JEREMIA 15

₁Morena a fetola a re: Le ge fa pele ga ka go ka ema Moshe le Samuele, tšhaba se nka se kgone go se setša. Ba rake ba tloge fa pele gaka. ₂Ge ba ka botšifša ba re: Re tloge re ye kae? O ba botše o re: Morena o re: Wa lehu a ye lehung. Wa lerumo a ye lerumong. Wa tlala a ye tlaleng. Wa kgolego a ye kgolegong. ₃Gobane ke tlo rapa dilo tša mehuta e mene tša go tlo ba wela godimo. O realo Morena. E tlo ba lerumo la go bolaya; e tlo ba dimpša tša go kokona; le manong a sebakeng, le dibata tša naga, tša go tlo ja le go senya. ₄Ke tlo ba dira setšhošetši mo go mebušo yohle ya lefase ka baka la Manase morwa wa Hiskia kgoši ya Juda, ka baka la tše a di dirilego fa Jerusalema.

₅Ruri, Jerusalema, ke mang a tlogo go gaogela? O kwelwa bohloko ke mang? Ke mang a tlogo go hlola a botšiša maphelo? ₆Morena o re: Nna o ntahlile wa ya mo o tšwago. Nna bjalo ke akga letsogo la go go fediša; ke tennwe ke go go šokelwa. ₇Ka ba fefera ka leselo mo kgorong tša naga ye, ka ba hlakola bana, ka fediša tšhaba sa ka; mme bona ba se lahle tsela tša bona. ₈Ke atetšwe ke basadi ba bahlologadi go fetiša šabašaba la lewatle; mme bommago masogana ao ke ba tlišetša sehulamosegare. Ba tlo tšhoga ke ba ribegetša ka tlalelo le ka tše di šiišago. ₉Mmago bana ba šupago o fedile maatla, o a hwa. O dikelelwa ke letšatši lagwe e sa le mosegare; o lewa ke dihlong, o a hloboga. Mašalela a bona ke a gafela tšhoša ge go tla manaba a bona. O realo Morena.

₁₀Joo nna joo! Mma! O ntswaletšeng ka ba motho wa dikgang le wa dintwa tša lefase lohle? Ga ka adima; ga ka adingwa; mme bohle ba a nthoga. ₁₁Morena o re ruri, ke go šadišetša tše dibotse. Lenaba ke tlo le tliša fa la ba la go rapela ka mohlamobe, ka mohla wa kotsi. ₁₂A tshipi e ka robja, yona tshipi ya leboa ya mphiri?

₁₃Maruo a gago le thoto ya gago ke di gafela go thopiwa go se theko. Molato ke dibe tša gago tšohle tša mo dileteng tša gago ka moka. ₁₄Mme ke go lesa wa tloga le manaba a gago wa ya nageng ye o sa e tsebego; ka gobane bogale bja ka bo fehla mollo o tlogo le fiša.

₁₅Go tseba wene Morena. A ko se ntebale, o tle o ntlhole, o ntefeletše go ba ntlhomarago. O se ntese ka gogolwa o sešo wa ba felela pelo; o tsebe gore ke ka baka lago ge ke gobošwa. ₁₆Mantšu a gago a hweditšwe ya ba dijo tša ka; mantšu a gago a nkušitše pelo a nthabiša, ke ekwa ke bitšwa ka leina lago, Morena Modimo wa mašaba. ₁₇Ga ke ešo ka ka ka dula le bakweri ka thabišana nabo; ke dula ke nnoši ka baka la atla sa gago, o ntladitše tshelekego. ₁₈Ke go reng bohloko bja ka bo se sa kgaotša, ntho ya ka e sa alafege e sa fole? A ke tla fela ke go hwetša o le diba se se gopilego, se se sa botegego?

₁₉Bjale Morena o re: Ge o boa, ge nna ke go bušetša fa, o tlo ema pele ga ka. Ge o tlo hlaola tše di rategago, wa lahla tše di nyatšegago, gona o tlo ba molomo wa ka. Bona ba tlo boela go wene; ga se wena o tlogo boela go bona. ₂₀Wena ke go dira morako wo o tiilego wa mphiri mo setšhabeng se. Ba tlo lwa nago; mme ba ka se ke ba go kgona; gobane e a tlogo ema nago ke nna; ke tlo go hlakodiša; ke tlo go namolela. O realo Morena. ₂₁Ke tlo go namolela diatleng tša babe; ke tlo go ntšha diatleng tša ba sehlogo.