Baasuri ba rakella motse wa Jerusalema
1Ka ngwaga wa lesome le metšo e mene wa pušo ya kgoši Hiskia gwa rotoga Sanheribe kgoši ya Asuri, a lwa le metse ya dibo ya Juda, a e thopa. 2Ya re ge kgoši ya Asuri e le kua Lakisi ya roma Rabasake, a tla Jerusalema go kgoši Hiskia a na le dira tše kgolo; a tla a ema lengopeng la letsha la tletlolo, mokgotheng wa mohlatswi. 3Gwa tšwa Elyakima morwa wa Hilkia molaki wa mošate, le Sebana mongwadi, le Joa morwa wa Asafa wa letona, ba ya go Rabasake. 4Rabasake a re: Botšang Hiskia le re: Kgoši e kgolo ya Asuri e re: Ke kholofelo mang ye o nago le yona? 5A o re maano le maatla a go hlabana a kgonwa ka molomo? O botile mang ge o ntlhanogela? 6Ea, o botile Egipita, lehlakanoka leo le tenegilego, leo e rego ge motho a kokotlela ka lona, le mo thule seatla. Ke tšona tše Farao kgoši ya Egipita a di dirago bohle ba ba botilego yena.
7Goba o ka fetola wa re: Re botile Morena Modimo wa rena! A ga se yena yo Hiskia a tlošitšego meboto ya gagwe le dialetare tša gagwe, a laela Juda le Jerusalema a re: Khunamang fa pele ga aletare ye? 8Bjale tlaa o dire mamphega le mong wa ka kgoši ya Asuri, ke go nee dipitsi dikete tše pedi, re bone ge o ka ntšha banamedi ba tšona. 9Le tona e tee ya bahlanka ba banyane ba mong wa ka a o ka kgona go e raka? Fela, o botile Egipita, makoloi le banamedi ba dipitsi. 10Bjale a o re ke filo rotoga ka tla go senya naga ye ke se ne Morena? Ke yena Morena a mpoditšego a re: Rotogela nageng yeo o e senye!
11Elyakima morwa wa Hilkia, le Sebena, le Joa, ba bolela le Rabasake ba re: A ko bolele le rena bahlanka ba gago ka mmolelo wa Asuri; rena re a o kwa. O ko se bolele le rena ka Sejuda; setšhaba se se lego morakong se a go kwa.
12Ya ba gona Rabasake a itšego: A o re mong wa ka o nthometše go bolela taba ye le mong wa gago, goba le wena? A ga ke re o nthometše go bolela le banna bao ba dutšego morakong, bao e rego ge ba na le lena, ba tlo ba ba ja masepa a bona, ba nwa meroto ya bona!
13Rabasake a napa a ema a goeletša ka lentšu le legolo a bolela ka Sejuda a re: Kwang lentšu la kgoši e kgolo, kgoši ya Asuri. 14Kgoši e re: Le se ke la forwa ke Hiskia; a ka se kgone go le namolela. 15Hiskia a a lese go le ruta go bota Morena, ka ge a re: Morena a ka se lese go re hlakodiša; a re: Motse wo o ka se ke wa gafelwa seatleng sa kgoši ya Asuri. 16Le se ke la thaetša Hiskia; gobane kgoši ya Asuri e re: Ntobeng, le tšwe le tle go nna, ke mo lena bohle le tlogo ja merara ya lena le mago a lena, la nwa meetse a didiba tša lena, 17Ke be ke le iše nageng e swanago le naga ye ya lena, ya mabele le dienywa, ya bogobe le dirapa tša merara. 18Le se ke la forwa ke Hiskia ge a re: Re tlo namolelwa ke Morena. A go na le modimo wa setšhaba se sengwe wo o namoletšego setšhaba sa wona diatleng tša kgoši ya Asuri? 19E kae medimo ya Hamathi le ya Arapadi? E kae medimo ya Sefarafaima? A fa e namoletše Samaria seatleng sa ka? 20Mo go medimo yohle ya dinaga ke ofe o kgonnego go namolela naga ya wona seatleng sa ka, ge le re: Morena o tlo namolela Jerusalema seatleng sa ka! 21Gomme ba homola, ba se fetole selo, gobane kgoši e be e laetše ya re: Le se ke la fetola. 22Elyakima morwa wa Hilkia molaki wa mošate, le Sebena mongwadi, le Joa morwa wa Asafa wa letona, ba tla go Hiskia ba gagotše diaparo, ba anegela kgoši se Rabasake a se boletšego.
