JESAYA 7

₁Mehleng ya Ahasi morwa wa Jothama morwa wa Usia kgoši ya Juda gwa rotoga Retsini kgoši ya Siria, le Peka morwa wa Remalia kgoši ya Isiraele; ba tšwela Jerusalema dira ba lwa le wona, mme ba šitwa go o hula.

₂Ba moloko wa Dafida ge ba sebelwa gore Basiria ba bokane Efuraimi, ba tsheregana pelo gotee le setšhaba, ba etša dihlare tša sekgwa ge di šišinywa ke ledimo.

₃Morena a roma Jesaya a re: Sepela le morwa wa gago Searajasubu (Tšhalela di tlo boa), o yo gahlana le Ahasi kua lengotswaneng la meetse le felelago letsheng la tletlolo, tseleng ya tšhemo ya mohlatswi; ₄o bolele nae o re: Itote mme o iketle! O lese go boifa! Pelo ya gago e se ke ya gakanega ka dirumola tše pedi tšeo di kunyelelago; ke ra kgalefo ya Retsini le ya Basiria, le ya morwa wa Remalia. ₅Basiria le Baefuraima le morwa wa Remalia, ba tlo lefetšwa ge ba go lakane, ₆ba re: A re tšweleng Juda dira, re yo ba tšhoša, re abagane naga, re bee morwa wa Thabiele, e be kgoši ya bona.

₇Bjale Mong a bohle Morena o re: Di ka se kgonege! Di ka se be gona! ₈Gobane hlogo ya Siria ke Damaseko; mme hlogo ya Damaseko ke Retsini; gomme go sa šetše nywaga e masome a selelago a metšo e mehlano, ke mo Efuraimi a tlo fedišwa, a se hlwe a eba setšhaba. ₉Gomme hlogo ya Efuraimi ke Samaria; mme hlogo ya Samaria ke morwa wa Remalia.

La se dumele, le ka se ke la tia!

₁₀Morena a buša a bolela le Ahasi a re: ₁₁Ikgopelele seka go Morena Modimo wa gago; o ka kgopela se se tšwago fase, le ge e le godimo.

₁₂Ahasi a re: Nka se kgopele; Modimo nna ga ke mo leke.

₁₃Jesaya a re: Kwang gee, lena ba moloko wa Dafida! A le re e sa le dinyane ge le selekile batho, la rata go seleka le Modimo wa ka? ₁₄Bjale seka le tlo newa ke yena Mong a bohle: Bonang, kgarebe e tlo ima, ya belega morwa, mme o mo ree ina la Imanuele (Modimo o na le rena). ₁₅O tlo ja maswi le dinose go fihla ge a tlo tseba go lahla tše mpe le go ithlaolela tše dibotse. ₁₆Gomme naga yeo ye magoši a mabedi a yona a go tšhošago, e tlo ba marope, ngwana yoo a sešo a tseba go lahla tše mpe le go itlhaolela tše dibotse.

₁₇Wena le setšhaba sa gago le moloko wa botatago, Morena o tlo le tlišetša matšatši a sešogo a ke a ba gona go tloga mola Efuraimi a hlanogela Juda. O tlo tliša kgoši ya Asuri.

₁₈Mohla woo Morena o tlo bitša dintši tša kua go gomago dinoka tša Egipita; o tlo bitša le motšhitši wa dinose wa kua nageng ya Asuri. ₁₉Ba tlo tla ka moka ga bona, ba bokana mekgereng ya melapo, le mefatšeng ya maswika, le mešawaneng ka moka.

₂₀Mehla yeo, Mong a bohle o tlo le kuta dihlogo ka legare le le tlogo adingwa kua mošola wa noka ke kgoši ya Asuri; a tlo le boola le maboya a mehlahu, a le tloše le maledu.

₂₁Mehleng yeo monna o tlo rua kgongwana e tee le nku tše pedi. ₂₂Ka go ata ga maswi a tšona, o tlo phela ka maswi, ka gobane ba ba šaletšego nageng yeno ba tlo ja maswi le dinose.

₂₃Mehleng yeo, felo mo bjale go melago merara e sekete ya go rekwa ka sekete sa mašeleng, e tlo ba ga meetlwa le ga hlaga. ₂₄Go tlo iwa ka mesebe le ka bora, ka gobane naga ka moka e tlo ba ya meetlwa le ya hlaga. ₂₅Dithabeng ka moka, mo bjale go lengwago ke megoma, go ka se hlwe go iwa ka go šia meetlwa le hlaga, e tlo ba ga phulo ya dipholo le ga tselana tša go gatakelwa ke dinku.