Ba moloko wa Rehaba
1Lentšu le le tletšego Jeremia le etšwa go Morena mehleng ya Joyakima morwa wa Josia, šele: 2Yaa go ba moloko wa Rehaba, o bolele le bona, o ba tliše Ngwakong wa Morena phapošing e nngwe ya wona, o ba tšhelele sebela sa morara. 3Ka ya ka boa le Jaasanya morwa wa Jeremia, le Habatsinya le bana babo, le bana ba gagwe ka moka, le bohle ba moloko wa Rehaba. 4Ka ba tliša Ngwakong wa Morena phapošing ya barwa ba Hanane morwa wa Jigidalia monna wa Modimo, mo go bapetšego le phapoši ya bagolo, ka godimo ga phapoši ya Maaseya morwa wa Salume moleti wa mokajo. 5Banna bao ba ga Rehaba ka ba tlišetša dibjana tše di tletšego sebela sa morara, ka re: Nwang, morara šo!
6Bona ba re: Ga re nwe sebela, gobane tatawešo Jonadaba morwa wa Rehaba o re laetše a re: Le se ke la nwa sebela, lena le bana ba lena go ya go ile. 7A re: Le se ke la ikagela nywako, le se ke la lema tšhemo, le se ke la šema merara, le se ke la ba le yona. Le dule mekutwaneng mehla yohle ya bophelo bja lena, gore le phele galelele nageng ye le diiletšego go yona. 8Gomme lentšu leo la Jonadaba morwa wa Rehaba tatawešo re latela lona tabeng tšohle tše a re laetšego tšona. Rena le basadi ba rena, le barwa ba rena le barwedi ba rena, ga re nwe sebela sa morara le gatee. 9Le nywako ya go dula ga re e ikagele, le merara le mašemo le dipeu, ga re natšo. 10Re dula mekutwaneng, re eya ka tše Jonadaba tata wešo a re laetšego tšona, re dira tšona. 11E itse ge Nebukadinetsara kgoši ya Babele a rotoga a etla nageng ye, ra re: A re yeng Jerusalema, re tšhabe dira tša Bakaladea le tša Basiria! Ra tla ra dula fa Jerusalema.
12Ke mo lentšu la Morena la nago la tlela Jeremia la re: 13Morena wa mašaba Modimo wa Isiraele o re: Yaa o bolele le banna ba Juda le baagi ba Jerusalema, o re: Le reng le gana go laiwa, le go kwa se ke se bolelago? O realo Morena. 14Hleng go tiile mantšu a Jonadaba morwa wa Rehaba a a a laetšego bana ba gagwe, a re ba se ke ba nwa sebela sa morara. A tiile le nankhono, ka gobane ba ya ka taelo ya tatabo. Gomme nna ke fedile ke bolela le lena; mme lena ga la ka la nkwa. 15Ka fela ke le romela baporofeta, bahlanka ba ka bohle; ka ba roma ba re: Boang, bohle, le lahle tsela tše mpe tša lena, le mediro ya lena e be ya go loka; le lese go latela medimo e šele le go e hlankela; ke mo le tlogo dula mo nageng yeno ye ke e neilego lena le botataweno. Gomme le ganne go theetša le go nkwa. 16Ge e le bana ba Jonadaba morwa wa Rehaba, bona ba tiišitše taelo ye tatabo a ba laetšego yona. Fela, tšhaba se ga se kwe se nna ke se bolelago. 17Bjale Morena wa mašaba Modimo wa Isiraele o re: Tsebang! Setšhaba sa Juda le baagi ba Jerusalema bohle, le tlo ba tlišetša mabošula ka moka a ke a boletšego ke era bona, molato e le ge ba sa ka ba kwa, ba sa ka ba araba ge ke bitša.
18Ba moloko wa Rehaba Jeremia o boletše nabo a re: Morena wa mašaba Modimo wa Isiraele o re: Ka gobane le theeditše taelo ya Jonadaba tataweno, le šetša tšohle tše a le laetšego tšona, le dirile ka mo a le laetšego ka gona. 19Ke ka baka leo ge bjale Morena wa mašaba Modimo wa Isiraele a re: Jonadaba morwa wa Rehaba a ka se ke a ba a hloka motho wa go ema pele ga ka go ya go ile.
