Jeremia o a lla, o a rapela, o eletša setšhaba
1Dibe tša Juda di ngwadilwe, tša tlokwa ka tshipi, le ka ntlha ya legakabje mo mahlakoreng a dipelo tša bona. 2Le dialetare di na le maswao a bana ba bona; le dikokwane tša bona di mo dihlareng tše tala mo mebotong e megolo. 3Wene thaba ya ka, o lego gare ga melala, mahumo a gago, le matlotlo a gago ka moka, ke di gafela go thopiwa, le meboto yago ya medimo, ka baka la dibe ka moka tša mo dileteng tša gago. 4Nageng ye ya geno ye ke go neilego yona, o tlo tšwa ka molato wago. Ke tlo go dira molata wa manaba ago nageng ye o sa e tsebego; gobane le fehlile mollo ka bogale bja ka; mme o tlo tuka go ya go ile.
5Morena o re: Molahlegi e tlo ba monna yo a botilego batho, a re atla sa ka ke yona nama ye; mme pelo ya gagwe ya lahla Morena. 6O tlo etša sehlašana sa lehanateng; a ka se ke a bona tše bolo di mo tlela; o tlo dula mo nageng e tshehla, dikgalaopeng mo go sa dulego motho. 7Ditšhegofatšo di tlo tlela yo a botago Morena, yo Morena e lego moholofelwa wagwe. 8O etša sehlare sešengwameetseng, seišamedu mo nokeng. Le ge go fiša, ga se kwe selo; mahlare a sona e fela e le a matala; le ka ngwaga wa lenyora ga se tšhoge selo, ga se lese go enywa. 9Pelo ke yona mmatamaanomabe, ke yona lešaedi; e hlathwa ke mang? 10E hlathwa ke nna Morena, ke fetlago letswalo, ke tlogo nea motho tše di lebanego tsela tšagwe, tše di lekanego dikenyo tša mediro yagwe. 11Mogaramahumo ka bobe o etša kgwale, e rego ke phaphaše e sešo ya beela. O tlo a tlogela, matšatši a gagwe a sešo a fela, a tloga e le lešilo. 12Go tloga mathomong felo ga sekgethwa sa rena ke sedulo sa bogoši se phagamilego sa letago. 13Morena, kholofelo ya Isiraele ke wena; ba ba go ngalago bohle ba tlo lewa ke dihlong. Ba ba go lahlago, maina a bona a ngwalwa mmung, gobane ba hlala Morena, yena sediba sa meetse a phelago.
14Morena mphodiše, ke mo ke tlogo fola. Mphološe, ke mo ke tlogo phologa; gobane sereto sa ka ke wena.
15Šeba ba ba rego: Di kae tše Morena a di boletšego? A di tšwelele!
16Ge e le nna ga ka gana go go šala nthago, ke le modiši wa gago. Tšatši le lebe le ga la ratwa ke nna; le wene o a tseba. Tše di tšwilego molomong wa ka di pepeneng pele ga gago. 17O se mphetogele tšhogo mola o le setšhabelo sa ka sa mohla mobe. 18Ba ba ntlhomarago a e be bona ba go lewa ke dihlong, e sego nna. A go tšhoge bona, e sego nna. Letšatši la bošula le tlišetše bona; o ba pšhatlaganye o be o boeletše.
19Morena o nthomile a re: Sepela o yo ema mo kgorong ya ba geno, ye dikgoši tša Juda di tsenago ka yona, di etšwa ka yona; o ye le dikgoro tšohle tša Jerusalema, 20O bolele o re: Kwang se Morena a se bolelago, lena dikgoši tša Juda, le bohle ba Juda, le lena baagi ba Jerusalema bohle, ba le tsenago ka dikgoro tše. 21Morena o re: Itoteng! Le se ke la rwala merwalo ka tšatši la Sabatha, la tsena nayo ka dikgoro tša Jerusalema. 22Le nywakong ya lena le se ke la tšwa le rwele merwalo ka tšatši la Sabatha; go se ke gwa ba le modiro wo le o swarago; le kgethe tšatši la Sabatha ka mo ke laetšego botataweno ka gona. 23Bona ba gana go kwa, ba se theeletše, ba šatalatša melala ya bona gore ba se kwe; ba gana go laiwa.
24Fela, ge lena le ka kwa se ke se bolelago, o realo Morena, la se ke la tsena ka dikgoro le rwele merwalo ka la Sabatha, la kgetha tšatši leo la Sabatha ka go lesa go dira mediro ka lona, 25Gona ka dikgoro tša motse wo go fela go tlo tsena dikgoši le bakgoma ba go dula sedulo sa Dafida; ba tlo tsena ka dikoloi le ka dipitsi ba na le matona a bona, le banna ba Juda, le baagi ba Jerusalema; mme motse wo o tlo dulwa go ya go ile. 26Ba tlo tla ba etšwa metseng ya Juda le tikologong ya Jerusalema, le nageng ya Benyamini, le melaleng le dithabeng, le thoko ya borwa, ba tlo tliša dihlabelo le dibego le diorelo, ba tlo tla le dileboga Ngwakong wa Morena. 27Fela, ge le sa kwe se ke se bolelago, le sa kgethe tšatši la Sabatha, le sa lese go rwala morwalo la tla nayo dikgorong tša Jerusalema ka tšatši la Sabatha, gona ke tlo tšhuma mollo dikgorong tša motse wo, wo o tlogo fiša nywako ya mošate fa Jerusalema; mme o ka se ke wa tingwa.
