JOBO 12

₁Jobo a fetola a re: ₂Ka kgonthe, batho ke bolena; mohla le hwago, le bohlale bo tlo ba bo hwile. ₃Fela, le nna ke ne pelo boka lena; ga le na se le mphetago ka sona. Dilo tšeo di ka šita mang? ₄Nna ke fetogile wa go kwerwa ke ngwanešo, nna ke bego ke rapela mme ka kwewa ke Modimo; go kwerwa nna moloki le sethakga. ₅Madimabe a nyatšwa ke yo a kwago bose; o re: A beetšwe ba dinao tše di thelelago. ₆Metse ya mahodu e na le malao; boiketlo bo go bao ba lwago le Modimo, bao Modimo a išago dilo mo atleng tša bona. ₇Upša o botšiše diphoofolo, di go rute; botšiša dinonyana tša godimo, di go botše. ₈Bolela le lefase, le go rute; le hlapi tša lewatle di go hlalosetše. ₉Dilo tše, ke mang a sa bonego mo go tšona ge di dirilwe ke seatla sa Morena? ₁₀Bophelo bja diphedi tšohle bo mo atleng tša gagwe, le moya wa mo mebeleng ya batho bohle. ₁₁Tsebe e hlaloganya dipolelo; go tsefago dijo ke ka mo ganong. ₁₂Bohlale bo go hlogotšhweu; tlhaloganyo e tla ka bontši bja matšatši. ₁₃Bohlale le maatla di mo go yena; maano le temogo ke tša gagwe. ₁₄Hleng a phušola, go ka se hlwe go agwa; a tswalelela motho, ga go sa tlo bulwa. ₁₅Hleng a thibela meetse, a a gopa; ge a ka a lesa, a gogola naga. ₁₆Go yena ke mo go lego maatla le bobabaledi; motimedi ke wa gagwe, le yena motimetši. ₁₇Ba dikala o ba raka ba hlakotšwe; o šilofatša baahlodi. ₁₈O tlemolola tlemo tša dikgoši; a di tlema matheka ka thapo. ₁₉Bomphamodimo o ba tloša ba hlakotšwe; le ba maatla o a ba uša. ₂₀Ba ba botilwego o ba šitiša go rera; le bagolo o ba amoga temogo. ₂₁Bakgoma o ba tšhilafatša ka nyatšego; bagale o ba amoga ditlhamo. ₂₂O utolla madiba a leswiswi; le thiti ya lehu o e ntšhetša seeding. ₂₃Ditšhaba o a di godiša, a buše a di senye; ditšhaba o a di atlatša, a buše a di khuduše. ₂₄O thopa pelo ya babuši ba dilete tša mafase, a ba dira baneneri ba mahanateng, mo go sego tsela. ₂₅Ba phapharega mo swiswing go sego seetša; ba hlahlarega boka ba ba builwego.