JOBO 41

₁Ka kgonthe, le ge o ipotile, o a aketša! O tlo re o sa e bona wa repha ditho. ₂Ga go wa mahlahlo a kago e hlohla. -- Ke mang a kago ema a lwa le nna? ₃E a nneilego selo ke mang, a re ke mmušetše? Tša ka tlase ga leratadima lohle ke tša ka. -- ₄Nka se lese go bolela le ditho tša yona, ke ra maatla le mmele wa yona. ₅Ke mang a kago phaola mphaphathi ya kobo ya yona? Ke mang a kago batamela tšharara ya mahlagareng ya yona? ₆Ke mang a kago bula mamati ao a mahlong a yona? Mo go lego meno a yona ke gona dipoifong. ₇Matsaka ke melokoloko ya dikotse tša yona, makgamathi a go swaragana a tiile. ₈A hlatlagana a lomane, go se šale le lenga mo gare ga ona. ₉A kgotlane, a hlakane, ga a amologane. ₁₀Ge e ethimola go phadima seetša; mahlo a yona a etša mahlasedi a mahuba. ₁₁Leganong la yona go tšwa dirumola, go tšwa dihlase tša mollo. ₁₂Dinko tša yona di thunya meuši, boka pitša ye e bedišwago ka dihlaka. ₁₃Mohemo wa yona o tšhuma magala; mo ganong ga yona go hlaga kgabo ya mollo. ₁₄Molala wa yona, ke gona go dutšego maatla a yona; e etiwa pele ke tlhobogo. ₁₅Mahlakore a mmele wa yona ke a mathata, a tiile, ga a tekateke. ₁₆Pelo ya yona ke e thata boka lebje, e tiile boka tšhilo. ₁₇Ge e tsoga, le bagale ba a šia; ba gakanega ba tšhogile. ₁₈Ge ba e betša ka lerumo, ga le e dire selo, le ge e le tšhoša, le ge e le mosebe, goba letsolo. ₁₉Tshipi e e sema bjang; mphiri e o sema phata ye e bodilego. ₂₀Mosebe o tšwago boreng o ka se ke wa e tšhabiša; maswika a seragamabje go yona ke dinono. ₂₁Thoka e re ke lehlaka; e tshega tšhoša ge e menegana. ₂₂Mpa ya yona ke makgwathi a bogale, e thula mogoga mohlakeng. ₂₃E seloša noka boka pitša ge e bela; e hudua letsha bjalo ka legapa la moreku. ₂₄Ge e feta, mohlala o šala o taga, bodiba o ka re ke boputswa bja moriri. ₂₅Mo faseng ga go na sekayona; e bopetšwe go se šie. ₂₆Dioka ka moka e di lebelela e le yona kgoši ya tšohle tše di ipotilego.