HOSEA 11

₁Isiraele ke mo ratile mola a sa le sogana; morwa wa ka ke mmiditše kua Egipita. ₂E sa le mola ba bitšwa, ba fela ba fulara, ba ya ba ipega go boBaali le medimo ya diswantšho, ba iša diorelo, ₃Mola e le nna ke bego ke tataidiša Efuraimi, ke mo swere ka diatla, mme bona ba se tsebe ge ke le Moreku wa bona. ₄Ka mo goga ka manti a setho, ka lerala la lerato. Se ke ba dirilego sona e be e le go ba rola joko molaleng, ka inama ka ba nea dijo.

₅Nageng ya Egipita a ka se ke a boela. Kgoši ya bona ke Asuri, ka gobane ba ganne go boa. ₆Metse ya bona e tlo dikologwa ke lerumo; le tlo thokga mapheko la a metša, gwa pala maano a bona. ₇Tšhaba sa ka se lemetše go ntlhanogela; ge o ba bitša wa re ba tsoge, ga go tsoge motho. ₈Efuraimi, a nka go lahla? Isiraele, a nka go hlala? A nka go dira tša Adema? A nka go bapetša le Tseboima? (Gen. 14:2). Pelo ya ka e a gaoga; e bela ka go ba kwela bohloko. ₉Ga ke dire ka bogale bja sehlogo; nka se ke ka buša ke thosanya Efuraimi; gobane ke Modimo, ga ke motho; ke na le wene ke le Mokgethwa; ga ke tle ke galefile.

₁₀Ba tlo ba ba latela Morena; o tlo bopa boka tau. Ge a bopa, bana ba kua lewatleng, ba tlo tla ba tšhogile. ₁₁Ba tlo tšwa Egipita, ba tlo tla ba tšhogile wa nonyana; ba tlo tšwa Asuri ba tšhogile wa leeba: gomme ke tlo ba dudiša mo nywakong ya bona. O realo Morena.