JOBO 18

₁Gwa fetola Bilidada wa Sua, a re: ₂Le tlo fetša neng go bolabola? Eletšegang, re tsebo bolela. ₃Re reng re sengwa dikgomo, le re lebeletše ka lenyatšo? ₄Wene o ikgagolago o befetšwe, a o re lefase le šale le na le wene o nnoši? A o re lentswe le šie madulo a lona? ₅Aowaa, seedi sa ba babe se tlo tima; mollo wa sebešo sagwe o ka se hlwe o tuka. ₆Seetša mo nywakong ya bona se tlo ba leswiswi; lebone la bona le tlo tima le le godimo ga bona. ₇O tlo lesa go rotoba mme a babaela, a kopišitšwe ke maano a gagwe. ₈Maoto a gagwe a mo iša malokweng, a yo gata go lego moreo. ₉Molaba o mo tanya kokoilane, o kgangwa ke segole. ₁₀Moutlo wa go mo swara o mo mmung, o theilwe mo tseleng. ₁₁O dikwa ke tše šiišago, di mo rakediša mo a yago. ₁₂O fela maatla ka tlala; o laletšwe ke dikotsi tša go tlo mo uša. ₁₃Di tlo mo kgaola ditho, tšona maitšibulo a lehu, di tlo ja ditho tša gagwe. ₁₄O tlo ubulwa mo ngwakong wa gagwe, mo a bego a re: Ke agile! O išwa go kgoši ya tše di šiišago. ₁₅Ngwakong wa gagwe go tlo dula ba mathoko; motseng wa gagwe go tlo lokwa mollo. ₁₆Medu ya gagwe e tlo omelela fase, mme godimo thabe tšagwe di a rengwa. ₁₇Mono fase ga a sa tlo tsebja; a ka se be le ina mo mapatlelong. ₁₈O tlo ba a rakilwe seetšeng, a ile leswiswing; o tlo ba moneneri wa mafase ohle. ₁₉A ka se be le ngwana, ga a na setlogolo setšhabeng sa gabo; ga a na lešalela mo a bego a agile. ₂₀Mohla go tlile letšatši la gagwe go tlabega ba bodikela, le ba bohlabela ba swarwa ke poifo. ₂₁Ke tšona tša go tlela magae a bakgopo; ke tša motse wa go se tsebe Modimo.