Dikotlo di bitšwa ke mabosenyi
1Yang le mekgoba ya Jerusalema, le lebelele le botšiše, le tsome mo mapatlelong a gona. Ge le ka hwetša motho a dirago ka molao, molata therešo, Ke tla ba lebalela. 2Ba fela ba re: Ka Morena! Mola e le go ena maaka. 3Morena, mahlo a gago a bona therešo. O ba otlile, bona ba se kwe bohloko. O ba fodišitše, bona ba gana go laiwa. Ba thatafatša phatla tša bona, tša phala mabje ka bothata; ba gana go boa. 4Nna ke be ke re: Ba dirwa ke bobotla; ba dira tša bošilo ka go se tsebe tsela ya Morena le mokgwa wa Modimo wa bona. 5Ka re: A nke ke ye go bagolo, ke bolele nabo; gobane bona ba tseba tsela ya Morena le mokgwa wa Modimo wa bona. Anthe e tloga e le bona ba robilego joko, ba kgaola ditlemo. 6Molato ke wona woo, ge tau ya sekgweng e ba bolaya, ge phiri ya lešoka e ba šwalalanya, ge nkwe e lalela metse ya bona. E a tšwago o a lewa. Ke ka gobane go godile bokgelogi mo go bona; dikarogo tša bona ga se ka go befa. 7Nka go lebalela bjang tše bjalo? Bana bago ba ntahlile, ba ena ka tše e sego Modimo. Le ge ke ba enišitše, ba ntlhadile, ba bokelana mo ngwakong wa seotswa. 8Ba etša dipitsi le poo tša go nona, motho a kganyoga mosadi wa wa gabo. 9A nka lesa go lefetša dilo tšeo? O realo Morena. Setšhaba sa mohuta woo a pelo ya ka e ka lesa go se otla? 10Namelang merako ya gona le e phušole, le ge e se go fedišetša ruri; thenang makala a morara, gobane ga se a Morena. 11Gobane ke leloko la Isiraele le ba leloko la Juda ba ntlhanogeletše sa ruri. O realo Morena.
12Ba latotše Morena ba re: Ga se yena; ba re: Re ka se tlelwe ke bošula, re ka se bone tlala le lerumo. 13Ba re: Baporofeta ba tlo etša phefo ye e fetilego, ba re: Ga ba ne lentšu la Modimo, a ba diregelwe tšona tšeo bona beng. 14Bjale Morena Modimo wa mašaba o re: Ge le realo, gona le tsebe gore lentšu la ka Ke tlo le bea melomong ya lena mme ya ba mollo wo setšhaba se e tlogo ba dikgong tša wona, mme ba fišwa ke wona.
15Hee lena ba leloko la Isiraele! Tsebang gore Ke tlo le tlišetša setšhaba sa kgole. O realo Morena. Setšhaba se maatla, setšhaba sa bogologolo, sa mmolelo wo le sa o tsebego, se le sa kwego se se se bolelago, 16Sa dikgotlopo tše kago mabitla a bulegilego, sa banna ba bagale bohle. 17Ba tlo ja tše o di bunago, le bogobe bja gago; ba tlo ja barwa ba gago le barwedi bago; ba tlo ja dinku tša gago le dikgomo tšago; ba tlo ja merara yago le mego ya gago. Metse ya gago ya dibo ye o e botilego, ba tlo e hula ka lerumo.
18Le ge go le bjalo, le mehla yeo nka se ke ka le fedišetša ruri, O realo Morena. 19Gomme ge ba tlo re: Ke ka baka lang ge Morena Modimo wa rena a re dira tšona tše ka moka? O tlo fetola wa re: Bjalo ka ge le ntahlile, la hlankela medimo e šele le le fa nageng ya geno, le yo hlankela batho ba šele le le kua nageng e sego yeno.
20Botšang ba leloko la Jakobo, le goelele mo nageng ya Juda le re: 21Theetšang lefoko le, lena setšhaba sa bošilo se se se nago mogopolo, sa mahlo a a sa bonego, sa tsebe di sa kwego. 22A ga le mpoife? O realo Morena. A ga le tšhoge pele ga ka? Mola e le nna ke beilego boto la lewatle ka mašabašaba, mollwane wa lona wa mehleng, wo le ka se kego la o sela. Le ge lewatle le befetšwe, ga le kgone selo; le ge maphoto a lona a duma, a ka se fete moo. 23Fela, tšhaba se se na le pelo e bonganga e sa kwego; ba hlanogile, ba sepetše. 24Dipelong tša bona ga ba sa re: A re boifeng Morena Modimo wa rena, yena wa go re fa pula ya kgogolamoko le tsheola lebakeng la gona, a re lotolela mehla le mabaka a go buna. 25Makgopo a lena a le hlokišitše tšeo; tše di botse le ithibeletše tšona ka dibe tša lena.
26Mo gare ga setšhaba sa ka go na le ba babe, ba ba lalelago motho bjalo ka barei ba nonyana; ba epa moreo, mme go tanywa batho. 27Nywako ya bona e tletše tša bohodu bjalo ka serobe ge se tletše dinonyana. Ke tšona tše di ba dirago ba bagolo, mme ba huma. 28Ba nonne, ba tagile, mme ba feta ba babe ka bobe; go ahloleng ga ba bone taba; tabeng ya sešuana go atlega bona; gomme wa modiidi ga ba mo emele.
29A nka lesa go ba lefetša tše bjalo? O realo Morena. Setšhaba sa mohuta o bjalo, a pelo ya ka e ka lesa go se otla? 30Ke tše di tšhabegago, le tše di tšhošago, tše di dirwago nageng yeno. 31Le baporofeta ba porofeta maaka, mme baperisita ba dirišana nabo; mme setšhaba sa ka se rata tše dibjalo. Ge di iša mafelong, le tlo dira bjang?
