JESAYA 2

₁Še taba ye Jesaya morwa wa Amotsi, a e bonego e nepa Juda le Jerusalema. ₂Bofelong bja mabaka thaba ya Ntlo ya Morena e tlo ba e thekgilwe godimo ga dithaba, e beilwe godimo ga meboto; mme ditšhaba tšohle di tlo tšhologela mo go yona. ₃Meraforafo e tlo ya gona e re: A re yeng, re rotogele thabeng ya Morena, Ngwakong wa Modimo wa Jakobo, a re rute tsela tšagwe, gobane molao o tlo tšwa Tsione, lentšu la Morena le tlo tšwa Jerusalema. ₄O tlo buša ba ditšhaba, o tlo ahlolela ba meraforafo. Ke mo ba tlogo tšea ditšhoša ba rula megoma ka tšona, ba tšea marumo ba rula magwetla ka ona. Go ka se be le setšhaba se se tlogo tšwela se sengwe lerumo; batho ba tlo lesa go ithuta go hlabana.

₅Hee lena ba setšhaba sa Jakobo, tlang re sepeleng seetšeng sa Morena.

₆Gomme wena! O lahlile tšhaba sago, moloko wa Jakobo, gobane ba tletše tša ba kua bohlabela, ke baloi bjalo ka Bafilisita, ba hlakahlakane le bantle. ₇Naga ya bona e tletše tshipitshehla le tshipi e khwibidu; mme mahumo a bona ga a fele; naga ya bona e tletše dipitsi; mme dikoloi tša bona ga di fele. ₈Naga ya bona e tletše medimo e šele; ba khunamela dibopša tša atla tša bona, tše menwana ya bona e di dirilego;

₉Motho a lotšha, monna a nyatšega; mme ga o ba lebalele.

₁₀Tsena leweng! Utama leroleng! O efoge go boifega ga Morena, le letago la borena bja gagwe. ₁₁Mahlo a bao ba ba ikgantšhago a tlo nyatšega; boikgogomošo bja banna bo tlo inamišwa. Gomme e mogolo mohla woo e tlo ba yena Morena a nnoši. ₁₂Gobane tšatši leo la Morena wa mašaba le tlo tlela boikgantšho bjohle le boikgodišo; le tlo tlela tšohle tše di godišwago, tša nyatšega. ₁₃Le tlo tlela yohle merokwana e megolo e metelele ya Libanoni, le merula yohle ya Basani. ₁₄Le tlo tlela thaba tše telele tšohle, le meboto e megolo yohle. ₁₅Le tlo tlela dibo tšohle tša diokamo, le merako yohle ye e tiilego. ₁₆Le tlo tlela le maselawatle a kua Tarasisi, le matsaka ohle a a kganyogwago. ₁₇Gwa tlo kokobetšwa boipoti bja batho, gwa tlo nyatšega bogolo bja banna; gomme e mogolo mohla woo e tlo ba yena Morena a nnoši. ₁₈Ge e le medimo e tlo ba e etše ruri.

₁₉Batho ba tlo tsena mefomeng ya dithaba, le mo meleteng ya fase, e le go efoga go boifega ga Morena le letago la borena bja gagwe, ge a tsogile go šišinya lefase. ₂₀Mohla woo, medimo ya bona ya tshipitshehla le tshipi e khwibidu, ye ba itiretšego yona gore ba e khunamele, ba tlo e lahlela magotlo le bomankgaganyane. ₂₁Ba tlo tsena magageng a thaba, le mo maribeng a mantswe, e le go efoga go boifega ga Morena le letago la borena bja gagwe, ge a tsogile go šišinya lefase.

₂₂Ikgaoganyeng le motho wa go buša moya ka nko; le mo sema eng?