JOSHUA 12

₁Šedi dikgoši tša naga yeo, tše Baisiraele ba di fentšego ba tšea naga ya tšona mošola wa Jorodane thoko ya bohlabela, go tloga ka noka ya Arinoni go fihla thabeng ya Herimone, le molala ka moka wa thoko yeo ya bohlabela. ₂Ke Sihoni kgoši ya Baamoro, e a bego a dutše Hesiboni a buša go tloga ka Aroere nokeng ya Arinoni, go tloga ka mo gare ga moela, le seripa sa naga ya Gileada, go fihla nokeng ya Jaboko e lego mollwane wa Baamoni. ₃A buša le molala o kgotlago Lewatleng la Genetsareta ka thoko ya Bohlabela, go goma ka lewatle la molala, e lego lewatle la letswai, tseleng ye e lebago Bethe-Jesimothe, le patoga ya thaba ya Pisiga ka thoko ya borwa.

₄Le naga ya Ogo kgoši ya Basani, e lego e mongwe wa mašalela a ba megwanggwang, a dutše Asitharothe le Ederei. ₅A buša thabeng ya Herimone, a buša la Salika le la Basani ka moka go goma ka mollwane wa Bagesuri le Bamaakati, le seripa sa la Gileada, a neana mellwane le Sihoni kgoši ya Hesiboni.

₆Ke bona ba go fenywa ke Moshe mohlanka wa Morena a na le Baisiraele; gomme naga tšeo Moshe mohlanka wa Morena o di neile Barubeni le Bagada le seripa sa Bamanase gore e be magae a bona.

₇Šedi dikgoši le dinaga tše Joshua a di fentšego ka mošono wa noka ya Jorodane ka thoko ya bodikela, go tloga ka Baali-Gada moeding wa Libanoni, go fihla dithabeng tša magwete tše di rotogelago Seire, tše Joshua a di neilego meloko ya Isiraele ya ba magae a bona ka dilete tša bona. ₈Dithabeng le melaleng, le magoleng, le dipatogeng tša dithaba, le lešokeng la thoko ya borwa, la Bahethe le la Baamoro, le la Bakanana, le la Bapheresi, le la Bahefi, le la Bajebusi, ₉kgoši ya Jeriko e tee, le kgoši e tee ya Ai motse wola o bego o batagane le Bethele, ₁₀kgoši ya Jerusalema e tee, le kgoši ya Heburone e tee, ₁₁kgoši ya Jaramuthe e tee, le kgoši ya Lakisi e tee, ₁₂kgoši ya Egilone e tee, le kgoši ya Gesere e tee, ₁₃kgoši ya Debiri e tee, le kgoši ya Gedere e tee, ₁₄kgoši ya Horama e tee, le kgoši ya Aradi e tee, ₁₅kgoši ya Libina e tee, le kgoši ya Adulama e tee, ₁₆kgoši ya Makeda e tee, le kgoši ya Bethele e tee, ₁₇kgoši ya Thapua e tee, le kgoši ya Hefere e tee, ₁₈kgoši ya Afeke e tee, le kgoši ya Sarona e tee, ₁₉kgoši ya Madoni e tee, le kgoši ya Hatsora e tee, ₂₀kgoši ya Simirone-Merone e tee, le kgoši ya Akisafa e tee, ₂₁kgoši ya Thaanake e tee, le kgoši ya Megido e tee, ₂₂kgoši ya Kedese e tee, le kgoši e tee ya Jokoneama thabeng ya Karamele, ₂₃kgoši e tee ya Doro mabaleng a Doro, le kgoši e tee ya dithaba tša Giligala, ₂₄kgoši ya Thiritsa e tee. Ka moka ke dikgoši tše masome a mararo a motšo o tee.