DOITERONOMIO 28

₁Ge o tiiša go theetša se Morena Modimo wa gago a se boletšego, wa hlokomela le ditaelo tša gagwe ka moka tše ke go anegelago tšona lehono, wa dira ka mo di bolelago ka gona, ke gona Morena Modimo wa gago a tlogo go šetša go fetiša ditšhaba ka moka tša lefase. ₂Tše di tlogo go tlela ke ditšhegofatšo tše ka moka. Di tlo go fihlela ge o theetša se Morena Modimo wa gago a se boletšego.

₃O tlo ba mošegofatšwa mo motseng, mošegofatšwa mašemong.

₄Go tlo šegofatšwa kenyo ya mmele wa gago, le kenyo ya naga ya gago, le kenyo ya kgomo tša gago ge di go alolela merole, le merole ya dihuswane tša gago.

₅Go tlo šegofatšwa seroto sa gago le moruswi wa gago.

₆O tlo šegofatšwa ge o tsena; o tlo šegofatšwa ge o etšwa.

₇Manaba a gago, le ba ba go tsogelago, Morena o tlo ba gafela diatleng tša gago ba fenywa ge o fihla. Ge ba go šwahlela ka tsela e tee, ge o fihla ba tlo tšhaba ka ditsela tše šupago.

₈Morena o tlo roma tšhegofatšo ya go tlela dišegong tša gago le mo medirong yohle ya diatla tša gago. Morena Modimo wa gago o tlo go šegofatša o le mo nageng ye a go fago yona.

₉Morena o tlo go tiiša wa ba setšhaba sa gagwe se sekgethwa bjalo ka ge a go enetše; o tlo dira bjalo ge o hlokomela ditaelo tša gagwe, wa swara ka tsela ya gagwe, Yena Morena Modimo wa gago. ₁₀Ke mo ditšhaba tšohle tša lefase di tlogo bona gobane leina la Morena le kwala mo go lena; gomme ba tlo le boifa. ₁₁Morena o tlo go humiša ka tše di tswalwago lapeng le šakeng le tšhemong, o le mo nageng ye Morena Modimo wa gago a enetšego botatago a re o tlo ba fa yona. ₁₂Morena o tlo go bulela mahumo a gagwe a mabotse a legodimo, a nešetša naga ya gago pula ka lebaka la gona; o tlo go šegofatša medirong ka moka ya diatla tša gago. O tlo adima ditšhaba tše ntši; fela wena o ka se ke wa adingwa. ₁₃Morena Modimo wa gago o tlo go bea wa ba wa pele, e sego wa morago, wa ba wa godimo, e sego wa tlase, ge o ka hlokomela ditaelo tša Morena Modimo wa gago, tše a go laetšego tšona lehono a re o dire ka tšona, ₁₄ge o sa tlogele mantšu a ke go anegelago ona lehono, o sa fapogele go le letona le ge e le go la ntsogošo, o se latele medimo e šele wa e direla.

₁₅Fela, ge o sa theetše se Morena Modimo wa gago a se bolelago, o sa hlokomele wa lesa go dira ka ditaelo le ka melao, ye ke go anegelago yona lehono, gona o tlo tlelwa ke tšohle tša dithogo tšela.

₁₆O tlo ba morogwa motseng, morogwa mašemong; ₁₇gwa rogwa seroto sa gago le moruswi wa gago;

₁₈gwa rogwa kenyo ya mmele wa gago, le kenyo ya tšhemo ya gago, le go alolelwa ga merole ya dikgomo le ya dihuswane tša gago.

₁₉O tlo ba morogwa ge o tsena; o tlo ba morogwa ge o tšwa.

₂₀Morena o tlo roma thogo ya go tlela e le kgakanego le madimabe mo go tšohle tše o tlogo di dira, wa fela, wa senyega ka pela ka baka la bobe bja mediro ya gago ya ge o ntahlile. ₂₁Morena o tlo lesa dinkhu tša go kgomarela, tša ba tša go fediša mo nageng ye wa go e tšea. ₂₂Morena o tlo go otla ka bokoka, le ka letadi, le ka bolwetši bja madi le bja teng, le ka komelelo, le ka mollo, le ka phori, le ka megwelema; di tlo go wela wa ba wa felela. ₂₃Gomme leratadima le tlo go akarela le thatafetše wa mphiri, lefase le o le gatago le tlo etša tshipi. ₂₄Bakeng sa pula Morena o tlo nea naga ya gago lerole le leretha; di tlo go wela di etšwa godimo wa ba wa fedišwa.

