EKISODO 31

₁Morena o laetše Moshe a re: ₂O tsebe gore ke nna ke biditšego Betsaliele ka leina; ke morwa wa Uri morwa wa Huri, wa moloko wa Juda. ₃Ke mo humiša moya wa Modimo, le bohlale, le tlhaolaganyo, le tsebo, le go kgona mediro ya mehutahuta; ₄gore a tsebe mediro ya bohlale, a e dira ka gauta, le ka silifera, le ka mphiri, ₅le go seta maswikana a botšhepi, le go betla dikwata, le go tseba mediro ya mehutahuta. ₆Le gona ke nna ke mo filego Oholiaba morwa wa Ahisama wa moloko wa Dani. Ka gobane mo pelong ya e a hlalefilego ke nna ke beilego bohlale. Mme ba tlo dira tšohle tše ke go laetšego tšona. ₇Ba kgone o dira Ngwako wa Kgwerano, le polokelo ya melao, le sekhurumelo sa poelano sa go e khurumela, le dilo ka moka tša Ngwako woo, ₈le sethalana le dibjana tša sona, le sehlomapone se se tagilego, le aletare ya diorelo, ₉le aletare ya dihlabelo le dibjana tša yona ka moka, le legopo le leoto la lona, ₁₀le diaparo tše di logilwego setšhepi, le diaparo tše kgethwa tša, Arone le tša barwa ba gagwe, tša ge ba ntirela, ₁₁le makhura a setlolo, le diorelo tša monko o bose tša sekgethwa. Ba tlo dira tšohle ka mo ke go laetšego ka gona.

₁₂Morena o laetše Moshe a re: ₁₃Bolela le Baisiraele o re: Le fele le hlokomela disabatha tša ka, ka gobane ke bjona bohlatse go nna le go lena, bohlatse bja gore go tsebje gore le kgethwa ke nna Morena. ₁₄Le hlokomele ge la Sabatha, ka gobane ke lona le lekgethwa la lena. E a le gobošago, a a hwe lehu; ka gobane e a dirago modiro ka lona, moya wa gagwe o ripše setšhabeng sa gabo. ₁₅Mediro a e dirwe ka matšatsi a selelago; la go šupa lona ke la go khutša sa ruri, le le kgethetšwego Morena. Motho e a dirago modiro ka lona tšatši la Sabatha, a a hwe lehu. ₁₆Baisiraele a ba hlokomele la Sabatha ge, gore Sabatha e dirwe go iša ditlogolong tša bona, e be kgwerano e sa felego. ₁₇E be bohlatse bja neng le neng bja gore ke kwane le Baisiraele; ka gobane Morena o dirile legodimo le lefase ka matšatsi a selelago; ka la go šupa a khutša, a lesa mediro.

₁₈Ya re ge Modimo a feditše go bolela le Moshe kua thabeng ya Sinai, a mo nea diphaphathi tše pedi tša matlapa a ngwadilwego ke monwana wa Modimo.