Jeremia o eletša mašalela
1Gomme balaodi ka moka ba madira, ba na le Johanane morwa wa Karea morwa wa Hosaya, le batho ka moka, bagolo le ba banyenane, ba batamela, 2Ba tla go moporofeta Jeremia ba re: Kwaa se re se kgopelago. Re rapelele go Morena Modimo wa gago, rena le mašalela ka moka. Re be re le ba bantši; bjalo re šetše re le bakaenyana, ka mo o re bonago ka mahlo a gago. 3Morena Modimo wa gago a a re laetše tsela ye re kago e swara; a re botše se re kago se dira.
4Moporofeta Jeremia a fetola a re: Ke le kwele. Tsebang gore ke le rapelela go Morena Modimo wa lena bjalo ka ge le boletše. Gomme mantšu ka moka, a Morena a tlogo fetola ka ona, ke tlo le botša; nka se ke ka le utela le letee.
5Bona ba bolela le Jeremia ba re: Morena a e be yena hlatse ruri, yena Mmotegi, hlatse ya go tseba gore re tlo dira ka mo Morena Modimo wa gago a tlogo go fetola a era rena. 6Lentšu la Morena Modimo wa rena, yo re go romago wa re yela go yena, re tlo le latiša le ge e ka ba le lebotse, le ge e ka ba le lebe, gore re letlelwe ka go kwa se Morena Modimo wa rena a se bolelago.
7Ge go fetile matšatši a lesome, Jeremia a tlelwa ke lentšu la Morena. 8Jeremia a bitša Johanane wa Karea, le balaodi bohle ba madira ba ba bego ba na nae. Le batho bohle, ba bagolo le ba ba nyenyane. 9Jeremia a ba botša a re: Morena Modimo wa Isiraele, yo le nthomilego ka ya go yena ka le rapelela, o re: 10Ge le ka dula nageng yeno, gona ke tlo le agiša ka se le thube; ka tlo le hloma ka se le tomole; gobane ke kwa bohloko ge ke bona bošula bjo ke le dirilego bjona. 11Le se ke la boifa kgoši ya Babele ye le e boifago. Morena o re: Le se mmoife, gobane ke na le lena; ke tlo le phološa, ka le namolela diatleng tša gagwe. 12Ke tlo hwetšiša kgaogelo; o tlo le gaogela, a le bušetša nageng ya lena.
13Fela, ge le ka re: Ga re sa rata go dula nageng ye, e tlo ba go gana go kwa tše Morena Modimo wa lena a di bolelago. 14Ge le re: Aowa, re ya nageng ya Egipita kua re ka se kego ra bona ntwa, re ka se kego ra kwa phalafala ge e lla, re ka se kego ra welwa ke tlala ya bogobe, re tlo ya ra dula gona. 15Ge le ka realo, gona kwang se Morena a se bolelago a era bolena mašalela a Juda. Morena wa mašaba Modimo wa Isiraele o re: Ge le ka tiiša go napa le lebišitše mahlo a lena Egipita, go yo diilela kua, 16Gona lerumo le le le boifago le tlo le hwetša gona kua Egipita, le tlala ye le e tšhabago e tlo le šala nthago, la tlo hwela gona kua Egipita. 17Ke mo banna bao bohle ba ba lebišeditšego difahlgo Egipita go yo diilela gona, ba tlogo hwa ka lerumo, le ka tlala, le ka lehu le lebe. Go ka se ke gwa šala le o tee wa go tlo phonyokga kotsi ye ke tlogo e tliša godimo ga bona.
18Gobane Morena wa mašaba Modimo wa Isiraele o re: Bjalo ka ge ke tšholletše bogale bja ka le pefelo ya ka godimo ga baagi ba Jerusalema, le lena, ge le ka ya Egipita, ke tlo le dira ka mokgwa woo, la tlo ba leroga le setšhošo le sekwero le digoboga; mme felo fa le ka se ke la hlwa le go bona.
19Lena mašalela a Juda, Morena o ra lena ge a re: Se yeng Egipita. Le tsebe se ke le bodišego sona lehono. 20Gobane le be le ikgantšha mola le nthoma go Morena Modimo wa lena, la re: Re rapelele go Morena Modimo wa rena; la re: Tšohle tše Morena Modimo wa rena a tlogo di bolela, o tlo re botša ra di dira. 21Lehono gomme, ge ke le botša, le gana go kwa lentšu la Modimo wa lena, le tšohle tše a ntaetšego tšona ka le botša. 22Bjale le nape le tsebe gore felo fala le ithatelago go ya gona, le yo hwela gona ka lerumo le ka tlala le ka dinkhu.
