BAAHLODI 2

₁Motseta wa Morena a rotogela Bokime a etšwa Giligala, a re: Ke le rotošitše le etšwa Egipita, ka le fihliša fa nageng ya ke e enetšego botataweno, ka re: Kgwerano ye ke e dirilego le botataweno nka se ke ka e hlanoša le neng le neng. ₂Ka re le se ke la gwerana le beng ba naga ye; ka re le phušuleng dialetare tša bona. Gomme lena ga le hlokomele se ke se boletšego. Le reng le dira ka mokgwa woo? ₃Le gona ke le boditše ka re: Nka se ke ka ba raka ge le fihla; mme ba tlo ba meetlwa ya go le hlaba, mme medimo ya bona e tlo ba mereo ya go le tanya. ₄Ya re ge Motseta wa Morena a boditše Baisiraele mantšu ao ka moka, setšhaba sa hlaboša mantšu sa lla. ₅Felo fao ba go rea leina la Bokime (Baleding), ba tlišetša Morena didimo.

₆Ya re ge Joshua a laelane le setšhaba sa ikela, Baisiraele bohle ba ya go aga mo nageng ya magae a bona. ₇Mehleng yohle ya ge Joshua a sa phela, setšhaba se be se direla Morena, le mehleng yohle ya ge go sa phela bagolo bao ba ba phetšego galelele mehleng ya ge Joshua a šetše a ile; bona bao ba ba bonego ditiro tše kgolo tše Morena a di diretšego Isiraele. ₈Joshua morwa wa Nuni mohlanka wa Morena o hwile a na le nywaga e lekgolo le le nago le lesome. ₉Ba mmolokile mo nageng ya gagwe kua Thiminathe-Sera, dithabeng tša Efuraimi, mo thaba ya Gaase e lebago thoko ya leboa. ₁₀Gwa ba gwa hwa le ba thaka yeo ka moka, ba gorošetšwa go botatabo; gwa rotoga thaka e šele ya ba ba sa tsebego Morena le ditiro tše kgolo tše a di diretšego Isiraele.

₁₁Mme Baisiraele ba dira tše di befetšego Morena ba hlankela Bobaali; ₁₂Ba tlogela Morena Modimo wa botatabo e a ba ntšhitšego nageng ya Egipita, ba latela medimo e šele, medimo ya ditšhaba tše di bego di ba dikologile, ba e khunamela, ba befediša Morena. ₁₃Ya re ge ba tlogetše Morena, mme ba direla Baali le Asitarothe, ₁₄Morena a ba tukela bogale, a ba gafela diatleng tša bahlakodi ba go ba hlakola, a ba lahlela diatleng tša manaba a bona a a bego a ba dikologile; gomme ba šitwa go ema ge manaba a bona a etla. ₁₅Kae le kae mo ba bego ba tšwela ntshe, seatla sa Morena sa ba hlolela bošula, ka mo Morena a bego a ba boditše, le ka mo a ba enetšego ka gona; ba gakanega gagolo.

₁₆Morena a fela a ba tsošetša baahlodi, ba go ba namolela mo diatleng tša bao ba bego ba ba hlakola. ₁₇Fela, le baahlodi bao ba ganne go ba kwa ka gobane ba be ba ithatela medimo e šele, ba e latela, ba e khunamela. Ga ba ka ba diega go lahla tsela ye e bego e swerwe ke botatabo ka go kwa ditaelo tša Morena; bona ba se ke ba dira ka mokgwa woo. ₁₈Ya re ge Morena a ba beela moahlodi, yena a ema le moahlodi yeo, a ba namolela diatleng tša manaba a bona mehla ka moka ba sa na le moahlodi eo, ka gobane Morena o be a ba kwela bohloko ge ba lla ba tlaišwa ke babeki le bapateletši ba bona. ₁₉Ya fela a re ge moahlodi a hwile, ba boele ba senye ba fetiša botatabo ka go latela medimo e šele, le go e direla le go e khunamela ba se lahle mediro e mebe ya bona le mekgwa ya bona ya bonganga. ₂₀Bogale bja Morena bja fela bo tukela Baisiraele, a ba a re: Setšhaba se, ka gobane se senya kgwerano ya ka ye ke e laetšego botatabo, se sa kwe se ke se boletšego, ₂₁gona le nna mo ba fihlago nka se ke ka hlwa ke raka le ge e le monna o tee wa ditšhaba tše Joshua a di šiilego mola a ehwa. ₂₂E tlo ba go leka Baisiraele ka bona bao, ke bone ge ba tlo hlokomela tsela ya Morena, ba swara ka yona ka mo botatabo ba bego ba e swara, ke bone le ge ba tlo e lahla. ₂₃Ke ka baka leo Morena a lesitšego ditšhaba tšeo, a se ke a di leleka ka pela, mme a se ke a di gafela diatleng tša Joshua.