Isaka o išwa thabeng ya Moriya
1Ka morago ga ditaba tšeo Modimo o lekile Aborahama, a bolela le yena a re: Aborahama! Yena a re: Ke nna e!
2Modimo a re: Tšea morwa wa gago e lego o tee, yo o mo ratago, yena Isaka, o ye nageng ya Moriya; gona moo o mo dire sehlabelo thabeng ya gona, ye ke tlogo go laetša yona.
3Ka la ka moswana Aborahama a tsoga, a tlema pokolo ya gagwe, a hlaola ba babedi ba bahlanka ba gagwe, le yena Isaka; a phapha dikgong tša sehlabelo, mme a sepela a ya felo mo Modimo a go boletšego. 4Ka tšatši la boraro Aborahama a lebelela, a bona felo fao go sa le kgojana. 5A bolela le bahlanka ba gagwe a re; Šalang mo le pokolo; nna le lesogana le re sa ya kua pele; re tla re ge re rapetše ra boela go lena.
6Aborahama a tšea dikgong tša sehlabelo a di rweša Isaka morwa wa gagwe; yena a swara mollo le thipa ka seatla sa gagwe; mme ba sepela gammogo e le ba babedi. 7Isaka a botšiša Aborahama tatagwe a re: Tata!
Aborahama a re: Ke nna e, ngwanaka!
Isaka a re: Mollo šo, le dikgong šedi; nku ya sehlabelo yona e kae?
8Aborahama a re: Modimo o tlo inyakela nku ya sehlabelo. Mme ba sepela gammogo e le ba babedi.
9Ge ba fihla felo mo Modimo a go boletšego, Aborahama a aga aletare gona moo, a beanya dikgong, a tlema Isaka morwa wa gagwe, a mmea aletareng godimo ga dikgong. 10A otlolla letsogo, a swara thipa, gore a hlabe morwa wa gagwe. 11Ke mo Morongwa wa Morena a mmiditšego a le godimo a re: Aborahama! Aborahama!
Yena a re: Ke nna e!
12Morongwa a re: O se ke wa iša seatla go lesogana leo! O se ke wa mo dira selo; ka gobane bjale ke lemogile gore o boifa Modimo, gomme ga wa ka wa gana go nneela morwa wa gago o tee eo.
13Bjale Aborahama ge a lebelela a bona kgapana e le morago ga gagwe, e tantšwe ka dinaka sethokgwaneng. Aborahama a ya a tšea kgapana yeo, a e hlaba, ya ba sehlabelo bakeng sa morwa wa gagwe. 14Gomme Aborahama felo fao a go reela leina, ya ba “Morena-o-a-bona”; le lehono ba sa re: Thabeng mo Morena a bonwago.
15Morongwa wa Morena a buša a bitša Aborahama a le godimo, 16a re: Morena o re: Ke enne ka nna, ka ge ke bone se o se dirilego, o sa ka wa ntima morwa wa gago e lego o tee. 17Ke re: Ke tlo go šegofatša gagolo; bana ba gago ke tlo ba atiša gagolo bjalo ka dinaledi tša legodimong, le bjalo ka lešabašaba la lebotong la lewatle; mme bana ba gago e tlo ba beng ba dikgoro tša manaba a bona. 18Gomme ditšhaba ka moka tša lefase di tlo šegofala ka peu ya gago ka baka la gobane o kwele lentšu la ka. 19Ya ba gona Aborahama a boetšego go bahlanka ba gagwe; ba tsoga ba sepela gammogo ba ya Beresaba; mme Aborahama a dula Beresaba.
20Ka morago ga ditaba tšeo Aborahama o begetšwe gore: Nahoro monnago o belegetšwe bana ke Milika; 21wa maitšibulo ke Utsi, le Busi monnagwe, le Kemuele tatago Arama, 22le Kesede, le Haso, le Pilidase, le Jidilafo, le Bethuele. 23Bethuele ke yena tatago Rebeka. Ba seswai bao ke bona ba Milika a ba belegetšego Nahoro monnago Aborahama. 24Le mosadi wa gagwe wa serethe, yo leina la gagwe e lego Reuma, yena o belege Teba, le Gahama, le Thahase, le Maaga.
