MMOLEDI 12

₁Gopola Mmopi wa gago o sa le yo mofsa, go sešo gwa fihla matšatši a mabe, go sešo gwa tla nywaga ye o tlogo re: Ga e na tše di nthabišago! ₂E tla re mola letšatši le sešo la fifala moka gotee le seedi le kgwedi le dinaledi, ge go tlo boa maru mola pula e fetile. ₃Baletangwako ge ba thothomela, banna ba maatla ge ba khokhoba, bašidi ba hloka modiro, go šetše ba se nene, go rotola baokamedi ba maroba, ₄ge go tswalelwa dimati tša mojako, ge tšhilo e sa hlwe e kwala, go tsogwa ge go lla nonyana, baopi ba dikoša ba bobile. ₅Mokonya ke ge o boifša, tsela e na le tše di šiišago, mohlare wa mokgoba o palegile matšobana; tšie ga e sa pharuma, motsefo wa senoko ga o sa kwelela. Ke tša mehla motho a eya ngwakong wa gagwe e lego wa neng le neng; baledi ba šetše ba potologa le mekgoba. ₆Manti a lehumo ga a sa hlwe a tlema; sebjana sa bohlokwa se tla tloga se senyega; moeta o tla tloga o phumega kua nokeng, sego se gohlomela sedibeng. ₇Lerole le boela fase mo le tšwago gona; moya o boela go Modimo e a o neilego motho. ₈Joo lefela la mafela! O realo Mmoledi. Tšohle ke lefela!

₉Mmoledi yo e be a le yo bohlale; le gona a ruta batho tsebo, e le moakanyi le mohlathi wa ditaba, mohlabi wa diema tše ntši. ₁₀Mmoledi yo o lekile go hwetša mantšu a rategago, a ngwala mantšu a therešo ka go loka. ₁₁Mantšu a bahlale ke magapeletši; le gona a etša dimapolo tše di kokoteletšwego felo gotee, tše di tlišitšwego ke modiši o tee.

₁₂Le gona, ngwanaka! A nke ke go eletše. Tša go ngwala mangwalo a mantši ga di fele; mme go ithuta tše ntši go lapiša mmele.

₁₃A re kweng phethego ya ditaba tšohle: Boifa Modimo, o lote taelo tša gagwe. Ke se se swanetšego batho bohle. ₁₄Gobane mediro ka moka, le dithopa tšohle, tše dibotse le tše mpe, Modimo o tlo di iša tshekong.