JEREMIA 27

₁Mathomong a pušo ya Tsedekia morwa we Josia kgoši ya Juda, Jeremia o tletšwe ke lentšu la Morena, a re: ₂Morena o boletše le nna a re: Itirele dithala le dijoko, o di rwale molaleng. ₃O di romele go kgoši ya Edomo le go kgoši ya Moaba, le go kgoši ya ba Amoni, le go kgoši ya Tiro, le go kgoši ya Sidone. O di romele ka batseta ba ba tlilego Jerusalema go Tsedekia kgoši ya Juda. ₄O ba laelele go beng ba bona, o re: Morena wa mašaba Modimo wa Isiraele o re: Botšang beng ba lena le re: ₅Lefase le batho le tšohle tše di phelago lefaseng di dirilwe ke nna ka maatla a ka a magolo, ke emišitše tsogo la ka. Gomme ke di nea yo ke ratago go mo nea. ₆Bjale naga tše ka moka ke di gafela diatleng tše Nebukadinetsara kgoši ya Babele mohlanka wa ka. Le diphoofolo tša naga ke mo neile gore di mo hlankele. ₇Mme ditšhaba ka moka di tlo mo hlankela, yena le morwa wa gagwe; go be go tle lebaka, leo naga ya gagwe le yena, ba tlogo loba ditšhaba tše kgolo le kgoši tše kgolo.

₈Ge go tlo ba le setšhaba, le ge e le mmušo o tlogo gana go loba Nebukadinetsara kgoši ya Babele, o sa rate go tsenya molala jokong ya gagwe, setšhaba seo ke tlo se tlela ka lerumo le ka tlala le ka dinkhu, o realo Morena, ka tlo ba ka se fediša ka seatla sa gagwe. ₉Bjale lena, le se ke la kwa se se bolelwago ke baporofeta ba lena, le didupe tša lena, le diloro tša lena, le dinoge tša lena, ge ba le botša ba re: Le se ke la ba balata ba kgoši ya Babele. ₁₀Gobane ba le porofetela maaka, mme le tlo ba la khudušwa mo nageng ya lena, ke le rakile gore le senyege. ₁₁Fela, ge setšhaba se ka tsenya molala wa sona jokong ya kgoši ya Babele, sa loba yena, gona ke tlo se dudiša nageng ya sona, sa lema sa aga mo go yona. O realo Morena.

₁₂Le Tsedekia kgoši ya Juda ke mmoditše mantšu ao ka moka, ka re: Tsenyang melala ya lena jokong ya kgoši ya Babele, le hlankele yena le batho ba gagwe; ke mo le tlogo phela. ₁₃Wene le tšhaba sa gago, le hwelang ke lerumo le ka tlala le ka dinkhu? Ke tšona tše Morena a di botšago setšhaba se se sa ratego go loba kgoši ya Babele. ₁₄Lesang go kwa se baporofeta ba se bolelago, ba re: Le se ke la loba kgoši ya Babele! Gobane ba le porofetela maaka. ₁₅Gobane ga ba rongwa ke nna. O realo Morena. Ba porofeta maaka ka leina la ka, gore ke be ke le rake le yo senyega, lena le baporofeta bao ba le porofetelago.

₁₆Le baperisita le setšhaba ka moka ke ba boditše ka re: Morena o re le se ke la theetša se baporofeta bao ba se bolelago ba re: Tsebang, dibjana tša Ntlo ya Morena di tlo tloga di boela fa di etšwa Babele ka gobane ba le porofetela maaka. ₁₇Le se ke la ba kwa. Lobang kgoši ya Babele; ke mo le tlogo phela. Motse wo le o direlang lešope? ₁₈Ge baporofeta e le bona, ge lentšu la Modimo le na le bona, gona a ba kgopele Morena gore thoto ye e šaletšego mo Ngwakong wa Morena le dintlong tša kgoši ya Juda le mo motseng wa Jerusalema, di se ke tša išwa Babele.

₁₉Gobane Morena wa mašaba o boletše dikokwane, le sehlapelo se segolo, le dikoloinyana, le thoto e šetšego motseng wo. ₂₀Tše Nebukadinetsara kgoši ya Babele a di tlogetšego mola a thopa Jekonya morwa wa Joyakima kgoši ya Juda fa Jerusalema a mo iša Babele le bohle bakgomana ba Juda le Jerusalema.

₂₁Gomme Morena wa mašaba Modimo wa Isiraele o boletše thoto ye e šaletšego fa Ngwakong wa Morena le ngwakong wa kgoši ya Juda, a re: ₂₂Di tlo išwa Babele tša yo dula gona, go fihla ge ke tlo di hlola, ka di rwala, ka di bušetša felo fa. O realo Morena.