motho, le molomo o ithetago ka tše kgolo.

₉Ya re ke sa lebeletše, gwa bewa didulo, gwa dula Motalawamabaka, wa kobo ya bošweu bja leswela, wa meriri ya go taga boka boya bja nku; sedulo sa gagwe ke kgabo ya mollo, se na le maotwana a go tuka mollo. ₁₀Noka ya mollo e hlaga pele ga gagwe; o hlankelwa ke ba dikete tše sekete. Baahlodi ba dula, mangwalo a phuthollwa.

₁₁Nna ka ema ke lebeletše se se tlogo direga ka mašata a go itheta ga lenaka lela; ka lebelela, sebata sa ba sa bolawa; mmele wa sona wa senywa, wa gafelwa go fišwa ka mollo. ₁₂Dibata tšela tše dingwe, le tšona tša amogwa maatla; gwa bewa matšatši le lebaka la bophelo bja tšona.

₁₃Ponong tšeo tša bošego ka bona go etla e mongwe ka maru a legodimo e kego, ke Morwamotho, a fihla go Motalawamabaka, a tlišwa kgauswi pele ga gagwe. ₁₄A neelwa bogoši le kgodišo le mmušo; ditšhaba ka moka le merafo le maleme ya ba bahlanka ba gagwe. Bogoši bja gagwe ke bja neng le neng, ke bjo bo sa felego; mmušo wa gagwe o ka se ke wa senyega.

₁₅Nna Daniele ka ferehlega pelo ke tšhogile ka dipono tšeo ke di bonego. ₁₆Ka batamela go yo mongwe wa ba ba emego fao, ka mo kgopela ka re a ntlhathollele therešo ya dilo tšeo. A bolela le nna a ntlhathollela, ₁₇A re: Dibata tšeo tše kgolo tše nne ke dikgoši tše nne tše di tlogo tsoga lefaseng. ₁₈Fela, ba ba tlogo fiwa mmušo ke ba bakgethwa ba Yogodimodimo; mmušo e tlo ba wa bona go ya go ile le mehleng ya neng le neng.

₁₉Nna ka nyaka tlhathollo ya sebata sa bone, se e bego e le sa mohuta o šele, se sa swane le tšela tše dingwe, se bego se šiiša gagolo, sa meno a tshipi, sa marofa a mphiri, se se bego se eja se hlahuna, maratha sa gatakela ka maoto. ₂₀Le tlhathollo ya dinaka tše lesome tše di bego di le hlogong ya sona, le lenaka le lengwe leo la go tšwa, leo dinaka tše tharo tša nago tša kgolwa pele ga lona; ke ra lenaka leo le bego le na le mahlo le molomo wa dipolelo tša go itheta, le le bego le bonala eke le feta tšela tše dingwe.

₂₁Ke be ke bone ge lenaka leo le elwa le ba bakgethwa, le ba fenya. ₂₂Gwa ba gwa fihla yena Motalawamabaka, gwa emelwa ba bakgethwa ba Yogodimodimo, gwa fihla lebaka leo bakgethwa ba newago mmušo ka lona.

₂₃A bolela a re: Sebata sa bone e tlo ba mmušo wa bone lefaseng, mmušo o sa swanego le mebušo e mengwe ka moka, o tlo ja lefase ka moka wa le gatakela wa le senyaka. ₂₄Dinaka tšela tše lesome ke dikgoši tše lesome tše di tlogo tšwelela mmušong woo. Di tlo latelwa ke kgoši ye nngwe, e tlogo ba ya mohuta o šele, e sa swanego le tšela tša pele; yona e tlo kokobetša dikgoši tše tharo. ₂₅Yona e tlo bola maitheto a go rumola Yogodimodimo; e tlo leka go phekgola mabaka le melao; tšona di tlo gafelwa diatleng tša yona lebaka le tee, le mabaka a mabedi, le seripa sa lebaka. ₂₆Fela, Baahlodi ba tlo dula; gomme kgoši yeo e tlo amogwa bogoši, bja fedišwa ya ba moka. ₂₇Ke mo setšhaba sa bakgethwa ba Yogodimodimo se tlogo fiwa mmušo le bogoši le maatla a go buša mebušo ka moka ka tlase ga legodimo. Mmušo wa gagwe ke mmušo wo o sa felego; mme mebušo ka moka e tlo loba yena ya mo hlankela.

₂₈Taodišo ya felela moo. Nna Daniele megopolo ya ka ya mpherehla, le sefahlogo sa ka sa ema ka lešele. Ditaba tšona ka dula ke di bolokile mo pelong.