₂₅Morena o tlo go gafela diatleng tša manaba a gago wa bolawa. O tlo tšwa dira ka tsela e tee, wa rakwa wa boa ka ditsela tše šupago. O tlo ba setšhošo mebušong ka moka ya lefase. ₂₆Ditoto tša ba geno e tlo ba dijo tša dinong ka moka tša legodimo le tša dibata tša naga, go se e a kago di raka. ₂₇Morena o tlo go otla ka dišo tša Egipita, le ka sekobonyane, le ka lephera, le ka lekhwekhwe, wa hloka moreku. ₂₈Morena o tlo go otla ka bogafa, le ka bofofu, le ka kgakanego ya pelo. ₂₉O tlo phapharega mosegare o mogolo bjalo ka sefofu ge se phapharega leswiswing; o ka se ke wa letlega ditseleng tša gago; o tlo fela o katwa o hlakolwa ka mehla, wa hloka monamodi.

₃₀O tlo beeletša mosadi, a napa a bekwa ke e mongwe; o tlo aga ngwako, wa se dule go wona; o tlo lema serapa sa merara, sa se ke sa hola wena. ₃₁Pholo ya gago e tlo hlabja o lebeletše, wa tingwa nama ya yona; o tlo amogiwa pokolo ya gago o lebeletše, mme ya se ke ya boela go wena; dihuswane tša gago di tlo newa manaba a gago, wa hloka monamodi. ₃₂Barwa ba gago le barwedi ba gago ba tlo thopša ke setšhaba se šele, mahlo a gago a lebeletše, a hubala ka baka la bona, o sa kgone go ba lwela. ₃₃Dikenyo tša naga ya gago, le tša boitapišo bja gago di tlo lewa ke ba o sa ba tsebego, wa fela o katwa o hlohlwa. ₃₄O tlo hlakana hlogo ka tše mahlo a gago a tlogo di bona. ₃₅Morena o tlo go otla ka dišo tše mpe tša mo matolong le mehlahung, tše di sa folego, go tloga dinaong go fihla phogong.

₃₆Morena o tlo go iša setšhabeng se o sa se tsebego, se botatago ba bego ba sa se tsebe. Le kgoši, ye o tlo go ipeela yona e tlo išwa ntshe, la yo direla medimo e šele ya dikota le ya matlapa. ₃₇Ditšhabeng ka moka tše Morena a tlo go go iša go tšona o tlo ba sehlaswiwa, le sekwerwa, le serogwa.

₃₈Mo tšhemong o tlo bjala peu e ntši, wa buna tše di sego nene, ka gobane di tlo lewa ke tšie. ₃₉O tlo šema merara wa e hlagolela; mananose a yona o ka se ke wa a nwa, le dienywa o ka se ke wa di ja; ka gobane e tlo lewa ke diboko. ₄₀Naga ka moka ya gago e tlo tlala mehlware, wena wa hloka go tlola mahura a yona; ka gobane tlhware tša gago di tlo hlohlorego e sa le matata. ₄₁O tlo ba le barwa le barwedi; fela, e ka se ke ya ba ba gago, gobane ba tlo ya bothopša. ₄₂Dihlare ka moka tša gago le dikenywa tša naga ya gago e tlo ba nkgwa ya diji tše di senyago.

₄₃Modiiledi wa ga geno o tlo go feta ka bogolo, mme wena wa nyatšega o eya. ₄₄O tlo go adima wena wa se ke wa mo adima; yena o tlo ba hlogo, mme wena o tlo ba mosela.

₄₅Dithogo tše ka moka di tlo go wela tša go latela, tša go swara, wa ba wa felela, ge o sa theetše se Morena Modimo wa gago a se boletšego ge a re o hlokomele ditaelo tša gagwe le melao ya gagwe ye a go laetšego yona. ₄₆Di tlo go kgomarela le bana ba gago e le leswao le matete ka go sa felego. ₄₇Molato e tlo ba ge o sa ka wa direla Morena Modimo wa gago ka thabo le ka pelo e wilego mola o sa atetšwe ke tše botse. ₄₈Manaba a gago, a Morena a tlo go a roma, o tlo a direla ka tlala le ka lenyora le ka tšhego, o šikere joko ya tshipi molaleng wa gago, a ba a go fediša. ₄₉Morena o tlo go tlišetša setšhaba sa kgole magomong a lefase; se tlo go wela bjalo ka lenong le le kgoulogilego, setšhaba se o sa kwego polelo ya sona, ₅₀setšhaba sa difahlogo tše di thata, se se sa šetšego mokgalabje, se se sa gaugelego lesogana. ₅₁Se tlo ja mabotlana a dikgomo tša gago, le dikenywa tša naga ya gago, wa ba wa felela. Se ka se ke sa go šadišetša mabele, le mananose, le mahura, le merole ya dikgomo tša gago le mehlape ya dihuswane tša gago, sa ba sa go fediša. ₅₂Se tlo go tlaletša dikgorong tša gago ka moka; merako ya gago e megolo e tiilego, ye o e botilego, e tlo ba ya wa mo nageng ka moka ya gago, o rakeleditšwe metseng ya gago yohle mo nageng ya gago ka moka ye Morena Modimo wa gago a go neilego yona.

