ESERA 9

₁Ge ba phethile tšeo, gwa batamela bagolo ba nthera ba re: Setšhaba sa Isiraele le baperisita le Balefi ga ba ka ba ikaroganya le ditšhaba tša dinaga tše makgapheng a tšona; re ra Bakanana, le Bahethe, le Bapherese, le Bajebusi, le Baamoni, le Bamoaba, le Baegipita, le Baamoro. ₂Ba tšere basadi go barwedi ba bona; le barwa ba bona ba ba tšeišitše basadi ba mehuta yeo. Ba peu e kgethwa ba itlhakantše le ba ditšhaba ba dinaga tše; gomme bakgoma le bagolo e bile ke bona baetapele bosenying bjoo. ₃Nna ge ke ekwa taba ye, ka gagola seaparo sa ka le kobo ya ka, ka ubarela meriri ya hlogo ya ka le maledu a ka, ka dula fase ke gakanegile. ₄Gomme bohle ba ba boifago lentšu la Modimo wa Isiraele, ba na ba phuthegela go nna ka baka la bosenyi bjoo bjo bogolo bja mathopša; nna ka fo dula ke gakanegile, gwa ba gwa išwa sehlabelo sa mantšibóa.

₅Ka lebaka la sehlabelo sa mantšiboa ya ba gona ke tsogago mo ke bego ke ikokobeditše, ka gagola seaparo sa ka le kobo ya ka, ka khunama ka matolo, ka emišetša diatla tša ka go Modimo wa ka. ₆Ka re: Modimo wa ka! Ke lewa ke dihlong; ke šia le go lebiša sefahlogo sa ka go wena Modimo wa ka, gobane masenyi a rena a atile; a feta dihlogo tša rena; gomme melato ya rena e fihla legodimong. ₇Go tloga mehleng yela ya botatawešo go fihla la lehono re obile molato o mogolo. Gomme ge rena le dikgoši tša rena le baperisita ba rena re gafetšwe diatleng tša dikgoši tša naga e šele, le lerumong, le kgolegong, le go hlakolweng, le nyatšegong e kakago yeno ya lehono, ke ka baka la masenyi a rena. ₈Ge e le lebakanyana le Morena Modimo o sa re dirile ka kgaugelo, a re šiela mašalela a a phologilego, a re dumelela go thea motheo felo fa gokgethwa ga gagwe, gore Modimo wa rena a ediše mahlo a rena, a re fe go phelaphela gonyane bohlankeng bjo bja rena. ₉Gobane le ge re le bahlanka, Modimo wa rena ga a ka a re tlogela bohlankeng bja rena; o re hwetšišitše tše botho mahlong a dikgoši tša Peresia, gore a re phediše, re kgone go aga Ngwako wo wa Modimo wa rena, re tsoše marope a wona, gore a re fe sebo mo nageng ya Juda le motseng wa Jerusalema.

₁₀Gomme bjale, Modimo wa rena! Re sa tlo bolelang ge re tlogetše melao ya gago ka mokgwa wo? ₁₁Tše o di laetšego ka baporofeta bahlanka ba gago, wa re: Naga ye le yo go tsena go yona ya tlo ba ya lena, ke naga ya ditšhila tša ditšhaba tša dinaga tše. E tšhilafetše ka makgapha a ditšhaba tše di e tladitšego ka ona go goma ka mellwane ya yona thoko tšohle. ₁₂Wa re: Bjale le se ke la nea barwa ba lena barwedi ba bona, mme barwedi ba lena ba se ke ba tšewa ke barwa ba bona. Le se ke la ba dumelela leago le bothakga le ka mohla o mongwe; gore le tie, le je menono ya lefase le, le be le e šiele bana ba lena, ya ba magae a bona a ka mehla le mehla. ₁₃Bjale ge re šetše re wetšwe ke tše kaakaa ka baka la mediro e mebe ya rena, le ka baka la molato o mogolo wa rena, mme wena Modimo wa rena wa re hlomogelwa pelo, wa se ke wa re otla ka go ya ka makgopo a rena, wa ba wa re hunolla ka mokgwa wo, ₁₄a fa ka boela re senya molao wa gago ka go itswalanya le ditšhaba tše tša makgapha? A o ka se ke wa re galefela ra ba ra felela sa ruri, gwa hlokwa le lešalela le mophologi? ₁₅Morena Modimo wa Isiraele, wene o re dirile ka mo go bego go re swanetše; gobane rena re mašalela le baphologi ka mokgwa wo wa lehono. Bjale ke rena ba; re tlile pele ga gago re wetše molatong; gobane ga go e a kgonago go ema pele ga gago ge a na le taba tše bjalo.