HESEKIELE 47

₁A mpoetša mojakong wa Ntlokgethwa. Ka bona ka tlase ga serepodi sa Ntlo go etšwa meetse a ela, a elela bohlabela, ka gobane Ntlo e be e lebile bohlabela. Meetse a fologa a šika le leboto la Ntlo la lehlakore la go le letona ka thoko ya borwa ya aletare. ₂A tšwa le nna ka tsela ya kgoro ya leboa, a ntikološa ka tsela ya ka ntle, a nkiša kgorong ya ka ntle e lebilego bohlabela. Ka bona meetse a ela a etšwa ka thoko ya le letona. ₃Monna eo a swerego lenti la go ela, a sepela a lebile bohlabela, a ela meelo e sekete, a napa a ntshediša meetse ao a goma ka dikokoilane. ₄A buša a ela meelo e sekete, a ntshediša, meetse a nkgoma ka matolo. A ela gape meelo e sekete, a ntshediša, meetse a nkgoma ka matheka. ₅A ela gape meelo e sekete; fao e be e šetše e le noka ye ke sa kgonego go e sela, ka gobane meetse a be a tlaleletše, e le a kago selwa ka go rutha, e sa hlwe e le a kago selwa ka dinao. ₆A bolela le nna a re: Ngwana motho, a o di bone?

Ke moka a buša a nkiša lebotong la noka yeo. ₇Ge ke boela gona, ka bona mabotong a noka mošono le mošola go na le dihlare tše ntšintši. ₈A bolela le nna a re: Meetse a a elela thoko ya bodikela, a fologa le molala a yo tšhologela lewatleng la meetse a letswai; ge a tsena moo, meetse a gona a a alafega. ₉Gomme e tlo re gohle mo noka yeo e fihlago gona, diphedi ka moka tše di nyeunyago moo, tša phela, gwa tlo ba le dihlapi tše ntšintši, gobane meetse ao a tlo ba a tlile go alafa, le go phediša tšohle mo noka yeo e fihlago gona. ₁₀Le baswari ba dihlapi ba tlo ema nokeng yeo go tloga Engedi go fihla Enegilaima. Gona moo go tlo ba le felo fa go rea ka malokwa; mme dihlapi tša gona e tlo ba tša mehutahuta boka hlapi tša lewatle le legolo; e tlo ba tše ntšintši. ₁₁Ge e le matsha a gona, le madibana a gona, a ka se ke a alafega; a tlo fela a eba a letswai. ₁₂Ge e le nokeng, mabotong a yona, mošono le mošola, go tlo mela dihlare tša mehutahuta tša go lewa. Di tlo buduša dienywa ka dikgwedi, ka gobane meetse a tšona a ela a etšwa Sekgethweng; mme dienywa tša tšona e tlo ba dijo, matlakala a tšona e tlo ba a go alafa.

₁₃Morena Mong wa bohle o re: Še mellwane ye le tlogo arolelwa naga le magae ka yona, ge go iwa ka meloko e lesome la metšo e mebedi ya Isiraele. Josefa a newe karolo tše pedi. ₁₄Ka moka ga lena le tlo arolelwa dikarolo tše di lekanego, ka gobane ke enne ka re naga ye ke tlo e nea botataweno. Ke yona naga e tlogo ba magae a lena.

₁₅Mellwane ya naga še: Ka thoko ya leboa mellwane e thome lewatleng le legolo, wa tloga moo o lebile Hethilone wa fihla Tedada, ₁₆Le Hamathi le Berotha le Sibiraima, o lego gare ga mellwane ya Damaseko le Hamathi le Hatsara-Hathikone o lego mellwaneng ya Haurane. ₁₇Ke gore mollwane o tloga lewatleng wa goma ka Hatsara-Enone mellwaneng ya Damaseko; mellwane ya Hamathi e tlo ba ka thoko ya leboa.

₁₈Ka thoko ya bohlabela mollwane o tlo tšwa ka makgatheng a Haurane le Damaseko, le gare ga naga ya Gileada le naga ya Isiraele; noka ya Jorodane e tlo ba mollwane go fihla lewatleng la bohlabela. Ke wona mollwane wa thoko ya bohlabela.

₁₉Ka thoko ya borwa mollwane o tlo tloga Thamara, wa yo fihla meetseng a Meriba kua Kadese, wa fologa le noka wa ya lewatleng le legolo. Ke mellwane ya thoko ya borwa.

₂₀Thoko ya bodikela mollwane ke lewatle le legolo go fihla felo fala mo mollwane o tlogo tloga o lebile Hamathi. Ke wona mollwane wa thoko ya bodikela.

₂₁Ke yona naga ye le tlogo e arolelana le eya ka meloko ya Baisiraele. ₂₂Naga ye le tlo arolelana ka go dira matengwa; le arolele le badiiledi ba ba diilelago go lena; ba tlo tswala bana ba le mo go lena; le ba dire ba gabolena Baisiraele; ba be le magae mo gare ga lena ba moloko wa Isiraele. ₂₃Modiiledi le mo arolele naga ya gagwe molokong wo a diiletšego go wona. O realo Morena Mong wa bohle.