Sereto sa Morena Mong wa setšhaba sa Isiraele
1Hee Legodimo! Hlwaya tsebe ke bolele.
Hee Lefase! Kwaa polelo tša molomo wa ka.
2Thuto ya ka e tla etša pula go na.
Thero ya ka e tla etša phoka go enela;
e tla ka modupi mabjanyeng;
e tla ka tsheola mo hlageng.
3Gobane ke reta ina la Morena.
Modimo wa rena mo tlišetšeng kgodišo.
4Ke yena Lentšwe, yo tirophethegi,
ka ge tsela tsagwe tšohle di lokile,
Yena Modimo wa therešo, Moilabokgopo,
Moloki, Yena Mosiami.
5Ba e sego bana bagwe ka ditšhila ba a mmeka,
ke thaka ya mereba le ya lonya.
6Wena setšhaba sa bošilo, sehlokatlhaloganyo,
a ke gona go leboga yena Morena?
A ga se yena Tatago, Mongagago?
A ga wa ka wa dirwa wa tsengwa ke yena?
7Gopola mehla ya bogologolo;
hlaloganya nywaga ya melokoloko;
botšiša tatago a go hlathollele;
ba bagolo beno ba go anegele.
8Mola Yogodimodimo a nea ditšhaba magae,
mola a aroganya bana ba batho,
o beetše merafo mellwane,
a ya ka palo ya bana ba Isiraele.
9Gobane Morena o itlhaoletše tšhaba sa gagwe;
karolo ya gagwe, leruo la gagwe ke Jakobo.
10O mmone šakong, lešokeng,
la hanata la meroro ya masodi;
a mo ageletša, a mo hlokomela,
a mo šireletša wa ntaka ya ihlo.
11A etša lenong, lefofiša-mafotwana,
ge le akarela ngwana lona,
la phurolola phego la mo kuka,
la mo rwala ka diphofa.
12Morena a realo, a ba etetša;
modimo o šele wa hlokwa go bona.
13A ba nametša meboto ya naga,
a ba leša kenyo tša melala,
a ba nweša nose tša magaga,
makhura matšwalwaleng le lethata,
14le maswi a dikgomo, se sethobe sa dipudi,
le makhura a dikwana,
le dikgapa tša Basani, le diphoko,
le wona moko wa mabele,
le todi ya morara, mananose mafufula.
15Jeshuruni a nona, a raga;
ka kgonthe wa nona, wa rena, wa ikwa,
wa lahla Modimo Mohlodi wa gago.
O nyaditše Lentšwe la go phologela.
16Ba mo galefiša ka tše šele;
ba mmefediša ka matšopša.
17Didimo ba di iša go badimo,
e sego go Modimo,
go medimo ye ba bego ba sa e tsebe,
e mefsa metšwakgauswi,
ye botataweno ba bego ba sa e tsebe.
18Wa gakwa ke
lentšwe le le go tswetšego,
wa lebala Modimo Motswadi wa gago.
19Morena a di bona a ba lahla,
a hlaswa barwa le barwedi.
20A re: Ke ba utela sefahlogo,
ke bone pheletšo.
Ka kgonthe ke mohuta wa dihlola, ke bana ba go se botege.
21Ba nthumola ka se e sego Modimo,
ba ntlhohla ka tša bošilo bja bona.
A nke le nna ke ba rumole ka se e sego setšhaba,
ke ba hlohle ka setšhaba sa bošilo.
22Ka gobane bogale bja ka bo gotetša mollo;
o tlo tuka wa fihla kua bodula bahu tlasetlase,
o tlo fiša naga le dikenyo,
o tlo tšhuma le metheo ya dithaba.
23Ke tlo ba enetša mabošula,
ke feletše mesebe ya ka mo go bona.
24Ba šetše ba otile ka tlala,
ba llwe ke dinkhu,
ke masetlapelo a dikotsi,
ke mo ke tlogo roma meno a dibata
le bohloko bja kgagabaleroleng.
25Tšhoša e tlo fetša bana kua ntle;
monywakong ba tlo fela ka go tšhoga,
masogana gotee le methepa,
le masea, le ba hlogoputswa.
