Go otlwa ga basenyi. Mathopša a a homotšwa
1Gomme Moya wa nkuka wa nkiša kgorong ya Ngwako wa Morena o lebilego bohlabela. Ka bona banna ba masome a mabedi a metšo e mehlano ba le mojakong wa kgoro yeo. Mo go bona ka hwetša Jaasanya morwa wa Asure, le Pelatya morwa wa Benayabakgoma ba setšhaba.
2Morena a bolela le nna a re: Ngwana motho! Banna ba ke bona ba rerago tše mpe, ke bona ba relelago motse wo bošula. 3Ba re: Di sa le kgole! Agang nywako! Motse wo ke pitša, mme dinama ke rena! 4Bjale ba porofetele, wene ngwana motho! Ba porofetele!
5Ke moka ka welwa ke Moya wa Morena, mme yena a re: Bolela, o re: Lena ba moloko wa Isiraele le fela le re: Morena o re! Fela, mogopolo o lego dipelong tša lena, nna ke a o tseba. 6Le bolaile ba bantši motseng wo, la tlatša mekgoba ya wona ditoto.
7Bjale Morena Mong wa bohle o re: Babolawa ba lena ba le ba rapaladitšego mo motseng ke bona dinama ge motse e le pitša. Ge e le lena, le tlo ntšhiwa go wona. 8Le boifa lerumo; mme nna ke tlo le tlišetša lona lerumo. O realo Morena Mong a bohle. 9Ke tlo le ntšha motseng wo, ka le gafela matsogong a ba ntle; ya tlo ba gona go phetha molato wa lena. 10Le tlo tekolwa ke lerumo; mme molato wa lena ke tlo o phetha mellwaneng ya Isiraele, le tle le tsebe ge Morena e le nna. 11Motse wo e ka se ke ya ba pitša ya lena; mme lena le ka se ke la ba dinama go wona. Ge e le molato wa lena ke tlo o phetha kua mellwaneng ya Isiraele. 12Ke mo le tlo go tseba ge Morena e le nna, yo le gannego go swara ka tsela ya melao ya gagwe. Le ditaelo tša ka le di ganne, la latela mekgwa ya bantle ba mathoko.
13Ya re ke sa tšo porofeta, Pelatya morwa wa Benaya a hwa. Nna ka khunama ka lotšha, ka re: Joo! Morena Mongaka! Mašalela a Isiraele a o a a fetša ruri?
14Ke mo lentšu la Morena le ntletšego la re: 15Ngwana motho! Ke bana beno, bana beno ba ba thopilwego le wena; ke ba moloko wa Isiraele ka moka ga bona, bao baagi ba Jerusalema ba le boletšego ba re: Ba kgole le Morena; naga ye bjale e neilwe rena! Ke ya rena!
16Bjale bolela o re: Morena o re: Le ge ke ba išitše kgole ditšhabeng, ka ba tšitlanya le dinaga, ke tloga ke epa Mokgethwa wa bona e sa le bjale ba le moo dinageng tše ba fihlilego go tšona.
17Bjale bolela o re: Morena Monga bohle o re: Ke tlo ba ka le kgobela ka le ntšha moo ditšhabeng tše ke le tšitlanyeditšego go tšona, ka le nea naga ya Isiraele. 18Ba tlo boela go yona ba tloša makgapha ka moka a yona, le mabohlola ka moka mo go yona. 19Ke tlo ba nea pelo e nngwe le moya o mofsa ka teng ga bona. Pelo ya leswika ke tlo e tloša mebeleng ya bona, ka ba nea pelo ya nama, 20Gore ba latele ditaelo tša ka, ba hlokomele mekgwa ya ka, ba e dire; ke mo ba tlo go ba setšhaba sa ka, mme nna ka ba Modimo wa bona. 21Fela, bao ba ratago go latela makgapha le mabohlola a dipelo tša bona, bona bao mekgwa ya bona yeo ke tlo e bušetša dihlogong tša bona. O realo Morena Mong wa bohle.
22Bakherubi ba phurolla diphego tša bona, maotwana ala a le hleng ga bona, letago la Modimo wa Isiraele le le godimo ga bona. 23Letago la Morena la hlatloga, la tloga motseng, la ya la ema godimo ga thaba ya ka thoko ya bohlabela ya motse. 24Moya ya nkuka wa mpušetša kua Kaladea go ba ba thopilwego, ke le ponong ya Moya wa Modimo; mme pono ye ke e bonego ya hlatloga ya ntloga. 25Ba ba thopilwego ke ba boditše ditaba ka moka tše Morena a mpontšhitšego tšona.
