Moshe o akaretša ditaba tša leeto la mo mašokeng
1Šedi dipolelo tše Moshe a di boletšego le Baisiraele ka moka a le mošola wa Jorodane lešokeng molaleng o bataganego le Sufa, mo gare ga Parana le Thofele le Labana le Hatserothe le Disahaba. 2Go tloga Horebe go fihla Kadese-Baranea ka tsela ya dithaba tša Seire ke leeto la matšatši a lesome le motšo o tee. 3E be e le ka la pele la kgwedi ya lesome le motšo o tee ya ngwaga wa masome a mane, ge Moshe a anegela Baisiraele tšohle tše Morena a mo laetšego go ba botša. 4Ke mola a šetše a fentše Sihoni kgoši ya Baamoro e a bego a agile Hesiboni, le Ogo kgoši ya Basani e a bego a agile Asitherothe kua Edirei. 5Gona moo mošola wa Jorodane nageng ya Moaba ke mo Moshe a thomilego go hlatholla Molao, a re:
6Morena Modimo wa rena o boletše le rena kua thabeng ya Horebe a re: Le feditše lebaka le dutše fa thabeng ye. 7Hlahlamologang le khudugeng le ye dithabeng tša Baamori le ba ba bapetšego le bona molaleng le dithabeng le magoleng a ka thoko ya borwa, le khwiting ya lewatle nageng ya Bakanana, le Libanoni, le yo goma ka noka e kgolo, noka ya Forate. 8Tsebang gore naga yeo e lego pele ga lena ke le neile yona; yang ge le tšee naga yeo Morena a enetšego botataweno Aborahama le Isaka le Jakobo, a re o tlo e nea bona le bana ba bona ba mehla e tlago.
9Mehleng yela ke le boditše ka re: Nka se ke ka kgona go le rwala ke nnoši. 10Morena Modimo wa lena o le atišitše; šedi, le bjale le etša dinaledi ka boati. 11Mme Morena Modimo wa botataweno a a iše pele a le atiše, palo ya lena e ntšifale gasekete, a le šegofatše bjalo ka ge a le boditše. 12Bjale nka rwala bjang ditapišo tša lena, le merwalo ya lena, le dikgang tša lena ke nnoši? 13Ka re: Hlaolang mo melokong ya lena banna ba bohlale le tlhaologanyo le temogo, gore ke ba bee e be bagolo ba lena. 14Lena la fetola la re: Ke taba e botse yeo o rego re e dire. 15Nna ka tšea bagolo ba meloko ya lena, banna bao ba bohlale le temogo, ka ba bea ya ba balaodi ba sekete le ba lekgolo le ba lesome, ya ba bahlapetši mo melokong ya lena.
16Mohla woo ka bea baahlodi ba lena ka re: Le kweng ditaba tša bana babolena, mme le ahlole ka go se hlaole motho, e ka ba wa geno goba e ka ba o šele. 17Le se ke la beba sefahlogo kahlolong; le kwe mmotlana bjalo ka ge le ekwa e mogolo; le se ke la šia sefahlogo sa motho; ka gobane kahlolo ke ya Modimo; gomme taba e kago le thatafalela, le e tliše go nna ke e kwe. 18Ka realo mehla yela, ka le laela ditaba tšohle tše le bego le swanetše go di dira.
19Ra tloga Horebe ra sepela le lešoka ka moka le legolo le le šiišago, ka mo le le bonego; ra tla ka tsela ya dithaba tša Baamori, ka mo Morena Modimo wa rena a re laetšego ka gona, ra fihla Kadese-Baranea. 20Nna ka bolela le lena ka re: Le fihlile dithabeng tša Baamori tše Morena Modimo wa rena a re filego tšona. 21Ka re: Šeowe naga ye Morena Modimo wa gago a e beilego pele ga gago. Rotoga o e tšee ka mo Morena Modimo wa botatago a go boditšego ka gona. O se boife, o se tšhoge.