₅₃Mohla woo o gakanegile o tlaleditšwe ke manaba a gago, o tlo ba wa ja bana ba gago, nama ya barwa ba gago le ya barwedi ba gago, ba Morena Modimo wa gago a tlogo ba a go file. ₅₄Le monna wa geno wa setswatswa wa sekgwari o tlo ba a gerula ngwanabo le mosadi mamoratwe, le bana ba gagwe ba ba mo šaletšego, ₅₅a ba kuna nama ya bana ba gagwe ba a ba jago, ka gobane o tlo ba a se na se se mo šaletšego pitlaganong le tlalelong ya mohla o rakeletšwe ke manaba a gago dikgorong tša gago tšohle. ₅₆Le mosadi wa geno wa setswatswa wa sekgwari, yo nao tša gagwe di sa gatego fase a itirile sekgwari le setswatswa, leihlo la gagwe le tlo gerula monna moratwa wa gagwe, le morwa wa gagwe, le morwedi wa gagwe, ₅₇a ba kuna sa nthago se se tšwilego mmeleng wa gagwe, a ba kuna bana ba a ba belegego, ka gobane o tlo ba ja a utame ka go felelwa pitlaganyong le tlalelong ya mohla o rakeletšwe ke manaba a gago dikgorong ša gago tšohle.

₅₈Ge o sa hlokomele mantšu ka moka le melao ye e ngwadilwego pukung ye, wa lesa go dira ka yona o sa boife leina leretwa le, le le tšhabegago la Morena Modimo wa gago, ₅₉gona Morena o tlo go hlolela dikotsi, dikotsi tše kgolo di sa felego, le malwetši a mabe a sa folego, a tlela wena le bana ba gago. ₆₀O tlo go tlišetša malwetši a mašoro ka moka a Egipita, a o a tšhabilego, mme a tlo go kgomarela. ₆₁Le malwetši a mehutahuta, le dikotlo tša mehutahuta, tše di sa ngwalwago pukung ye ya melao, le tšona Morena o tlo di tliša godimo ga gago, o be o tle o fedišwe. ₆₂Le tlo šadišwa le le batho ba sego nene, mola le kile la ba ba bantši bjalo ka dinaledi tša legodimo, ka gobane o sa ka wa theetša se Morena Modimo wa gago a se boletšego. ₆₃Ka gobane bjalo ka ge Morena mehleng yeno a kgahlwa ke go le thakga le go le atiša, mehleng yeo o tlo kgahlwa ke go le senya le go le fediša, a le gogola mo nageng ye le yago go e tšea.

₆₄Morena o tlo le tšitlanya ditšhabeng ka moka go fihla magomong a lefase. Le le kua le tlo direla medimo e šele ya dikwata le ya matlapa, ye lena le botataweno le sa e tsebego. ₆₅Gomme mo ditšhabeng tšeo o tlo hloka leago; lenao la gago le tlo hloka makhutšo, ka gobane Morena Modimo wa gago o tlo go hlolela pelo e roromelago, le mahlo a gohlometšego, le moya o boi. ₆₆O tlo dula o lebane le lehu; o tlo tšhoga bošego le mosegare; o ka se dule o holofetše. ₆₇Ge letšatši le hlaba o tlo re: Le ka be le dikela! Ge le dikela o tlo re: Le ka be le hlaba ka baka la boi bja pelo ya gago ge e tšhogile, ka baka la tše mahlo a gago a tlogo di bona. ₆₈Gomme Morena o tlo go bušetša Egipita ka dikepe, ka tsela ye ke go boditšego ka re: O ka se ke wa hlwa o sa e bona. Gona kua le tlo ithekiša la re le be balata ba banna le ba basadi, balata ba manaba a lena; gomme le tlo hloka e a kago le reka.