MMOLEDI 2

₁Mme nna pelong ya ka ka re: Eriye, ke leke go phela ka menate, o bone tše botse! Ka hwetša le tšona e le lefela. ₂Lesego ka re ke go gafa; lethabo ka re le holang? ₃Ka eleletša ka re ke babalele mmele wa ka ka sebela; ka re pelo ya ka yona e tlo ntlhahla ka bohlale; ka re ke late botlatla ke bone se se thabišago bana ba batho, se ba se dirago fa tlase ga legodimo, ge ba sa bala matšatši a phelo bja bona.

₄Ka dira mediro e megolo, ka ikagela nywako, ka itemela le dirapa, ₅ka itirela le mašemo, le a dihlare, ka šema meremelewa ya mehutahuta, ₆ka itirela matsha a meetse a go nošetša sekgwasehlogadihlare. ₇Ka reka balata ba banna le ba basadi, ka ba le bahlanka ba ba tswaletšwego motseng wa ka, ka rua mehlape ya kgomo le ya dihuswa tše ntši, ka phala bohle ba ba kilego ba ba gona pele ga ka fa Jerusalema. ₈Le gona ka ba le mahumo a tshipitshehla le khwibedu, le matlotlo a dikgoši le dinaga, ka inyakela direti le baopi, le lona lethabo la barwa ba batho, basadi ba bantši.

₉Ka ba yo mogolo, ke fela ke gola, ka phala bohle ba kilego ba ba gona pele ga ka fa Jerusalema. ₁₀Mahlo a ka ga nka ka a kuna le setee sa tše a bego a se duma, ga go lethabo le nkilego ka le tima pelo ya ka; gobane pelo ya ka e be e thabela tšohle tše ke bego ke di dira; ya ba wona moputso wa mediro ya ka yohle. ₁₁Bjale ge ke galalela mediro ye e dirilwego ke diatla tša ka, le tapišo tša mola ke e dira, ke hwetša e le lefela, e le go phuthela phefo ka kobo, ka bona go se matšomatšo fa tlase ga letšatši.

₁₂Ka phakgamela go lemoga se e lego bohlale, le se e lego bošilo le botlatla; gobane motho e a hlatlamago kgoši a ka reng, ge e se go dira tše ba di dirilego kgale? ₁₃Ka bona matšo a bohlale a phala a bošilo, bokaseetša se phala leswiswi. ₁₄Yo bohlale o ne mahlo mo hlogong ya gagwe; ge e le setlatla se sepela leswiswing. Le gona ka bona gobane bobedi bja bona bo tlelwa ke tše di swanago. ₁₅Pelong ya ka ka ba ka re: Matlelasetlatla le nna a ka ntlela. Ke reng ke kgantšha bohlale? Ka botša pelo ya ka ka re: Le tšona tšeo ke lefela! ₁₆Gobane yo bohlale gotee le setlatla ga ba gopolwe go ya go ile; mehla e tlago e tla hwetša go lebetšwe bohle. Joo! Mohlale le lešilo, go hweng ba a swana! ₁₇Bophelo ka ba ka bo nyatša ka re, ke lefela, ke tiro tše di dirwago fa tlase ga letšatši; gobane ke lefela tšohle, ke go phuthela phefo ka kobo.

₁₈Ka nyatša le tapišo tšohle tše nkilego ka itapiša ka tšona fa tlase ga letšatši, tše ke tlogo di tlogelela motho e a tlogo ntlhatlama. ₁₉Mme go tseba mang ge e tlo ba mohlale goba lešilo? O tlo buša tšohle tše ke di dirilego ka bohlale bja ka fa tlase ga letšatši. Le tšona tšeo ke lefela. ₂₀Ke moka ka hloboga, ka ngala tšohle tše ke di dirilego fa tlase ga letšatši. ₂₁Gobane motho e a dirilego ka bohlale le ka tsebo le ka kgono, o di tlogelela motho e a sa kago a itapiša ka tšôna, ya ba bohwa bja gagwe. Tše le tšona ke lefela, ke bošula bjo bogolo. ₂₂Gobane motho o tšwa le eng ka tiro tšagwe tšohle, le ka pelaelo tša pelo ya gagwe, tše a itapišago ka tšona fa tlase ga letšatši? ₂₃Hleng mehla yohle yagwe e le ya go hlaka! Hleng boitapišo e le go itshwenya! Le bošego pelo yagwe ga e khutše. Tšeo le tšona ke lefela.

₂₄Motho ga a na se se kaone; a a je, a a nwe; pelo ya gagwe e thabele botse mo tirong tša gagwe. Fela, le tšôna tšeo ke bone di etšwa atleng sa Modimo. ₂₅Gobane ke mang a kago ja, a kago thaba, ge e se ka yena? ₂₆Gobane motho e a mo kgahlago, o mo fa bohlale le tsebo le thabo. Ge e le modiradibe o mo nea tapišego ya go hloša le ya go kgobela tša go tlo fiwa yo Modimo a mmonago bolo. Le tšona tšeo ke lefela, ke go phuthela phefo ka kobo.