JOBO 8

₁Gwa fetola Bilidada wa Sua, a re: ₂O tlo kgaotša neng go re anegela dilo tšeo? Mantšu a molomo wago a tlo lesa neng go etša ledimo go duma? ₃A o re Modimo a ka kgopamiša dikahlolo? A o re Yomaatlakamoka a ka kgopamiša toko? ₄Ge bana bago ba mo sentše, gona o ba gafetše mo ba bego ba selela gona. ₅Bjale ge wena o ka pelofalela go nyaka Modimo, mme wa rapela Yomaatlakamoka, ₆o se ne bosodi, o lokile, gona o tlogo phafogela, a tsoša lapa lago ka baka la bothakga bja gago. ₇Gomme tše o bego o na natšo e tlo ba tše nyenyane, ge go ata tše di tlogo go tlela. ₈O ka be o latiša meloko ya ba kgale, wa hlokomela tša go lemogiwa ke borrabo. ₉Rena re ba maabane fela, ga re tsebe selo; matšatši a rena faseng a fo etša thiti. ₁₀Ba kgale a ba ka se go rute, ba bolera nago, ba tšweletša dipolelo dipelong tša bona? ₁₁Afa mohlahla o ka mela ge go se mohlaka? A lehlakanoka le ka gola mo go sego meetse? ₁₂Le ka oma e se le lekgaba, le sešo la butšwa bjang bjo bongwe e sa le botala. ₁₃Bagakwa-Modimo ba ya ka tsela yeo bohle; e ba go senyega ga kholofelo ya ba babe. ₁₄O kgantšha lefela, o bota bolepu bja segokgo. ₁₅O ithekga ka ngwako wa gagwe, wa se ke wa ema; o itshwarelela ka wona, a hwetša o sa tia. ₁₆O etša lehlogedi letšatšing; mme thabe tša gagwe di nabile serapeng sa gagwe. ₁₇Medu ya gagwe e rara lerako; o bona e le ngwako wa maswika. ₁₈Mohla a tomolwago, felo moo go šala go latola go re: Ga ka mmona. ₁₉Soo ge mothabelo wa tseleng ya gagwe; gomme mobung go šala go hloga yo mongwe. ₂₀Tseba, Modimo ga lahle yo bolo ba babe ga ba nee kgopu. ₂₁Ganong ga gago go tlo ba gwa tlala disego; molomong wa gago gwa tlo tlala a tlhalalo. ₂₂Babeki ba gago ba tlo apešwa tša dihlong; mme motse wa ba babe o tlo ba o se gona.