1Ya ba gona Jobo a thomilego go bolela, a roga letšatši le a tswetšwego ka lona, 2A napa a bolela a re: 3Ke roga tšatši lela la go tswalwa ga ka, le bošego bjola bja ge go thwe: Re filwe ngwana wa mošimanyana! 4Tšatši lela, a e be la leswiswi; Modimo a a se ke a le šetša godimong; le se hlwe le phadimelwa ke seedi. 5A le bušwe ke leswiswi le thiti ya lehu; a le apešwe ke maru a maso, le boifiše ka phifalo ya mosegare. 6Bošego bjola a bo thopše ke leswiswi, bo se ke bja batagana le matšatši a mengwaga, bo se ke bja tsena ge go balwa a dikgwedi. 7Bošego bjola a e be bja boopa, bo se hlwe bo tlelwa ke mekgolokwane. 8A bo hlolelwe dikotsi ke baloi, bona bao ba go hlohloletša Mamokebe. 9Dinaledi tša moso wa bošego bjola a di time, bo letele seetša mme se hlokwe, bo se ke bja bona dintšhi tša mahuba. 10E be ka gobane bo sa ka bja ntswalelela teng, bo sa ka bja utela mahlo a ka ditapišo. 11Ke go reng ke sa ka ka hwa mola ke belegwa, ka felela ke sa tšwa tswaleng? 12Ba diretšeng ge ba mphara difarong, ge ba nkiša matsweleng ba re ke anywe? 13Ke ge bjale nka be ke ithobaletše ke homotše, ke ile le boroko ke khutšitše. 14Nka be ke le mo go lego ba magoši le balai ba dinaga, bona baikagedi ba marope. 15Goba nka be ke na le bagolo ba bahumi ba gauta, ba ba bego ba tladitše nywako silifera. 16Goba nka be ke se gona wa lefolotšana la go fihlwa, wa maseanyana a go se bone seedi. 17Gona kua dihlola ga di sa na mašata, go khutša ba ba fedilego maatla. 18Gona kua bagolegwa ba dula mmogo ba iketla; lentšu la molaki ga ba le kwe. 19Gona kua, banyane le bagolo ba a swana, mohlanka o phonyokgile mong wa gagwe. 20O direlang ge balapi a ba fa seetša? O reng banyami a ba fa bophelo? 21Baletalehu, bona ga ba le bone, le ge ba le nyaka ba phala baepamahumomautwa. 22Ke bona ba ka bego ba thaba ba hlalala, ba ipshina ge ba bona lebitla. 23Bophelo o reng a bo fa monna wa go timelelwa tsela, yo a thibelwago ke Modimo thoko tšohle? 24Gobane ke fegelwa ke lebane le bogobe bja ka; ditsetselo tša ka di tšhologa boka meetse. 25Gobane ke wetšwe ke se ke bego ke se tšhoga; ke fihletšwe ke se ke bego ke se šia. 26Ga ke role, ga ke lale, ga ke khutše, ka ge go boa mahloko.
