HOSEA 2

₁Botšang bana ba bolena le re: Le setšhaba sa ka! Le dikgaetšedi tša lena le di botše le re: Le bagaugelwa!

₂Sekišang mmaweno. Le mo sekišeng le re o reng ge e se mosadi wa ka, monna wa gagwe e se nna. A a tloše bootswa bja gagwe fahlogong sa gagwe, le bononyana bjagwe bo mo tloge sehubeng. ₃Ke se tlo mo hlobodiša, ka mo lesa a le fela, a etša mola a sa tšo belegwa, ka mo dira lehanata naga tshehla, ka mmolaya ka lenyora, ₄Ke se gaugele bana bagwe, ka gobane e le bana ba bootswa. ₅Gobane mmabo o dirile tša bootswa, o ba imile ka tša dihlong, ka gobane o be a re: Nna ke ya le baratwa ba ka ba go mpha bogobe le meetse, le dikobo le mašela, le tša go nwa.

₆Molato ke wona woo ge ke thiba tsela yago ka meetlwa, ka kgatla morako wa hloka dirobana. ₇O tlo re a kganyelele go baratwa bagwe, a se fihle mo ba lego gona; o tlo ba nyaka a ba hloka. Ke mo a tlogo re: A nke ke boele go monna wa ka yola wa pele; gobane tša mehla yela di be di le kaone.

₈Ke ka gobane a sa tsebe ge e le nna ke mo neago mabele le morara le makhura, ke mo atišetša silifera le gauta; mme ba direla Baali ka tšona. ₉Nna bjale ke tlo mo amoga mabele a ka lebakeng la ona, le morara wa ka lebakeng la wona; ke tlo mo amoga le dikobo tša ka, le mašela a ka, le tša go apeša bofela bja gagwe. ₁₀Ke tlo mo tšola, baratwa bagwe ba di bona; go ka se be wa go mo namolela atleng sa ka. ₁₁Ke tlo kgaotša mathabo a gagwe ka moka, le menyanya ya gagwe, le ya kgwedi e mpsha, le ya disabatha, le ya diphuthego. ₁₂Ke tlo senya merara ya gagwe, ye a bego a re: Ke yona meputso ye ke e neilwego ke baratwa ba ka; Ke tlo e dira lerobo la fela, tša tlo lewa ke dibata tša nageng. ₁₃Ke mo sekiša ka tša mehla ya boBaali, ge a ba tupišetša diorelo a tšhephile ka mangina le dipheta, la latela baratwa ba gagwe, nna a ntebetše. O realo Morena.

₁₄Tsebang! E tlo ba ka baka leo ge ke mo goketša ka mo iša lešokeng, ka yo mo fepeletša. ₁₅Re le gona kua ka mo nea rapa tša morara, mme moedi wa mahloko ya tlo ba mojako wa lehutšo; a tlo tlotla boka mola e sa le ngwanana, boka mola a rotoga a etšwa nageng ya Egipita. ₁₆Mehleng yeo -- o realo Morena -- O tlo nthe: Monna wa ka! Wa se sa tlo re: Baali wa ka! ₁₇Gobane maina a boBaali ke tlo a tloša molomong wa gagwe; maina a bona a se hlwe a ukangwa.

₁₈Mehleng yeo ke tlo ba direla kwano le dibata tša lešoka le nonyana tša sebaka le tše di gagabago lefaseng; ke tlo roba mara le marumo le tša ntwa, ka di tloša mo nageng, ka tlo ba agiša ka molao. ₁₉Ke tlo go dira mmeeletšwa wa ka ka molao le ka toko, le ka botho le ka kgaugelo. ₂₀Ke tlo go dira mmeeletšwa wa ka ka potego, mme wa tlo tseba Morena. ₂₁Mehleng yeo nna ke tlo ba wa go kwa. -- O realo Morena. -- Ke tlo kwana le legodimo; mme lona le tlo kwana le lefase. ₂₂Gomme lefase le tlo kwana le mabele le morara le makhura; mme tšona di tlo kwana le Jeseriele (tšhemo ya Modimo). ₂₃Ke tlo mo šema mo nageng, ka gaugela Mosegaugelwe; Gase ba ka ka tlo mo re: O setšhaba sa ka: mme yena a re: O Modimo wa ka!