ESERA 5

₁Gwa porofeta moporofeta Hagai le moporofeta Sakaria morwa wa Ido, ba bolela le Bajuda le ba Jerusalema Leineng la Modimo wa Isiraele. ₂Ke mo Serubabele morwa wa Sealathiele, le Jeshua morwa wa Jotsadaka, ba tsogilego ba thoma go aga Ngwako wa Modimo motseng wa Jerusalema, ba na le baporofeta bao ba Modimo ba ba bego ba ba tlatša.

₃Gwa tla Thathanai mokgoma wa mošono wa noka, a na le Setharabosonai le bagwera ba bona, ba tla ba re: Le laetšwe ke mang go aga ngwako wo le go tsoša morako wo? ₄Ra ba botša maina a banna bao ba ba bego ba aga moago woo. ₅Gomme bagolo ba Juda ba be ba lebeletšwe ke leihlo la Modimo wa bona; banna bao ba lesa go ba thibela; ba thoma go iša taba yeo go Dario, gwa letelwa phetolo ya yona.

₆Ditaba tša lengwalo la Thathanai mokgoma yeo wa naga ya mošono wa noka, le Setharabosonai le bagwera ba bona ba Afaraseka ba mošono wa noka, le ba le rometšego kgoši Dario, šedi. ₇Ba mo rometše taodišo ye e ngwadilwego gwa thwe: Kgoši Dario! Khutšo mo go fela! ₈A kgoši a ke a tsebe gore re be re sepeletše dileteng tša Juda, kua go lego Ngwako wa Modimo o mogolo. O agiwa ka maswika a magolo; maboto a manegwa ka dikota; gomme modiro woo o dirwa ka tlhokomelo le ka go akgofa. ₉Ra botšiša ba bagolo ba gona ra re: Le laetšwe ke mang go aga ngwako wo le go tsoša merako ye? ₁₀Ra botšiša maina a bona, gore re kgone go go tsebiša; ra ngwala maina a banna ba e lego babuši ba bona. ₁₁Bona ba fetola ba re: Rena re bahlanka ba Modimo wa legodimo le lefase. Re tsoša Ngwako wo o bego o agilwe kgale ke kgoši e nngwe e kgolo ya Isiraele, wa fetša nywaga e mentši o le gona. ₁₂Ya na ya re ge botatawešo ba befedišitše Modimo wa bona, a ba gafela diatleng tša Nebukadinetsara kgoši ya Babele ya Kaladea; yena a šwalalanya motse woo, a khudušetša setšhaba kua Babele. ₁₃Gona ka ngwaga wa pele wa pušo ya Korese kgoši ya Babele, yena kgoši Korese a laela a re Ngwako woo o tsošwe. ₁₄A ntšha le dibjana tša Ngwako woo wa Modimo, tša gauta le tša silifere, tše Nebukadinetsara a di tšerego Ngwakong woo wa Jerusalema a di iša ntlong ya modimo wa gagwe kua Babele. Korese a di tšea moo, tša newa e mongwe yo leina la gagwe e lego Sesebatsara yo a bego a mmeile ya ba mokgoma; ₁₅a mo laela a re: Tšea dibjana tše, o ye o di iše Ntlongkgethwa ya Jerusalema; gore Ngwako woo wa Modimo o tsošwe setsheng sa wona. ₁₆Ke mo Sesebatsara a tlilego a bea motheo wa Ngwako wa Modimo wa Jerusalema. Gomme go tloga moo go sa fela go agiwa le nankhono; fela, ga o ešo wa phethwa. ₁₇Bjale ge e ke kgoši e a rata, gona a go tsomišwe mo ngwakong wa matlotlo wa kgoši ya Babele, gore go bonwe ge e le ge kgoši Korese a laetše go aga Ngwako wa Modimo fa Jerusalema; re be re romelwe phetolo yak kgoši tabeng ye.