EKISODO 39

₁Ka purapura e tala le e khubedu, le ka moretele, ba dirile diaparo tša go logwa setšhepi, tša go dira sekgethweng. Diaparo tše kgethwa tše ba di diretše Arone, ka mo Morena a laetšego Moshe.

₂Ba dirile le nkatanakgethwa ka gauta le ka purapura e tala le e khubedu, le ka moretele, le ka leokodi le le ohlilwego setšhepi. ₃Ba natlile diphaphathi tša gauta ya ba dinatlana, ba di thetha ya ba dihlale, tša logwa le dihlale tša purapura e tala le e khubedu, le tša moretele, le tša leokodi, ka mokgwa wa go loga setšhepi. ₄Nkatana ba e diretše ditseka tše pedi tše di tlemaganywago magetleng, tša tlemaganywa mo dintlheng tša tšona. ₅Moketwana wa go tlema nkatana wa dirwa bjalo ka yona, ka gauta, le ka purapura e tala le e khubedu, le moretele, le leokodi le le ohlilwego, wa logwa wa ba lešela letee le yona; wa dirwa bjalo ka ge Morena a laetše Moshe. ₆Ba dira maswikana a šohama, ba a kwabela ka gauta, a setilwe ka mokgwa wa maswikana a kgatišo, a tlokilwe maina a barwa ba Isiraele. ₇Ba a gomaretša mo ditsekeng tša nkatana, gore e be maswikana a go gopola barwa ba Isiraele, bjalo, ka ge Morena a laetše Moshe.

₈Ba dira le thebjana ka mokgwa wa go loga setšhepi; ba e loga bjalo ka nkatana yela, ka gauta, le ka purapura e tala le e khubedu, le moretele, le leokodi le le ohlilwego. ₉Thebjana ye ya ba le dikhutlo tše nne; ge e mennwe ya lekana le botelele bja seatla, bophara bja yona le botelele bja yona. ₁₀Mo go yona ba gomaretša mebilana e mene ya maswikana. Mmilana wa pele wa ba le leswikana la odemo, le la phithida, le la barikata; ya ba mmilana wa pele. ₁₁Mmilana wa bobedi ya ba wa leswikana la nofeke, le la safira, le la jogalomo. ₁₂Mmilana wa boraro ya ba wa leswikana la lešemo, le la subu, le la agalama. ₁₃Mmilana wa bone ya ba wa leswikana la tharasisi, le la šohama, le la jasipe. A be a kwabetšwe ka gauta, a gomaretšwa. ₁₄Maswikana e be e le a lesome le metšo e mebedi, ka maina a barwa ba Isiraele; a be a setilwe ka mokgwa wa go seta maswikana, a kgatišo, a ya ka meloko e lesome le metšo e mebedi, leswikana le tlokilwe leina la moloko o tee o tee. ₁₅Thebjana ye ba e direla diketane, tše di dirilwego bjalo ka lenti le le ohlilwego, ka gauta e tagilego. ₁₆Ba dira mekwabelo e mebedi ya gauta, le mefišana e mebedi ya gauta. Mefišana ye ba e rokela dintlheng tše pedi tša thebjana. ₁₇Diketane tšela tše pedi tša go ohlwa ka gauta ba di kgokela mefišaneng e mebedi ya mo dintlheng tša thebjana. ₁₈Dintlha tše dingwe tše pedi tša diketane tše tša gauta ba di kgokela mekwabelong, mme yona ba e kgokela ditsekeng tša nkatana mo magetleng ka thoko ya mono pele. ₁₉Mefišana e mengwe ya gauta ba e dira, ba e rokela mo morumong wa thebjana, dintlheng tše pedi tša ka thoko ya ka teng e kgotlanago le nkatana. ₂₀Ba dira mefišana e mengwe e mebedi ya gauta ba e rokela mo ditsekeng tša nkatana ka magwafeng, ka thoko ya ka pele, kgauswi le mo e tlemaganywago, ka godimo ga moketwana wa nkatana. ₂₁Thebjana bjale ba e tlemela mo mefišaneng yeo ka lenti la purapura e tala; ya dula e le godimo ga moketwana wa Nkatana; e se šuthe moo, bjalo ka ge Morena a laetše Moshe.

