DOITERONOMIO 22

₁Ge o ka bona kgomo ya wa geno, le ge e le nku ya gagwe, e timetše, o se ke wa e šikologa; e bušetše go wa geno. ₂Ge wa geno a se kgauswi, goba o sa mo tsebe, gona o e gapele ga geno; e dule ga geno go fihla ge wa geno a e tsoma, wa kgona go e boetša go yena. ₃Le ge e ka ba pokolo ya gagwe o e dire ka mokgwa woo; le ge e ka ba kobo ya gagwe, tšohle tše ngwaneno a kago lahlegelwa ke tšona, ge o ka di bona o se ke wa di šikologa.

₄Ge o ka bona pokolo ya wa geno, le ge e le pholo ya gagwe e wile tseleng, o se ke wa e šikologa; o swariše wa geno go e tsoša.

₅Seaparo sa monna se se ke sa aparwa ke mosadi; le gona monna a se ke a apara seaparo sa mosadi; ka gobane ge go ka dirwa tše bjalo e ka ba makgapha pele ga Morena Modimo wa lena.

₆Ge o ka hwetša sehlaga sa nonyana o le tseleng se le sehlareng goba fase, se na le mafotwana goba mae, gomme mmao a alametše mafotwana ao goba mae ao, gona o se ke wa swara mmao gotee le mafotwana. ₇Lesa mmao e fofe, o tšee mafotwana; gore o be le mahlatse o phele galelele.

₈Ge o aga ngwako o mofsa, gona lapa la ka hlakeng o le agele lefawana, gore ngwako wa gago o se o obele molato wa madi, ge motho a ka kodumela fase a le godimo ga wona.

₉Mo serapeng sa gago sa merara o se ke wa bjala peu ya mehuta e mebedi ya dihlare; gore dienywa tša tšona le dienywa tša merara e se tlo ba seila.

₁₀O se ke wa tlema pholo le pokolo gotee wa lema ka tšona.

₁₁O se ke wa apara kobo ye e rego ge e logwa gwa hlakangwa boya bja nku le leokodi.

₁₂Mo dintlheng tše nne tša kobo ye o e aparago o rokele matobolo.

₁₃Ge motho a tšere mosadi a mmeka, gomme a thoma go mo nyatša, ₁₄a fo mmolela ka tše mpe, a senya leina la gagwe, a re: Mosadi yo ke mo tšerego ke mo hweditše e se kgarebe, ₁₅gona tatago mosetsana le mmagwe ba tšee bohlatse bja bokgarebe bja mosetsana yo ba bo ntšhetše kgorong go ba bagolo ba motse. ₁₆Tatago mosetsana a botše ba bagolo a re: Monna e ke mo neetše morwedi wa ka a ba mosadi wa gagwe; fela, o a mo nyatša. ₁₇O fo mmolela ka tše mpe a re: Morwedi wa gago ke mo hweditše e se kgarebe! Bjalo bohlatse bja bokgarebe bja morwedi wa ka šebo. A a realo, mme a phutholle kobo pela ga bagolo ba motse. ₁₈Ke mo bagolo ba motse ba tlogo swara monna eo ba mo otla. ₁₉Ba mo lefiše ka sekele tše lekgolo, ba di nee tatago mosetsana, ka gobane a gobošitše leina la mosetsana wa Isiraele. Gomme mosetsana eo e tlo ba mosadi wa gagwe; a ka se ke a kgona go mo hlala bophelong bja gagwe ka moka.

₂₀Fela, ge taba yeo e ka ba therešo ya gore mosetsana eo a hweditšwe a se kgarebe, ₂₁gona ba mo ntšhetše mojakong wa ngwako wa tatagwe, gomme banna ba motse wa gabo ba mo thume ka maswika a hwe; ka gobane a dirile tše dihlong mo go Isiraele ka go dira bootswa a le lapeng la tatagwe. Ka mokgwa o bjalo le fediše bobe ga geno.

₂₂Ge monna a ka hwetšwa a robetše le mosadi e a tšerwego ke monna e mongwe, gona ba bolawe bobedi bja bona, monna eo a robetšego le mosadi, le mosadi yo. Bobe mo go Isiraele bo fedišwe ka mokgwa o bjalo.

₂₃Ge mosetsana e lego kgarebe e beeleditšwego ke monna, a ka hwetšwa ke monna mme a robala le yena, ₂₄bobedi bja bona le ba ntšhetše ntle ga kgoro ya motse, le ba thume ka maswika ba hwe; mosetsana a bolawe ka gobane a sa ka a hlaba mokgoši motseng; monna a bolawe ka gobane a gobošitše mosadi wa wa gabo. Bobe ga geno le bo fediše ka mokgwa woo.

₂₅Ge monna a ka kwetša mothepana nageng, e le e a beeleditšwego, gomme a mo kata a mo senya, gona go bolawe monna yo a nnoši e a sentšego ngwana eo. ₂₆Mothepana le se ke la mo dira selo, gobane go yena ga go molato wo a kago bolawa ka baka la wona; taba ye e swana le ya monna e a kago tsogela wa gabo a mmolaya; ₂₇gobane o mo hweditše nageng; gomme le ge mosetsana a ka be a hlabile mokgoši, a ka be a sa ka a hlakodišwa ke motho.

₂₈Ge monna a ka hwetša mosetsana wa kgarebe e sešogo ya beeletšwa ke monna, a mo swara a robala nae, mme a bonwa, ₂₉gona monna eo a robetšego nae a nee tatago mosetsana sekele tše masome a mahlano, mme e tlo ba mosadi wa gagwe, ka gobane a mo gobošitše; gomme a se ke a mo hlala bophelong bja gagwe ka moka.

₃₀Monna a se ke a tšea mosadi wa tatagwe; a se ke a phamola kobo ya tatagwe.