JONA 3

₁Lentšu la Morena la tlela Jona la bobedi la re: ₂Tsoga o ye motseng o mogolo wa Ninife, o ba goelele taba ye ke tlogo go botša yona. ₃Jona a tsoga a ya Ninife, a dira se Morena a mo laetšego sona. Gomme Ninife e be e le motse o mogolo wa Modimo, o sepelwago ka matšatši a mararo. ₄Gomme Jona a thoma go thetha le motse, a sepela letšatši le tee, a goelela a re: Go sa šetše matšatši a masome a mane; ke mo motse wa Ninife o tlogo ribegetšwa!

₅Batho ba Ninife ba dumela Modimo, ba goelela gore go ikonwe dijo, go aparwe mankgeretla, ba bagolo le banyane.

₆Kgoši ya Ninife, ge lentšu leo le fihla go yona, ya tsoga sedulong sa bogoši, ya apola tša bogoši ya apara mankgeretla, ya yo dula meloreng. ₇Ya re motseng wa Ninife go goelelwe go thwe: Kgoši le matona a gagwe ba laela ba re: Batho ba se ke ba ja selo, le ge e le eng; le diruiwa, dikgomo le dihuswa di se ke tša fula, di se ke tša nwa meetse. ₈Ba apare mankgeretla, batho le diruo; ba boe bohle, ba lahle ditsela tše mpe tša bona, ba lahle bošoro bja diatla tša bona. ₉Mohlomongwe Modimo a ka thiša a boa, a gomiša bogale bja gagwe, ra se ke ra senyega.

₁₀Modimo ge a bona se ba se dirago, ge ba lahla ditsela tše mpe tša bona, a thiša a lesa go tliša kotsi, ye a e boletšego a era bona; ya se ke ya direga.