JOBO 36

₁Elihu a iša pele a re: ₂A ko mpeele pelo ka gonyane ke go rute; go sa na le ditaba tša go emela Modimo. ₃Ke tliša tša kgole tše ke di tsebago, ke tiiše la gore Mmopi wa ka o lokile. ₄Gomme ruri dipolelo tša ka ga se tša maaka, o lebana le tsebo e se nago bosodi. ₅O tseba gobane Modimo ke yo mogolo, gomme ga a nyatše motho; ke yo mogolo yo maatla pelong. ₆Ga a phediše yo mobe; o nea babotlana tše di ba swanetšego. ₇Baloki ga a ba gerule, o ba dudiša le dikgoši, madulong a tšona ka mehla; o a ba godiša. ₈Ge ba tlemilwe ka ditshipi, ge ba golegilwe ka ditlemo tša mahloko, ₉ke gona ge a ba lemoša mediro ya bona, le dikarogo tša mola ba ikgodiša; ₁₀a ba thibolla ditsebe gore ba kwe tsholo, mme o ba botša gore dibe ba di lahle. ₁₁E tlo re ge ba kwa, mme ba mo hlankela, gona matšatši a bona a tlo tlala ba le go tše botše, nywaga ya bona e tlo ba ya tše monate. ₁₂Ge ba sa kwe, ba tlo wela marumong, ba felela ka go hloka tlhaloganyo. ₁₃Ba sekgoro dipelong ba dula ba ngadile; ga ba rapele le ge a ka ba tlema. ₁₄Meoya ya bona e hwa e sa le ba bafsa; bophelo bja bona bo hwa e le dihlotlolo. ₁₅Ge e le mohlaki o mo hlakodiša ka mohlako wagwe, o mo thibolla ditsebe ka ditlalelo. ₁₆Gomme le wena o tlo go ntšha ganong ga ditlaletšo, o tlo go tšweletša molaleng go se nago dipateletšo, meruswi ya gago ya tlala makhura. ₁₇Mme wena o sa tletše moahlolelo wa ba babe; ke tšona di go hlolelago kahlolo le kotlo. ₁₈A sekgoro se se go epiše; mme bogolo bia selefa bo se go hlanoše. ₁₉A o re o tlo kgona patikego ka dikolomelo, le ge o ka tsoša maatla ohle? ₂₀Se bitše bošego; bo tloša ditšhaba felo ga tšona. ₂₁Itote, gore o se arogele bokgopong, gobane o itlhaoletše bjona ka go lahla kgotlelelo. ₂₂O tsebe gobane Modimo mo go tše a di kgonago ga fihlelwe; o kae mokayena a kago mo ruta? ₂₃Ke mang e a kago mo laetša tsela, a mo rera a re: O fošitše? ₂₄Eleletša, o rete ditiro tša gagwe, tše batho ba di tumišago ka difela. ₂₅Batho bohle ba a di bogela; mme motho o di bone di le kgole. ₂₆Go bjalo, Modimo ke e mogolo; ga re mo hlaologanye; bokae bja nywaga ya gagwe ga bo latišege. ₂₇Ke yena a gogago marotholodi a meetse, a a rothiša, a etšwa meuwaneng ya gagwe. ₂₈A tšhologa a etšwa marung, a rothela batho ba bantši. ₂₉Gagolo go lemoga mang maru go alega, le modumo motšwamothopeng ya gagwe? ₃₀O ko bone, ge a atlatša seetša sa gagwe; o khurumetša medu ya lewatle. ₃₁Ge a ahlola ditšhaba ka tšona, o buša a di nea dijo tša tšona. ₃₂O swere tladi ka seatla, mme o e roma ya yo tia. ₃₃O goelelwa ke medumo ya gagwe, ge a tsoga a galefetša sebe.