JOBO 32

₁Bjale banna ba bararo bao ba lesa go fetola, ka ge Jobo a sa ipone molato. ₂Elihu morwa wa Barakiele wa Busi wa moloko wa Rama, a galefela Jobo ka ge a re ke lokile, mme a bea Modimo molato. ₃A galefela le bagwera ba gagwe ba bararo bao, ka gobane ba tšwile Jobo le ge ba hlokile la go mmea molato. ₄Yena Elihu o be a sa itshwere, a se bolele le Jobo, ka gobane bala e be e le ba bagolo ba mo feta ka matšatši. ₅Ge a galefa ke ka gobane a bona banna ba bararo bao ba se nago la go fetola Jobo ka lona. ₆Bjale gwa fetola yena Elihu morwa wa Barakiele wa Busi, a re: Nna ke sa le e monyane; lena le ba bagolo, le mpheta ka matšatši; ka itšimeletša mme ke šia go le anegela tše nna ke di tsebago. ₇Ka re: A go bolele matšatši; boati bja mengwaga a bo tšweletše bohlale. ₈Fela, sa mothong ke moya; ke mohemo wa Yomaatlaohle wo o fago motho tlhaologanyo. ₉Ba bagolo ga se bona ba bohlale; batsebi ba toko ga se bakgalabje. ₁₀Ke gona ke rego: Kwaa nna; le nna ke anege se ke se tsebago. ₁₁Ke nna e, ke be ke letetše taba tše le kago bola, ke theeditše taodišo tša lena ge le akanya se le kago se bua. ₁₂Ke be ke le šeditše; gomme šedi, go hlokegile wa go fenya Jobo; e a fetotšego se Jobo a se boletšego, mo go lena gao. ₁₃E se re mohlomongwe le ka re: Re hlakane le bohlale; o tlo kgonwa ke Modimo, e sego motho. ₁₄Ge e le nna, ga ešo a mpolediša; le gona nka se mo fetole ka a lena mantšu. ₁₅Ba gakanegile; ga ba sa fetola; ba feletšwe ke polelo. ₁₆A nka fo dula, ge bona ba sa hlwe ba bua, ba eme ba se sa fetola? ₁₇Lesang go fetole nna ka le e lego la ka, le nna ke bole se ke se tsebago. ₁₈Ditaba mo go nna ke tše dingata, ke kwa moya o ntutuetša ka teng ga ka. ₁₉Teng ga ka go etša sebela; ge se sešo sa thibollwa, se ka phuma nkgo e mpsha. ₂₀Lesang ke bolele ke kgebe pelo, ke ahlame ke fetole. ₂₁Nka se bebe motho sefahlogo; nka se latswe motho ka leleme. ₂₂Go latswa motho ka leleme nna ga ke di kgone; e se mohlomongwe Mmopi wa ka a akgofa go ntloša.