Isiraele a a sokologe a tle a gaogelwe
1Go thwe ge monna a hlala mosadi, mosadi a tloga a yo tšewa ke monna e mongwe, a monna yola o sa tlo boela go mosadi yo? A e ka se be go senya naga wa go e goboša? Bjalo wene ge o otswitše le baratwa bago ba bantši, a o re o sa tlo boela go nna? 2Lelaletša mahlo o bone meboto, ge go sa na le mmoto mo o sa kago wa itahla, wa dula hleng ga tsela o ba letetše, boka ba šokeng ge ba lalela batho, wa goboša naga ka bootswa le ka mahlola ago. 3Le ge o tingwa pula, le ge o hlokišwa le medupi, o nne phatla ya seotswa, o gana go ba le dihlong.
4Bjale gona ke mo o bitšago nna wa re: O Tate; O moratwa wa ka wa mola ke sa le yo mofsa! 5A o wa sekgoro se se sa felego, wa dula o na naso go ya go ile? -- O be o fela o realo, o fela o dira makgopo; e le yona tsela yago.
6Mehleng ya kgoši Josia Morena O boletše le nna a re: A fa o di bone tše di dirilwego ke Isiraele mohlanogi yo? O ile le dithaba tše telele tšohle, le dihlare tšohle tše ditala, a dira bootswa. 7Nna ka re: O tla re ge a feditše go dira tšeo ka moka, o tlo ba a boela go nna; mme a se boe. Juda ngwanabo, yo le yena e lego mohlanogi o di bone. 8Mme nna ka bona, Juda ngwanabo wa mohlanogi a sa boife ge ke hlala Isiraele, mohlanogi yo, ka baka la bootswa bjo a bo dirilego bjohle; ka ba ka mo nea lengwalo la tlhalo. Le yena Juda a ya le bootswa. 9Bjale naga e senyetše ka tumo ya bootswa bjoo bja gagwe, ge a itšhilafatša ka medimo ya maswika le dikwata. 10Gomme le ge tšeo ka moka di dutše bjalo, Juda ngwanabo wa mohlanogi ga a ka a boela go nna ka pelo ya gagwe yohle, ge e se ka maaka fela. O realo Morena.
11Morena o re: Isiraele moarogi yola o kaone ge ke mo lekanya le Juda ngwanabo wa mohlanogi. 12Yaa o lebe thoko ya leboa, o goelele o re: Boa, wene Isiraele moarogi. O realo Morena. O re: Nka se go gerule, gobane ke yo botho; nka se go ngangele bogale go ya go ile. 13Fela, o tsebe molato wa gago ge o hlanogetše Morena Modimo wa gago, o buduša ditsela tša go ya go bantle, dihlareng tše tala tšohle, wa se hlwe o ekwa ge nna ke go bitša. O realo Morena.
14Boang lena bana ba bahlanogi! Morena o realo; o re: Mong wa lena ke nna. Ke tlo le amogela ka go ntšha o tee motseng, babedi molokong, ka le tliša fa Tsione. 15Ke tlo le nea badiši ba ba kwanago le pelo ya ka, ba go tlo le diša ka tsebo le bohlale. 16Morena o re: E tlo re le atile la ba ba bantši mo nageng mehleng yeo, go ka se ke gwa thwe: Polokelo ya Morena; gobane e ka se hlwe e eba le e a e elelwago ka pelong, le e a e hlolago; go ka se hlwe go dirwa e nngwe. 17Mehleng yeo, se ba tlogo re ke madulo a Morena, ke Jerusalema; ke mo bantle bohle ba tlogo bothelwa gona, ba tlela ina la Morena, motse wa Jerusalema; ba ka se hlwe ba eya le bothata bja dipelo tše mpe tša bona. 18Mehleng yeo ba moloko wa Juda ba tlo eletšana le ba moloko wa Isiraele, ba tlo tla gammogo ba etšwa nageng ya leboa, ba tla fa nageng ye ke e neilego botatabo ya ba magae a bona.
19Ke nna ke bego ke re: A nke ke le dire bana, ke le nee naga ye e rategago, magae a phalago ohle a bantle; mme ke tlo re Ke nna tataweno. Ke be ke re le ka se ke la ntlhanogela. 20Fela, lena ba leloko la Isiraele, le ntahlile wa mosadi ge a lahla monna. O realo Morena. 21Theetšang, mebotong, go kwala sello le go tsetsela ga Baisiraele, ka gobane tsela e ba senyegetše ba lebetše Morena Modimo wa bona. 22Boang, lena bana ba bahlanogi, ke le alafe bohlanogi!
Ke rena ba; re tla go wene, gobane Modimo wa rena ke wene Morena. 23Ka kgonthe, tša kua mebotong, le tša mašata dithabeng, ke go fora. Ruri go phološwa ga Isiraele go mo go Morena Modimo wa rena. 24Gobane e sa le mola re le bana, tše botatawešo ba di ruilego di be di metšwa ke tša dihlong; ke dinku tša bona, le kgomo tša bona, le barwa ba bona, le banenyana ba bona. 25Re ripitla dihlonyeng tša rena, kobo ke kgobogo, ka gobane re senyetše Morena Modimo wa rena, rena le botatawešo, e sa le mola re belegwa, le nankhono. Ga ra ka ra theetša ge Morena Modimo wa rena a bua le rena.
