Setšhaba se tlo thopiwa, gwa gaogelwa basokologi
1Morena, ge nka sekišana nago, o tlo tšwa o se ne molato. Fela, a nke ke bolele nago tša moahlolelo. Ke ka baka lang ge go letlega tsela ya ba babe, mme bahlanogi bohle ba iketla? 2O ba šemile mme ba tsema medu, ba mela ba enywa dienywa. O kgauswi le melomo ya bona, mme o kgole le kelelo tša bona. 3Mme wene Morena, nna o a ntseba, o a mpona, o fetleka pelo ya ka wa e hwetša e na nago. Gogela bala tlhabong bjalo ka dinku o ba beele tšatši la go hlabja. 4Naga e tlo khutša neng go lla? Bjang bja naga yohle bo tlo lesa neng go omelela? Dikgomo le nonyana di ile ka bosenyi bja baagi bja yona, ke gobane ba re: Ga a bone tše di tlogo re tlela ka moso.
5Ge ešita o fegelwa o na le ba sepelago ka dinao, o tlo kgona bjang go beana le dipitsi? Go botile go sa iketlilwe mo nageng, o tlo reng o le lesoding la Jorodane? 6Gobane le ba geno, le ba motse wa tatago, ba a go hlanogela; ba go šala nthago ba go goelela. O se ke wa ba bota, ge ba go bolediša ka tše botse.
7Ke tlogile lapeng lešo, ke khudugile kua gae, mo ke bego ke go rata kudu, ke go gafetše ba go hloilego. 8Legae la ka nna le mphetogetše tau ya sekgweng, le a nthorela; bjale nna ke le hloile. 9Legae la ka ke le bona e le lerebišileramaga le le dikilwego ke nonyana. Yang le bokanyeng dibata ka moka tša naga, di tle di je? 10Serapa sa ka sa morara se sentšwe ke badiši ba bantši; ba gatakile tšhemo ya ka. Tšhemo ye ke bego ke e rata ba e dira lehanata le le befilego. 11E šetše e le molala, e ntelela. Naga ka moka e senyegile, ka ge go se motho wa kelelo. 12Meboto ka moka ya lešokeng e tletšwe ke bašwalalanyi, gobane rumo la Morena le ja batho go fihla mo lefase le gomago thoko tšohle; nama yohle ga e se ne molao. 13Ba bjetše mabele, ba buna meetlwa; ba itapišitše mme ba se holege. Lewang ke dihlong ka tše di le boetšego, ke bjona bogale bja Morena.
14O realo Morena ge a bolela le bohle ba babe ba ke agilego nabo, ba ba išitšego naga ya ka diatla, naga ke e neilego tšhaba sa Isiraele. O re le tsebe ge e le nna ke ba tomolago mo mmung wa gabobona; moloko wa Juda le wona ke tlo o tomola mo go bona. 15Fela, e tlo re ge ke ba tomotše, ke tlo buša ke ba gaogela, ka ba bušetša felo fa, ba boela magaeng a bona bohle, bohle ba boela mo nageng ya gabo. 16Mme e tlo re ge ba ka ithuta ruri mokgwa wa setšhaba sa ka, ba ena ka leina la ka ba re: Ka bophelo bja Morena! Boka mola ba tlwaetša tšhaba sa ka keno ya ka Baali, ke mo ke tlogo ba agiša le setšhaba sa ka. 17Fela, ge ba sa kwe, gona tšhaba se ke tlo se tomola fa, ya ba go se tomola le go se senya. O realo Morena.
