Manaba a Isiraele. Othiniele, Ehudi, Samogara
1Šedi ditšhaba tše Morena a bego a di šadišitše gore a leke Baisiraele ka tšona, ka moka bao ba ba bego ba sa hlwe ba tseba dintwa tšela tša ge go sa lwelwa naga ya Kanana. 2Ya ba gore morole wa Baisiraele, wo o bego o sa tsebe dintwa tšela, le wona o ithute go hlabana. 3Dikgoši tšeo tša go šala e be e le tše tlhano tša Bafilisita, le tša Bakanana ka moka, le tša Basidoni, le tša Bahefi ba ba agilego dithabeng tša Libanoni le thabeng ya Baali-Herimone, go fihla kua go tlago la Hamathi. 4Ke bona bao Baisiraele ba lekilwego ka bona, gore go tsebje ge ba tlo kua ditaelo tša Morena, tše a di laetšego botatabo ka Moshe. 5Bjale gomme Baisiraele ba agišana le Bakanana, le Bahethe, le Baamoro, le Bapheresi, le Bahefi, le Bajebusi, 6Ba tšea barwedi ba bona, mme ba ba tšeiša bana ba bona, mme ba direla medimo ya bona.
7Ya re ge Baisiraele ba dira tše di bego di befela Morena, mme ba lebala Morena Modimo wa bona, ba hlankela Bobaali le Asitarothe, 8Bogale bja Morena bja tukela Baisiraele, a ba lahlela diatleng tša Kušani-Rišathaimi, kgoši ya Mesopotamia, ba fetša nywaga e seswai ba loba Kušani-Rišathaimi. 9Gomme Baisiraele ba hlabela Morena mokgoši; Morena a ba tsošetša mophološi wa go ba namolela, Othiniele morwa wa Kenasi monnago Kalebe. 10A tlelwa ke moya wa Modimo, a buša Isiraele, a tšwa dira; mme Morena a gafela Kušani-Rišathaimi kgoši ya Mesopotamia diatleng tša gagwe; seatla sa gagwe sa imela Kušani-Rišathaimi. 11Gwa fela nywaga e masome a mane naga e khutšitše; ya ba gona Othiniele morwa wa Kenasi a hwago.
12Fela, Baisiraele ba boela ba dira tša go befela Morena; Morena a fa Egilone kgoši ya Moaba maatla a buša Baisiraele, ka gobane ba dira tše di bego di befela Morena. 13Egilone a gwerana le Baamoni le Baamaleke, ba tla ba fenya Baisiraele, ba thopa motse wa melala. 14Baisiraele ba ba ba fetša nywaga e lesome le metšo e seswai ba loba Egilone kgoši ya Moaba.
15Ke mo Baisiraele ba nago ba llela Morena. Morena a ba tsošetša monamoledi, Ehudi morwa wa Gera monna wa ga Benyamini, wa lempogošo, e be e le yena yo Baisiraele ba bego ba iša dibego ka yena go Egilone kgoši ya Moaba. 16Ehudi o be a ithuletše mphaka wa magale a mabedi wa botelele bja moelo o tee, a o tlemelela lehlakoreng la gagwe la le letona, a o apeša ka diaparo tša gagwe. 17A iša dibego go Egilone kgoši ya Moaba a realo. Gomme Egilone e be e le monna e a nonnego gagolo. 18Ya re ge Ehudi a šetše a mo neetše dibego, a goma le batho ba ba bego ba rwele dibego. 19Ge ba tla mo go bego go na le diswantšo tša medimo kua Giligala, yena a boela go Egilone a re: Ke go tletše le thopa, Kgoši!
Kgoši ya re: anke o homole; gomme bohle ba ba bego ba le moo ba mo šia.
20Ya ba gona Ehudi a mmatamelago; gomme kgoši e be e dutše ka phapošing ya godimo, mo go bego go le phefšana; a dutše gona moo a le nnoši. Ehudi a re: Ke go tlela le malaeledi a Modimo; gona Egilone a tsoga mo sedulong a ema. 21Ke ge Ehudi a iša seatla sa la ntsogošo, a swara mphaka wola o bego o le mo lethekeng la le letona, a napa a mo hlaba mpa. 22Theku ya sobela gotee le bogale, mme makhura a apeša mphaka; ka gobane ga a ka a o hlomola, a o tlogela o phololetše o tšwile ka maragong. 23Ya ba gona a tšwelago mathuding, a tswalela mejako ya ngwako wa ka godimo a tiiša. 24Ya re Ehudi a tšwile, bahlanka ba Egiloni ba tla, ba bona mejako ya ngwako wa ka godimo e tswaletšwe, ba re: O sa ikapešitše maoto ka mo ngwakong woo wa phefšana. 25Gomme ge ba šetše ba letile galelele, go bile go leša dihlong, go se e a bulago mojako wa ngwako wa godimo; ba tšea sekgonyo ba kgonyolla; ba tšhoga mong wa bona a rapaletše fase a hwile.
26Ge ba sa diegile ke ge Ehudi a tšhabile a fetile fala diswantšhong tša medimo, a tšhabetše Seira. 27A fihla a letša diphalafala dithabeng tša Efuraimi, Baisiraele ba fologa dithabeng ba na nae a ba etile pele. 28A ba laela a re: Ntšhaleng nthago; Bamoaba, manaba a a lena Morena o a gafetše diatleng tša lena. Ba ba šwahlela ba thiba madibogo a noka ya Jorodane, ba se ke ba lesa motho a sela. 29Mohla woo ba bolaile Bamoaba ba e bego e ka ba ba dikete tše lesome, ka moka e le banna ba bahlabani ba maatla; gwa se ke gwa phonyokga motho. 30Mohlang woo Bamoaba ba loba Baisiraele; naga ya fetša nywaga e masome a seswai e iketlile.
31Ka morago ga gagwe gwa ba le monna e mongwe, Samogara morwa wa Anathe, a bolaya Bafilisita ba makgolo a selelago ka kotelo ya dipholo; le yena o namoletše Isiraele.
