HESEKIELE 9

₁Ka kwa go goelela lentšu le legolo le re: A go batamele ba go otla motse; ba tle bohle ba swere dibolao ka diatla. ₂Ka bona go etla banna ba ba selelago ka tsela ya kgoro ya tletlolo e lebilego thoko ya leboa; bohle ba swere dibolao. E mongwe wa bona o be a apere seaparo sa leokodi, a na le pitšana ya pilwana ya go ngwala, a e tlemeletše lethekeng. Ba tsena ba ema lehlakoreng la aletare ya mphiri.

₃Letago la Modimo wa Isiraele, le le bego le le godimo ga Bakerubi, la rotoga la tla serepoding sa Ngwako. Gwa bitšwa monna yola a aperego leokodi, a nago le pitšana ya pilwana ya go ngwala lethekeng. ₄Morena a mo laela a re: Yaa o putle motse ka bogare; o putle Jerusalema ka bogare. Batho ba o ba hwetšago ba lla ba hlokofetše ka go bona makgapha a a dirwago, o ba swaye leswao diphatleng.

₅Bala ba bangwe, ka mo kwa ka ditsebe tša ka, ge a ba laya a re: Putlang motse ka bogare, le latela yeo; mme le bolayeng. Leihlo la lena le se ke la kwela motho bohloko. ₆Le bolaye ba bagolo le masogana le basetsana; le bana le basadi le ba fedišeng. Fela, e a swailwego ka leswao le se ke la mo dira selo. Napang le thome gona fa Ngwakong wa ka! -- Mme ba thoma ka banna ba bagolo, ba ba bego ba le mojako wa Ntlo.

₇A ba laela a re: Tšhilafatšang Ngwako wo, le tlatše malapa ka ditoto, le tsebo tšwa! -- Ba tšwa ba bolaya ba motseng.

₈Ya re ge ba sa fela ba bolaya, nna ke šetše ke le nnoši, ka khunama ka lotšha, ka hlaboša lentšu ka re: Hee Morena Mong a bohle! A o fediša mašalela a Isiraele ka moka ka go thenogela motse wa Jerusalema bogale bja gago?

₉Yena a re: Bokgopo bja moloko wa Isiraele le wa Juda ke bjo bogolo ka kudukudu; naga e tletše madi; motseng go tletše bohlola, ka gobane ba re: Morena o tlogetše naga ye! Morena ga a re bone! ₁₀Bjale nna, leihlo la ka le ka se ba kwele bohloko, ga ke sa ba setša. Ke ba lefetša ditsela tša bona.

₁₁Ya ba gona go boago monna yola e a aperego leokodi, e a bego a na le sebjana sa pilwana lethekeng, a ipega a re: Ke dirile ka mo o ntaetšego ka gona!