JESAYA 46

₁Beli o a kokobetšwa! Nebo o a wa! Diswantšho tša medimo yeo di gafetšwe makaba le dipholo. Dilo tše le bego le di rwala, di belešwa diruo tše di lapago. ₂Di wile, di kokobeditšwe tšohle; ba šitilwe go tšhabiša merwalo; le bona beng ba išwa bothopša. ₃Kwang nna, le ba moloko wa Jakobo, lena mašalela ka moka a moloko wa Isiraele, lena ba le bego le nkimela le sešo la belegwa, ka le rwala le sa tšwa go tswalwa. ₄Le tlo ba la tšofala ke sa fela ke le yena e ke le kuka le le hlogo tše pududu. Ke nna ke di dirilego. Ke nna ke tlogo kuka; ke nna ke tlogo rwala ka phološa. ₅Le tlo ntshwantšha ka mang? Le tlo ntekanya le mang? Le tlo mpapetša le mang ra swana? ₆Ba ntšha tshipi e khwibidu dikgwameng, ba ela tshipi tshehla ka seelo, ba thwala morudi, a ba direla modimo, ba o khunamela ba o lotšha. ₇Ba o kuka ka magetla ba o rwala, ba o bea madulong a wona, wa ema o se šuthe; ba o bitša o se arabe. Ga o phološe motho tlalelong. ₈Le eleletše tšeo, le eme senna; a di tsene dipelong tša lena baarogi. ₉Gopolang tša kgale tša bogologolo, ge Modimo e le nna, go se yo mongwe. Ga go sa ne Modimo mo ke nna. ₁₀Ke nna ke kwaditšego tša mafelo mola di sa thoma, di sešo tša direga. Ke nna ke boletšego ka re: Se ke se rerilego ga se šuthe; ke dira tšohle tše ke di ratago. ₁₁Ke nna ke biditšego nong ya bohlabela; kua nageng ya kgole ke biditše monna e a tlogo phetha se ke se rerilego. Ke boletše; ke tlo di tliša. Ke rerile; ke tlo dira. ₁₂Kwang se ke se bolelago, lena ba pelo tše hlamaletšego, ba le lego kgole le go loka. ₁₃Ke batametša toko ya ka; ga e kgole. Mme phološo ya ka ga e sa tlo diega. Phološo ke e bea fa Tsione; borena bja ka ke bo nea Isiraele.