JOBO 6

₁Jobo a fetola a re: ₂Joo, masetlapelo a ka a ka be a elwa, a lakanywa le kotsi ye e nkwetšego. ₃Gobane boima bja yona bo feta lešabašaba la lewatle, mme bo nkgakantšha polelong. ₄Gobane ke hlabilwe ke mesebe ya Yomaatlaohle; botholo bja yona bo ntsene pelong; ke dikwa ke tše šiišago tša Modimo. ₅Afa pokolo ya naga e ka lla e na le mafulo? Goba pholo, a e ka bokolla e na le dijo? ₆A dijo tša go hlafa di ka lewa di sa nokwa? Goba mothobe wa lee o ka tsefa naa? ₇Pelo ya ka e itsimeletša go di swara; e nyenya tšhila mo dijong tša ka. ₈Joo, nka be ke tlelwa ke tše ke di nyakago; Modimo a ka be a nnea se ke se llelago. ₉A mola Modimo a ka be a rate go mpšhatla; a ka be a ntšha letsogo a nkgaotšha. ₁₀Ke mo nka bego ke wa pelo, nka be ke hlalala bohlokong bo šoro; gobane ga ke gane go laiwa ke yena e Mokgethwa. ₁₁Maatla a ka ke a makaakang ge ke thwe: Kgotlelela! -- Boyo bja ka mme ke boyo mang, ge ke thwe: Bea pelo! ₁₂A maatla a leswika? A mmele wa ka ke wa mphiri? ₁₃Ka kgonthe, go itlhakodiša go ntlogile; go iphološa go ntšhabile. ₁₄Mohlobogi o kgonwa ke botho bja ba gabo, le ge a ka lahla go šia Yomaatlakamoka. ₁₅Gomme nna, ba gešo ba mphetile boka noka; ba etša mafula a dinokana ge a ile; ₁₆a hubetše ka motlobotlobo; a feta a gogola le sefako. ₁₇Mme a yo gopa mohla wa letšatši; ge le fiša, a pšha moeleng. ₁₈Baeti ba fapoga tsela; ba phatša lehanata, ba yo loba. ₁₉Ke baeti, ba tšwa Thema; ba botile ona meetse. Ke makoko a ba Seba; ba holofetše ona. ₂₀Ba nyama ge ba hloka se ba bego ba se holofetše; ba fihla mme ba hutšologa. ₂₁Le lena bjale ga le selo; le bona tše di šiišago mme la tšhoga. ₂₂A nkile ka re: Mpheng! Goba ka re le nkarolele tša menono ya lena? ₂₃Goba nkile ka re: Nnamoleleng diatleng tša lenaba? Goba ka re le nthekolole go ba ba ntlemilego? ₂₄Lena nthuteng, ke tle ke homole; le ntemoše mo ke šaetšago. ₂₅Mantšu a rerešago ona a na le maatla ruri. Bjale, tsholo ya lena ke ya go solang? ₂₆A le re le sola polelo tša ka? Mantšu a mogakanegi ke a go tšewa ke phefo. ₂₇Ge e le lena, le baka sešuana; lena le ka ba la bapatša le ngwana bolena. ₂₈Go rata gore bjale le nkgadie, le bone ke se wa go le akela re lebane. ₂₉Hle nkgomeleng, le efoge bokgopo. Nkgomeleng; nna ga ke ipone molato. ₃₀A le re leleme la ka le na le bokgopo? Goba gano la ka le re le šitwa go hlatha bošula?