Bothopša bja nywaga e 70. Manaba a tlo phungwa
1Šele lentšu le le tletšego Jeremia le era setšhaba ka moka sa Juda; ke la ngwaga wa bone wa Joyakima morwa wa Josia kgoši ya Juda; ke wona ngwaga wo Nebukadinetsara a thomilego ka wona go buša Babele. 2Ke lentšu le moporofeta Jeremia a le boletšego a era setšhaba ka moka sa Juda le bohle baagi ba Jerusalema, a re: 3Go tloga ka ngwaga wa lesome la metšo e meraro wa Josia morwa wa Amoni kgoši ya Juda, go fihla lehono, ke nywaga e masome a mabedi a metšo e meraro, ke fela ke tlelwa ke lentšu la Morena ke le botša, ke bolela le sa kwe. 4Le gona Morena o fedile a le romela bahlanka ba gagwe ka moka ka lebaka la gona, bona baporofeta ba gagwe. La gana go theetša le go kwa. 5Ba be ba fela ba re: Boang! Motho a a lahle tsela e mpe ya gagwe, ke mo le tlo go dula nageng ye Morena a e neetšego lena le botataweno ka mehla le ka go sa felego. 6Ba re: Le se ke la latela medimo e šele, la hlankela yona la e khunamela; le se ke la ntsheleka ka mediro ya diatla tša lena, ke se tlo le šulafatša. 7Fela, ga la ka la nkwa, o realo Morena, la dira ka boomo le ntsheleka ka mediro ya diatla tša lena, la ilholela mabošula.
8Molato ke wona woo ge Morena wa mašaba a re: Ke tlo le otla ka gobane le sa kwe ge ke bolela. 9Ge e le nna bjale ke rapa merafo ya kua leboa. O realo Morena. Ke tliša le mohlanka wa ka Nebukadinetsara kgoši ya Babele. Ke ba tliša fa nageng ye, gore ba šwahlele baagi ba yona le ditšhaba ka moka tše di lego tikologong; ke tlo ba lahla moka, ka ba dira setšhošo, le sekwero, le mašope a go ya go ile. 10Mo go bona ke tlo fediša lentšu la tlhalalo le la thabo, lentšu la monyadi, le lentšu la monyalwa, le modumo wa tšhilo, le seetša sa lebone. 11Mme naga ye e tlo ba lehanata le le šiišago; ditšhaba tše di tlo hlankela kgoši ya Babele nywaga e masome a šupago. 12E tlo re ge go fetile yona nywaga yeo ya masome a šupago, ke tlo otla kgoši ya Babele le setšhaba seo, o realo Morena, ka lata molato wa bona le wa naga ya Kaladea, ka e dira mašope a go ya go ile. 13Ke mo ke tlogo phetha tšohle tše naga yeo ke e boletšego ka tšona, le tšohle tše di ngwadilwego lengwalong le, tše Jeremia a di boletšego a era bantle bohle. 14Gobane le bona ba tlo loba ditšhaba tše matla le dikgoši tše kgolo. Ke tlo ba dira se se lebanego mekgwa ya bona le tiro tša bona.
15Gobane Morena Modimo wa Isiraele o boletše le nna a re: Tšea senwelo se sa sebela sa kgalefo atleng sa ka, o se noše ditšhaba ka moka tše ke go romago go tšona. 16Di tlo nwa tša thekgesela, tša tlaela ge go fihla lerumo le ke tlogo le tsenya mo gare ga bona.
17Nna ka amogela senwelo seatleng sa Morena, ka noša ditšhaba ka moka tše Morena a nthomilego go tšona. 18Ke Jerusalema le metse ya Juda, le bakgoma le bagolo ba gona, ya ba go ba dira ba go tlo thubja le go šwalalanywa, le ba go tšhoša ba bangwe, le bao ina la bona e tlogo ba leroga, ka mo go dutšego bjalo le lehono.
19Ke Farao kgoši ya Egipita le bahlanka ba gagwe, le bakgoma ba gagwe, le setšhaba sa gagwe ka moka. 20Ke ditšhabatšhabana ka moka, le dikgoši tša naga ya Utsi ka moka, le dikgoši ka moka tša naga, ya Filisita, le Asekaloni, le Gasa, le Ekironi, le mašalela a Asidodo, 21Le Edomo, le Moaba, le ba Amoni, 22Le dikgoši tša Tiro ka moka, le dikgoši tša Sidone ka moka, le dikgoši tšohle tša dihlakehlakeng tša lewatle, 23Le Dedane, le Thema, le Busi, le bohle ba go phulwa tlopo, 24Le dikgoši tša Arabia ka moka, le dikgoši tša ditšhabatšhabana tša go dula mašokeng, 25Le dikgoši tša Simiri ka moka, le dikgoši tša Elama ka moka, le dikgoši tša Meda ka moka. 26Le dikgoši tšohle tša thoko ya leboa tša kgauswi le tša kgole, ka moka ga tšona, le mebušo yohle ya lefase ka moka. Ge ba nwele ka moka, ke mo go tlogo nwa le Sisaka.
27Gomme o ba botše o re: Morena wa mašaba Modimo wa Isiraele o re: Nwang le tagwe le hlatše, le we le se hlwe le tsoga, ge go tlo fihla lerumo leo ke tlogo le tsenya gare ga lena. 28Ge ba tlo gana go tšea senwelo seo seatleng sa gago, ge ba ka gana go nwa, gona o ba botše o re: Morena wa mašaba o re: Le tlo ba la nwa! 29A le re ge ke thoma ka motse wo o bitšwago ka leina la ka ka otla wona, lena nka le lesa le sa otlwe? Nka se le lese, ka gobane ke biditše lerumo la go tlela bohle ba go dula nageng yeno. O realo Morena.
30Gomme wene, e tlo re ge o goelela mantšu a ka moka, o ba botše o re: Morena o a bopa, o kua legodimong; o hlaba mokgoši a le boagong bja gagwe bjo bokgethwa; o kwatša legoa mmotong wa gagwe; o goelela bjalo ka bafotli ba morara, o ra baagi bohle ba lefase. 31Mokgoši o tlo ba wa fihla le kua lefase le gomago gona, gobane Morena o sekišana le ditšhaba, o ahlolela batho bohle; ba babe o tlo ba gafela lerumong. O realo Morena.
32Gobane Morena wa mašaba o re: Tsebang, bošula bo a tla, ke bjo bo tlogo hlakanya tšhaba tšohle. Go tsogile dimo le legolo kua merumong ya lefase. 33Mehleng yeo babolawa ba Morena ba tlo tlala naga mo go fela thoko tšohle go ya kua dipheletšong tša yona. Ba ka se llelwe, ba ka se kukwe ba bolokwa, ba tlo ba morole mašemong.
34Hee lena badiši! Llang le gololeng! Ripitlang mmung, lena dipudi tša marwerwe tša mehlape, gobane go fihlile mehla ya go hlabja ga bolena, gore le phumege boka pitšatshetšwa. 35Mme badiši ba tlo senyegelwa ke motšhaba, le diphoko tša marwerwe di tlo šitwa go phonyokga. 36Badiši ba hlaba mokgoši; go kwala mollo wa dipudi tša marwerwe; Morena o senya mafulo a tšona. 37Meboto ya molao e senyala ge go fihla mollo wa bogale bja Morena. 38O tšwa boka tau segoleng. Joo, naga ya bona e fetogile lehanata, ka bogale bja lerumo le fenyago, ka mollo wa bogale bjagwe.
