BAGALATIA 1

₁Paulo Moapostola wa go se bewe ke batho, wa go se be gona ka batho, e lego Moapostola ka Jesu Kriste le ka Modimo Tatagwe e a mo tsošitšego bahung. ₂Nna le bana bešo ka moka ba ke nago le bona, re ngwalela diphuthego tša Galatia.

₃Kgaugelo a e le tlele le khutšo e tšwago go Modimo Tata wešo le go Mong wa rena Jesu Kriste,

₄e a ikgafilego ka baka la dibe tša rena gore a re phološe lebakeng le lebe le la bjale, ka go rata ga Modimo Tata wešo. ₅Yenayo a a retwe mehleng ya neng le neng. Amene.

₆Ke kgotsa ge le akgofiša go hlanogela e a le biditšego ka kgaugelo ya Kriste, mme la ya le Ebangedi e šele. ₇Etšwe go se e nngwe; se e lego gona e le ba go le ferekanya ba rata go hlanola Ebangedi ya Kriste. ₈Fela, e a kago le anegela Ebangedi e šele, e sego yeo le e boditšwego yona, le ge e ka ba rena, le ge e ka ba morongwa wa legodimong, yena eo a e be molahlwa. ₉Bjalo ka ge re šetše re boletše, le bjale re realo: E a kago le botša Ebangedi e šele, e sego yeo le e amogetšego, yena eo a e be molahlwa.

₁₀Ge ke realo, a ke go re ke rerela batho, goba ke rerela Modimo? Goba ke go re ke nyaka go kgahla batho? Ge nka be ke sa le wa gore ke kgahle batho, gona nka be ke se mohlanka wa Modimo.

₁₁Bana bešo! Ke le eletša gore Ebangedi ye e boletšwego ke nna, ga e ye ka mokgwa wa batho. ₁₂Le gona ga nka ka e fiwa ke motho, ga nka ka e rutwa ke motho; ke e utolletšwe ke Jesu Kriste.

₁₃Gobane tša bophelo bja ka ke sa ya le Sejuda le di kwele, tša mola ke sa hlomarela phuthego ya Modimo ke galefile, ke e šuhla. ₁₄Ke phala dithaka tša ka tša setšhaba sa gešo ka tša Sejuda, ke le mogale wa go phegelela mekgwa ye re e neilwego ke botatawešo.

₁₅Gomme Modimo e a nkgethilego mola ke sa tšo belegwa, a ikgahlelwa ke go mpitša ka kgaugelo ya gagwe, ₁₆A nkutollela Morwa wa gagwe, gore ke mo tsebatše ditšhabeng. Gomme nna ga nka ka eletšana le nama le madi; ₁₇Ga nka ka ya Jerusalema go bao ba nthakilego pele go ba Baapostola; ka ya Arabia, ka buša ka boela Damaseko. ₁₈Ka morago, ge go fetile nywaga e meraro, ka na ka rotogela Jerusalema, ka yo bonana le Petro, ka fetša matšatši a lesome le metšo e mehlano ke dutše le yena. ₁₉E mongwe wa Baapostola ga nka ka mmona, ge e se Jakobo ngwanabo-Morena.

₂₀Tše ke le ngwalelago tšona šidi, di tsebja ke Modimo ge ke sa aketše.

₂₁Ka morago ka ya dinageng tša Siria le Tsilitsia. ₂₂Ge e le diphuthego tša naga ya Juda di be di sa ntsebe ka sefahlogo. ₂₃Ba gona ba kwele fela gore motho yola wa go re hlomarela mehleng yela ke segoeledi sa tumelo diphuthegong tše kgale a bego a di šuhla. ₂₄Gomme ba reta Modimo ka baka la ka.