ESITERE 4

₁Morodekai ge a kwile se se dirwago, a gagola diaparo tša gagwe, a apara mankgeretla, a itšhela ka molora, a tšwela gare ga motse, a hlaboša lentšu a lla sello se segolo. ₂A ba a fihla kgorong ya mošate, a se tsene, ka gobane kgorong ya mošate go be go sa tsene e a aperego mankgeretla. ₃Le mo dinageng tše dingwe, metseng ka moka mo go fihlilego taelo ya kgoši, gwa tsoga sello se segolo go Bajuda; ba ikona dijo, ba lla ba itlhoboga; ba bantši ba ikalela mankgeretla, ba itšhela molora.

₄Gomme basetsana ba Esitere, le balaki ba ngwako wa gagwe, ba mo sebela ditaba tše; mme mohumagadi a tlalelwa gagolo; a napa a romela Morodekai diaparo, gore a apole mankgeretla a gagwe, a apare tšona. Morodekai a di gana. ₅Esitere a bitša Hathaka, e mongwe wa balaki ba mošate, yo kgoši a bego a mmeile a re a hlankele Esitere, a mo roma a re a botšitše Morodekai ka baka la tše a di dirago, le gore o di direlang. ₆Hathaka a tšwela go Morodekai lepatlelong la motse pele ga kgoro ya mošate. ₇Morodekai a mo laodišetša tšohle tše di mo wetšego, le palo ya ditšhelete tše Hamani a itšego o tlo di tšhela polokelong ya kgoši, ge Bajuda ba ka bolawa. ₈A mo neela lengwalo la molao woo o beilwego motseng wa Susani, wa gore Bajuda ba bolawe, a re: a le bontšhwe Esitere, gore a tsene go kgoši a mo kgopele, a rapelele setšhaba sa gabo. ₉Hathaka a tla a botša Esitere tše Morodekai a di boletšego. ₁₀Esitere ge a boletše le Hathaka a mo roma a ya go Morodekai a re: ₁₁Bahlanka ka moka ba kgoši, le batho ba dinaga tša kgoši, ba tseba gobane mang le mang, e ka ba monna le ge e le mosadi, ge a ka tsena go kgoši lapeng la ka gare a sa bitšwa, o ahlolwa ka molao o tee wa gore a bolawe; ge e se ge kgoši a ka mo šupa ka lehlotlo la gauta la bogoši, gona o tlo phela. Gomme nna ke feditše matšatši a masome a mararo ke sa bitšwa go tsena go kgoši.

₁₂Ba ya ba tsebiša Morodekai se Esitere a se boletšego. ₁₃Morodekai a re, ba botše Esitere ba re: O se ke wa re ge o le ngwakong wa kgoši, o tlo hlaolwa wa phela ge Bajuda ka moka ba bolawa. ₁₄Gobane le ge o ka ikhomolela lehono, Bajuda ba tlo namolelwa ke se se tšwago go šele. Ke mo go tlogo bolawa wena le ba leloko la gago. Gomme, go tseba mang? -- mohlomongwe o filwe bohumagadi ka baka la tšona tše tša lehono.

₁₅Esitere a re, ba botše Morodekai ba re: ₁₆Sepela o yo botha Bajuda ka moka ba Susani; le ikone dijo ka baka la ka, le ile dilewa le dinwewa matšatši a mararo bošego le mosegare. Le nna le basetsana ba ka re tlo dira ka mokgwa woo ra ikona dijo; ya ba gona ke tlogo tsena go kgoši, le ge e se ka molao; gomme ge nka bolawa, ke tla fo ikhwela.

₁₇Morodekai a ya a dira tšohle tše Esitere a mo laetšego tšona.