DOITERONOMIO 34

₁Bjale Moshe a tloga gona moo molaleng wa Moaba, a namela thaba ya Nebo, sehlweng sa thaba ya Pisiga ye e lebanego le motse wa Jeriko; mme Morena a mmontšha naga ka moka ya Gileada le ya Dani, ₂le ya Nafutali ka moka, le ya Efuraimi, le ya Manase, le naga ka moka ya Juda go iša lewatleng la bodikela, ₃le naga ya thoko ya borwa, le molala wa legola la Jeriko motse wa melala, go fihla Tsoare. ₄Morena a bolela le yena a re: Ke yona naga ye ke e enetšego Aborahama le Isaka le Jakobo, ka re ke tlo e nea bona le bana ba bona; ke go bontšhitše wa e bona ka mahlo; fela, o ka se ke wa tsena go yona.

₅Gomme Moshe mohlanka wa Morena a hwela gona moo nageng ya Moaba ka mo Morena a mmoditšego ka gona. ₆A mo fihla mo nageng ya Moaba e lebanego le Bethepeoro; fela, lebitla la gagwe le lehono ga le tsebje ke motho. ₇Moshe ge a ehwa o be a na le nywaga e lekgolo le masome a mabedi; mme mahlo a gagwe a be a sešo a fifala; le maatla a gagwe a be a sešo a fela.

₈Baisiraele ba mo llela gona moo molaleng wa Moaba ba fetša matšatši a masome a mararo; matšatši a go hloboga Moshe a phethega.

₉Joshua morwa wa Nuni o be a tletše moya wa bohlale, ka gobane Moshe o be a mmeile diatla; Baisiraele ka moka ba mo kwa, ba dira ka mo Morena a laetšego Moshe.

₁₀Gomme mo go Isiraele ga go a hlwa gwa tsoga moporofeta yo bjalo ka Moshe, yo Morena a mo tsebilego ka go lebanya difahlogo nae, ₁₁le ka matete le mehlolo yohle, ye Morena a mo romilego a e dira nageng ya Egipita go Farao, le go bahlanka ba gagwe bohle, le nageng ya gagwe ka moka, ₁₂le ka seatla se maatla ka moka, le ka ditlaba ka moka tše kgolo, tše Moshe a di dirilego mme tša bonwa ke Baisiraele bohle.