Baisiraele ba tsebe dikgaugelo tša Morena tša mehleng
1Isiraele, theetša; o tlo tloga o sela noka ya Jorodane, wa yo fenya ditšhaba tše kgolo tše di go fetago ka maatla, le metse e megolo e fihlago legodimong. 2Setšhaba se segolo sa leemo le letelele ke Baenaki ba o ba tsebago, ba o kwilego ge ba bolelwa ba thwe: Ke mang e a kago gahlana le Baenaki! 3Bjale o tlo lemoga gore Morena Modimo wa gago e a yogo sela a go etile pele, ke mollo o fišago; yena o tlo ba thuba, a ba kokobetša pele ga gago, a ba raka, wa tlo ba fediša ka pela, bjalo ka ge Morena a go boditše.
4Ge Morena Modimo wa gago a ba šwalalanya ge o fihla, o se ke wa bolela ka pelong wa re: Morena o ntlišitše fa ka tšea naga ye ka ge ke lokile, gomme ditšhaba tše, ge ke fihla, o di raka ka baka la bohlola bja tšona. 5Ga se ka baka la bothakga bja gago, goba ka baka la go loka ga pelo ya gago, ge o yo tšea dinaga tša bona. Morena Modimo wa gago, ditšhaba tšeo o di raka ge o fihla ka baka la bohlola bja tšona, le gore a phethe lentšu le a le enetšego botataweno Aborahama le Isaka le Jakobo. 6O tsebe gee gore Morena Modimo wa gago ga a go nee naga e botse ye gore e be ya gago ka baka la go loka ga gago; ka gobane o setšhaba sa melala e methata.
7O tsebe, mme o se ke wa ba wa lebala, gobane o rumotše Morena Modimo wa gago kua lešokeng. Go tloga mola o khuduga nageng ya Egipita go fihla ge le tsena felo fa, le be le le ba go ngangana le Morena. 8Gona kua thabeng ya Horebe ke mo le kilego la befediša Morena, a le tukela bogale wa go re a le fediše. 9Ke mola nna ke nametše kua thabeng go yo amogela matlapa a kgwerano ye Morena a e dirilego le lena, ka fetša matšatši a masome a mane le mašego a ona ke dutše thabeng, ke sa je bogobe, ke sa nwe meetse. 10Morena a nneela matlapa a mabedi ao a bego a ngwadilwe ka mono wa Modimo, a na le mantšu ka moka ala a Morena a le boditšego ona a le thabeng gare ga mollo mohla wola wa phuthego. 11Ge go fedile matšatši a masome a mane le mašego a ona, Morena a nneela matlapa a mabedi ao, matlapa a kgwerano.
12Morena a ntaela a re: Nanoga, o fologe ka pela, gobane setšhaba sa gago se o se ntšhitšego Egipita se sentše; ga ba diega go aroga tsela ye ke ba laetšego yona. Ba itiretše modimo wa seswantšho.
13Ke mo Morena a mpoditšego a re: Setšhaba se ke se lemogile; ke setšhaba sa melala e methata. 14Lesa ke ba fediše; ke phumole leina la bona ka mo tlase ga legodimo; gomme wena ke go dire setšhaba se segolo se se tlogo feta se ka bontši.
15Nna ka fulara ka fologa thabeng yeo e bego e tuka mollo, ke swere matlapa a mabedi ao a kgwerano ka diatla tše pedi. 16Ya re ge ke lebelela ka bona le šetše le dirile sebe pele ga Morena Modimo wa lena, le itiretše seswantšho sa namane, le sa ka la diega go aroga tsela ye Morena a le laetšego yona. 17Ka swara matlapa a mabedi ao ka diatla tše pedi, ka a lahla ka a phšatlaganya le lebeletše. 18Ka ya ka itahlela fase pele ga Morena, ka buša ka fetša matšatši a masome a mane le mašego a ona ke sa je bogobe, ke sa nwe meetse, ka baka la sebe sa lena se sekaakao se le bego le sentše ka sona, la dira bobe pele ga gagwe, la mo rumola. 19Ka gobane ke be ke tšhogile pefelo ya Morena le kgalefo ya gagwe, ye a bego a re o tlo le fediša gomme Morena a nkwa le mohla woo. 20Le Arone Morena o kile a mo tukela bogale a rata go mo senya; mme le yena Arone ka na ka mo rapelela lebakeng leo. 21Sebe sa lena seo le se dirilego, namane yeo, ka e tšea, ka e fiša ka mollo, ka e pšhatlaganya, ka e šilaganyetša ruri ya ba lerole le lesesanyane; mme lerole leo ka le tšhela nokeng e fologago thabeng.
22Le kua Thabera, le kua Masa, le kua Mabitlateta le befedišitše Morena. 23Gomme mohla wola re le kua Kadese-Baranea Morena a le roma a re: Rotogang le tšee naga ye ke le neilego yona, la ganetša, molomo wa Morena, la se ke la mmota, la se ke la theetša se a se boletšego. 24E sa le mola ke le tseba, le ba go ngangangangana le Morena.
25Ya re mola ke feditše matšatši a masome a mane le mašego a ona ke hlwa ke itahletše fase pele ga Morena, ke le bjalo ka ge Morena a itše le fedišwe, 26ka kgopela Morena ka re: Mong wa ka Morena! Se fediše setšhaba sa gago, se wena o lego Mong wa sona, se o se namoletšego ka bogolo bja gago, se o se ntšhitšego Egipita ka seatla se maatla. 27Gopola bahlanka ba gago Aborahama le Isaka le Jakobo; O se šetše bonganga bja setšhaba se, le bošaedi bja sona, le dibe tša sona; 28gore kua nageng ye o re ntšhitšego go yona ba se tlo šala ba re: Morena o paletšwe go ba fihliša kua nageng ye a bego a ba holofedišitše yona; le gona o be a ba hloya, a ba ntšhetša lešokeng gore ba hwele ntshe. 29Se ba fediše. Ke setšhaba sa gago, se wena o lego Mong wa sona, se o se khudušitšego ka maatla a gago a magolo o emišitše seatla sa gago.