₂₂Nkatana ye ba e direla kobjana, ba e loga ka mokgwa wa mologi, ka moka ga yona ya ba ya purapura e tala. ₂₃Lešoba la go tsenya hlogo la ba gare ga yona, la dikologwa ke merumo o etšago moruka wa mohlabani, o mennwe gore o se gagoge. ₂₄Mo morumong wa kobjana wa ka tlase ba dira matobolo ka purapura e tala le e khubedu, le moretele, le leokodi le le ohlilwego. ₂₅Ba dira le ditšhitswana ka gauta e tagilego, tša dula le matobolo mo morumong wa kobjana, tša dikologa le wona di gongwa ke matobolo. ₂₆Ba bea tshitswana, ya latelwa ke letobolo, tshitswana ya latelwa ke letobolo, ba dikologa le morumo ka moka. Ya ba tša ge go dirwa sekgethweng, ka mo Morena a laetšego Moshe.

₂₇Ba dira le kobo tša leokodi tša go logwa setšhepi, ya ba tša Arone le tša barwa ba gagwe, ₂₈le kefa ya leokodi le letshesane, le dikuane tša leokodi la go logwa setšhepi, le dithema tša lešela le lešweu, ₂₉le moketwana wa leokodi le le ohlilwego ka purapura e tala le e khubedu, le moretele, ka mokgwa wa go loga tše mabalabala; ba dira ka mo Morena a laetšego Moshe. ₃₀Ba dira le lematšana la gauta la mofapahlogo o mokgethwa; mo go lona ba ngwala ka mokgwa wa badiri ba kgatišo, ba tloka ba re “O kgethetšwe Morena”. ₃₁Ba le kgokela lenti la purapura e tala, gore le tlemelwe mo kefeng; ba dira ka mo Morena a laetšego Moshe.

₃₂Mediro ka moka ya Ntlokgethwa, ya Ngwako wa Kgwerano, ya phethwa. Baisiraele ba e dirile ka moka ka mo Morena a laetšego Moshe. ₃₃Dilo tšohle tša Ntlokgethwa ba di tlišitše go Moshe, Ngwako le dilo tšohle tša wona: Dingamelo, le mamati, le dipalelo, le dikokwane, le maoto, ₃₄le dirulelo tša kobo ya matlalo a dikgapa, le kobo ya matlalo a nebiwatle, le lešira, ₃₅le polokelo ya melao, le diphata tša go e rwala, le sekhurumelo, ₃₆le sethalana, le dibjana tša sona, le dinkgwaponwa, ₃₇le sehlomapone, le dipone tša go hlomelwa go sona, le dibjana tša sona, le makhura a dipone, ₃₈le aletare ya gauta, le makhura a setlolo, le diorelo tše bose, le lešira la mojako wa Ngwako, ₃₉le aletare ya mphiri, le selogwa sa yona sa mphiri, le diphata tša go e rwala, le dibjana tša yona ka moka, le legopo le leoto la lona, ₄₀le mašela a go šira lapa, le dikokwane le maoto a tšona, le lešira la mo seferong sa lapa, le dithapo, le dimapolo tša tšona, le dilo ka moka tša go dira mo Ntlong e kgethwa, mo Ngwakong wa Kgwerano, ₄₁le diaparo tša botšhepi tša go dira mo sekgethweng, le diaparo tše kgethwa tša Arone moperisita, le diaparo tša barwa ba gagwe tša go dira e le baperisita. ₄₂Baisiraele mediro ka moka ba e dirile ka mo Morena a laetšego Moshe. ₄₃Moshe a lebelela mediro ka moka, a hwetša ba dirile tšohle ka mo Morena a laetšego ka gona; a napa a ba šegofatša.