JESAYA 63

₁Ke mang yola a tšwago Edomo a hubetše diaparo a etšwa Bosira? Šoo, Senatla ka ditlhamo, o gata ka maatlamagolo.

Ke nna ke bolelago toko, yo maatla go phološa.

₂Naa aparo tšago di hubetše kang? Hleng kobo ya gago e etša ya mofotli wa morara!

₃Ke tšo fotla ke nnoši, ke se ne motho wa setšhaba se sengwe; mme ke ba gatakile ke befetšwe, ke ba pšhatlagantše ka bogale bja ka, mme madi a bona a ntletše diaparo, ke hubetše kobo mo go fela. ₄Gobane pelo ya ka e be e tseba tšatši la tefetšo, mme go tlile ngwaga wa ka wa go namolela. ₅Ka tadietša mahlo, ka hloka wa go nthuša; ka kgotsa go se wa go ntlatša; ka thušwa ke letsogo la ka, ka tlatšwa ke kgalefo ya ka. ₆Mme ditšhaba ke di gataketše ke befetšwe; tša thekgesela ke di galefetše, madi a tšhologela fase. ₇A nke ke tlotle mabobo a Morena, ke ye ka tše Morena a re diretšego tšona tšohle, le bothobogolo bja gagwe bja ge a šetša moloko wa Isiraele ka dikgaugelo le ka mabobo a gagwe.

₈Gobane o itše: Ka kgonthe batho ba ke tšhaba sa ka, ke bana ba ka ba ba ka se kego ba aketša; mme nna ke Mophološi wa bona. ₉Mehlakong ya bona yohle, o be a hlaka le yena; Morongwa wa fahlego sagwe a ba namolela, a ba lokolola ka lerato la gagwe le ka go ba hlomogela pelo, a ba kuka a ba rwala mehla yohle neng le neng. ₁₀Mme bona ba nganga, ba nyamiša Moya wagwe o mokgethwa. A ba a ba fetogela lenaba a lwa nabo.

₁₁Ke mo setšhaba sa gagwe se eletšwego mehla yela ya bogologolo ya Moshe, sa re: O kae Morentšhalewatleng ka modiši yola wa mohlape wagwe? O kae yola a nago a bea Moya wagwe mo pelong ya gagwe? ₁₂E a romilego letsogo lagwe la borena la sepela le Moshe le bapetše le yena; e a nago a fatola meetse pele ga bona, a itirela ina, ya ba la neng le neng.

₁₃A ba sepediša madibeng, mašokeng, boka pitsi ye e sa kgopšego. ₁₄Moya wa Morena o ba orošitše bjalo ka mohlape ge o fologela meeding. Tšhaba sa gago o se eteditše ka mokgwa o bjalo, wa itirela ina le le tumilego.

₁₅Lebelela o le moo godimong, o bone o le moo boagong bja gago bjo bokgethwa bja borena. Bo kae bogale bja gago le maatla a gago? A pelohlomogi ya gago le šoko la gago, a di ntšhirogetše? ₁₆Hleng o Tatawešo. Aborahama ga a re tsebe; le Isiraele ga a re tsebe. Tatawešo ke wene Morena, Monamoledi wa rena; ke lona ina lago la mehleng. ₁₇Morena, o reng o lesa ra fapoga tsela tšago, dipelo tša rena tša thatafala, re se go boife? Boela go balata ba gago, dilete tša naga yago.

₁₈Setšhaba sa gago sekgethwa se dutše naga ye lebaka le sego le kae fela, manaba a rena a tla a gatakela sekgethwa sa gago. ₁₉Re bjalo ka ba o sešogo wa ka wa ba buša go tloga kgaleng, boka ba ba sešogo ba ka ba bitšwa ka ina la gago.