22Ke mo la nago la tla go nna ka moka ga lena la re: A re romeng banna ba re ete pele, ba ba ka yago go re hlolela naga; ba boe ba re botše tsela ye re tlogo rotoga ka yona, le metse ye re tlogo tla go yona. 23Lentšu leo la nkgahla; ka hlaola banna ba lesome le metšo e mebedi mo go lena, o tee go leloko le lengwe le le lengwe. 24Banna bao ba tloga ba rotogela dithabeng, ba fihla molapong wa Esikolo, ba hlola naga. 25Ba boa ba swere dienywa tša naga yeo ba re anegela tša yona ba re: Naga yeo Morena Modimo wa rena a re fago yona ke e botse.
26Gomme lena la gana go rotoga; la nyatša se Morena Modimo wa lena a le boditšego sona. 27La tsota le le mekutwaneng ya lena la re: Morena kua Egipita o re ntšhitše ka ge a re hloile, a dira gore a re gafele diatleng tša Baamori gore ba re fediše. 28La re re rotogela kae? Banna ba borena ba ba tšhošitše dipelo tša rena ba re: go na le batho ba bagolo ba batelele, ba ba re fetago ka leemo. Metse ya bona ke e megolo, ke dibo tše di fihlago legodimong; le Baenaki re ba bone gona kua.
29Ke mo nna ke boletšego le lena ka re: Le se ke la tšhoga; le se ke la ba boifa. 30Morena Modimo wa lena, e a le etago pele o tlo le hlabanela. Tšohle tše le bonego a le direla kua Egipita, le bjale o tlo di dira. 31Le mo lešokeng le di bone Morena Modimo wa lena a le kukile bjalo ka monna ge a kuka ngwana wa gagwe. Ke tše le di bonego tseleng ka moka ye le e sepetšego la ba la fihla fa. 32Gomme lena, le ge ke itšalo. Le ganne go bota Modimo wa lena, 33yena e a le etilego pele tseleng, a tšama a le nyakela makhutšo; a le mollong bošego a le bonegela tsela ye le bego le e swere, mosegare a le lerung.
34Fela Morena o be a kwile mantšu a le a boletšego, a befelwa a re: 35Banna ba moloko o mobe wo, le o tee wa bona a ka se ke a bona naga e botse yeo ke ennego ka re ke tlo e nea botataweno. 36E a tlogo e bona ke Kalebe morwa wa Jefune; yena le bana ba gagwe, ke tlo ba fa naga yeo yena a e sepetšego; ka gobane o latetše Morena ka mokgwa o tletšego. 37Le nna Morena a mpefelelwa ka baka la lena a re: Le wena o ka se ke wa fihla gona. 38Joshua morwa wa Nuni e a go hlankelago, yena o tlo fihla. Yena mo fe maatla, ka gobane ke yena e a tlogo fihliša Baisiraele magaeng.
39Le bana ba lena ba ba nyenyane, bao le itšego ba tlo ba mathopša, le bana ba lena bao lehono ba sešogo ba hlaologanya botse le bobe, bona ba tlo fihla gona; ke tlo e nea bona ya ba ya bona. 40Gomme lena gomang, le boele lešokeng ka tsela ya Lewatle la Mahlaka.
41Lena la fetola la re: Re rumotše Morena! A re rotogeng re hlabana ka mo Morena Modimo wa rena a re laetšego ka gona. La itlhama, monna a swara dibetša tša gagwe, la leka go rotogela dithabeng.
42Nna Morena a mpotša a re: Bolela le bona o re: Le se rotoge le se yo hlabana, ka gobane nna nka se ke ka ba le lena. 43Nna ka le botša, mme la gana go kwa; la ganetša molomo wa Morena; la dira ka mahlahlo la rotogela dithabeng. 44Gomme Baamori ba ba bego ba agile dithabeng tšeo ba tšwa, la gahlana, ba le šwahlela bjalo ka motšhitšhi wa dinose, ba le rothotha ba le fihliša Seire le Horoma. 45La boa la llela Morena; Morena a gana go le kwa; a se ke a le sekegela tsebe. 46La fetša matšatši a mantši le dutše Kadese, ona ala a le a feditšego le dutše gona.