26Nka re, ke ba thosanye,
ke fediše maina a bona bathong;
27ge nka be ke sa šie go nyenywa ke manaba,
ge bahloi ba bona ba tlo aketša,
ba re: Go kgonne atla sa rena!
Ba se sa re: Di dirilwe tšohle ke Morena!
28Batho bao ke basenyi ba morero;
ba hloka tlhaloganyo.
29Ge ba ka be ba na le bohlale ba ka be ba lemoga,
ba hlokomela tša pheletšo.
30O tee a ka raka bjang sekete?
Babedi ba ka gapa bjang diketekete?
A ga se ka ge ba hlala Lentšwe la bona?
A ga se ka ge Morena a ba lahleditše?
31Ke ka gobane Lentšwe la rena le šola;
Le manaba a rena a ka se sa ganetša.
32Gobane morara wa bona o etša wa Sodoma;
ke wa dirapa tša Gomora.
Dikenyo tša bona ke kenyo tša selešo,
tša thokolwana tše di galakago.
33Todi ya bona ke mare a noga, ke bohloko bja sehlogo sa mokopa.
34Tše bjalo nka se di lebale,
ke di tswaleletše, ka boloka.
35Tefetšo ke ya ka, le kotlo ke ya ka,
mohla go thedimoga 'nao la bona.
Tšatši la bona la go loba le kgauswi;
tša go ba wela di a belola.
36Morena setšhaba sa gagwe o tlo se lwela;
o kwela balata ba gagwe bohloko;
gobane o bona go keba matsogo,
go se sa na mohlanka le morena.
37O tla re: E kae medimo ya bona,
mantswe a ba bego ba a bota?
38ye e bego e eja makhura a dimo tša bona,
e enwa morara wa bego tša bona? --
A e tsoge e le namolele!
A e eme e le šireletše!
39Bjale tsebang, ke nna NNA!
Ga go modimo ge e se nna!
Go hwa le go phela, ke nna ke di dirago;
ke e gobatše, ka buša ke rekola.
Ge nka swara, ga go sa na monamoledi.
40Ke emišetša atla sa ka kua godimo,
ka ena ka nna Mophelakagosefele,
41-42ke re: Ke looditše kgadigadi ya lerumo la ka;
madi a babolawa le a bathopša,
a dihlogo tša marena a manaba.
43Hee lena ditšhaba! Hlalalang le tšhaba sa gagwe!
Gobane o tlo lata madi a bahlanka bagwe,
a otla ba ba mmekilego;
Mme naga ya gagwe, batho ba gagwe o ba direla poelanyo.
44Mantšu ka moka a sefela se Moshe o ile a a boelela a na le Hosea morwa wa Nuni, setšhaba se theeditše.
45A ba a fetša go bolela le Baisiraele ka moka mantšu ao ka moka. 46A kgona a re: Le se ke la ba la lebala mantšu a ka moka a ke le filego ona gore e be bohlatse bjo le tlogo bo anegela bana ba lena, gore ba a hlokomele, ba dire tšohle tše di bolelwago ke molao wo. 47Gobane ga se lentšu le le ka rego ke la lefela; ke bjona bophelo bja lena; ka lona lentšu le le tlo lelefatša bophelo bja lena, le le mo nageng ye le selago noka ya Jorodane la ya go e tšea.
48Ka lona tšatši leo Morena o boditše Moshe a re: 49Namela thabeng ye ya Abarimi, thabeng ya Nebo, e lego nageng ya Moaba, e lebanego le motse wa Jeriko, o bone naga ya Kanana, ye ke e fago Baisiraele, gore e be ya bona. 50Ke mo o tlogo hwela thabeng yeo o e nametšego wa gorošetšwa go ba geno, bjalo ka Arone ngwaneno ge a hwetše thabeng ya Horo, a gorošetšwa go ba geno. 51Ke ka ge le sa ka la mpotegela le na le Baisiraele kua meetseng a Meriba, kua Kadese lešokeng la Tsini, le sa ka la ntira Mokgethwa mo go Baisiraele. 52Ka gobane naga yeo ke e fago Baisiraele, ke itše o tlo e bona o lebane nayo; fela, o ka se ke wa tsena go yona.
