Badiši ba babe. Modiši e a tlo go bewa ke Modimo
1Lentšu la Morena le ntletše la re: 2Ngwana motho! Porofetela badiši ba Isiraele. Porofeta o bolele le bona badiši, o re: Morena Mong wa bohle o re: Joo! Badiši ba Isiraele, joo! Ba ikiša mafulong! A ga ke re badiši ke ba go iša dinku mafulong? 3Le lle makhura a tšona; le apara boya bja tšona; la hlaba tše di nonnego; ge e le mohlape, wona ga le o diše. 4Tše di fokolago ga la ka la di tsoša; tše di babjago ga la ka la di alafa; tše di robegilego ga la ka la di fapa; tše di tšitlanego ga la ka la di gomiša; tše di timetšego ga la ka la di nyaka; le be le di ntšha ka bogale le ka bošoro. 5Bjale di gašane ka go hloka modiši, ya ba tša go lewa ke dibata ka moka tša naga di gašane. 6Dinku tša ka tša phapharega le dithaba tšohle le meboto yohle e megolo, di gašane le naga ka moka, go se e a di nyakago a di hlokomela.
7Bjale lena badiši, kwang se Morena a se bolelago. 8Morena Mong wa bohle o re: Ka bophelo bja ka! Ke lefetša tša ge dinku tša ka di dirilwe tša go thopša, ya ba tša go lewa ke dibata ka moka tša naga, ka go hloka modiši, ka ge badiši ba ka ba sa ka ba šetša dinku tša ka; ba ikiša mafulong, ba a hlokiša dinku tša ka. 9Bjale lena badiši, kwang se Morena a se bolelago. 10Morena Mong wa bohle o re: Ke nna e! Ke lwa le badiši bao; ke lata dinku tša ka diatleng tša bona, gore ba se hlwe ba ikiša mafulong. Ke namolela dinku tša ka maganong a bona, di tle di se ke tša hlwa di eba dijo tša bona.
11Morena Mong wa bohle o re: Ke nna e! Ke tlo nyaka dinku tša ka ka di hlokomela. 12Ke tlo etša modiši ge a hlokomela mohlape wa gagwe mohla a le gare ga dinku tša gagwe tše di bego di gašane. Le nna ke tlo lotola dinku tša ka ka di hlakodiša gohle mo di gašanyeditšwego gona mohla wola wa leru le leswiswi. 13Ke tlo di ntšha gare ga ditšhaba, ka di gomiša kua dinageng, ka di tliša mo nageng ya gatšo, ka di fihliša dithabeng tša Isiraele, le dinokaneng, le mo mebotong ya naga ya geno. 14Ke tlo di fudiša mafulong a botse mme meraka ya tšona e tlo ba thabeng tše kgolo tša Isiraele. Di tlo hutama merakeng e botse, tša fula mafulomanana thabeng tša Isiraele. 15Dinku tša ka ke tlo di diša nna ka noši, ka di hutamiša. O realo Morena Mong wa bohle.
16Tše di timetšego ke tlo di nyaka; tše di tšitlanego ke tlo di buša; tše di gobetšego ke tlo di fapa; tše di babiwago ke tlo alafa. Ge e le tše di nonnego, le tše di tiilego, ke tlo di fediša, ka diša dinku tša ka wa go loka.
17Bjale Morena Mong wa bohle o re: Hee wene mohlape wa ka! Ke nna e! Ke hlaola nku le nku, le dikgapa le diphoko. 18A ke taba e nyenyane ge le futše mafulo a botse; mme tše di šaletšego mafulong la di gataka ka maoto a lena; la re go nwa meetsemasekegi, mme a šaletšego la a kgotlela ka maoto a lena? 19A fa dinku tša ka di ka fula tše di gatakilwego ke maoto a lena? A fa di ka nwa meetse a kgotletšwego ke maoto a lena?
20Ke tšona tše Morena Mong wa bohle a di bolelago ge a re: Ke nna e! Ke nna ke tlogo hlaola nku e nonnego le nku e otilego. 21Ke lefetša tša ge e fokolago le e šušula ka lehlakore le ka legetla, le e hlaba ka dinaka tša lena, la ba la e raka ya ba ya ntle. 22Nku tša ka ke tlo di namolela, e se hlwe e eba tša go thopša, ka hlaola nku le nku. 23Ke tlo di beela modiši o tee wa go di diša, Dafida mohlanka wa ka; yena o tlo di diša; ke yena a tlo go ba modiši wa tšona. 24Mme nna Morena ke tlo ba Modimo wa bona. Dafida mohlanka wa ka o tlo ba kgoši ya bona. Nna Morena ke boletše. 25Ke tlo dira kgwerano ya khutšo le bona. Ka fediša dibata tše šoro mo nageng; le lešokeng ba tlo dula ba iketlile, ba robale le sekgweng. 26Gomme bona le mathethathaba ya ka, ke tlo ba nea tšhegofatšo, ka neša dipula lebaka la gona. E tlo ba dipula tša ditšhegofatšo. 27Dihlare tša naga di tlo bea dikenyo tša tšona; mašemo a tlo tšweletša puno; mo nageng ya gabo ba tlo dula ba iketlile, ba tseba ge Morena e le nna, ge ke robile joko ya bohlanka bja bona, ke ba namoletše diatleng tša ba bego ba ba hlankiša. 28Ba ka se hlwe ba eba ba go thopša ke bantle; ba ka se lewe ke dibata; ba tlo dula ba iketlile, go se na e a ba tšhošago. 29Ke tlo ba beela tšhemo ya makgonthe, ba se sa tlo fetšwa ke tlala nageng yeno, ba se sa tlo imelwa ke go nyatšwa ke ditšhaba. 30Ba tlo tseba gore nna Morena Modimo wa bona ke na nabo, le gore bona ba moloko wa Isiraele ke setšhaba sa ka. O realo Morena Mong wa bohle. 31Gomme lena le dinku tša ka, dinku tša mafulo a ka; le batho; mme Modimo wa lena ke nna. O realo Morena.
